Arsenio Iglesias
Na Galipedia, a wikipedia en galego.
Arsenio Iglesias Pardo (Arteixo, 24 de decembro de 1930) é un adestrador de fútbol.
O chamado bruxo ou zorro de Arteixo elevou o nivel do Deportivo da Coruña a comezos da década de 1990 até facelo conquistar unha Copa do Rei (1995) e dous subcampionatos de liga e logrou que participase en competicións europeas por primeira vez na súa historia. Adestrou o Deportivo entre os anos 1970-73, 1982-85, 1987-89 e 1990-94. Neste último período o equipo recibiu o alcume de "Super-Depor".
No 2005 foi designado para dirixir xunto con Fernando Vázquez a primeira selección galega de fútbol da era moderna.
Amais, falar de Arsenio é falar dun personaxe que para moitos representa boa parte do que se coñece como identidade galega. Converteuse, co tempo, nunha figura que supera o mundo do fútbol; así, por exemplo, o grupo galego Os Diplomáticos de Monte Alto téñenlle dedicada unha canción: "Manda Tralla (oda a Arsenio)". Tamén é de salientar que Arsenio Iglesias é moi benquerido polo groso da prensa deportiva, cousa, con frecuencia, non demasiado doada.
