Alejandro de la Sota

Alejandro de la Sota

Biografía
Nacemento	(es) Alejandro de la Sota Martínez. 20 de outubro de 1913 Pontevedra, España
Morte	14 de febreiro de 1996 (82 anos) Madrid, España
Datos persoais
País de nacionalidade	España
Educación	Universidade Politécnica de Madrid Escola Técnica Superior de Arquitectura de Madrid
Actividade
Ocupación	arquitecto
Alumnos	Rafael Tamarit Pitarch
Lingua	Lingua castelá
Obra
Obras destacables (1962) Ximnasio do colexio Maravillas (1964) Gobierno Civil de Tarragona (pt) (1966) Pavillón Municipal dos Deportes de Pontevedra
Familia
Pai	Daniel de la Sota
Premios  Medalla Castelao  Premio Nacional de Arquitectura de España

Alejandro de la Sota Martínez, nado en Pontevedra o 20 de outubro de 1913 e finado en Madrid o 14 de febreiro de 1996, foi un arquitecto galego.

Traxectoria

Era fillo do político de orixe cántabra Daniel de la Sota e de María Teresa Martínez Correa. Criouse nun ambiente de clase media alta, o que lle permitiu desenvolver cedo as súas aptitudes artísticas. Acabados os seus estudos medios na cidade do Lérez, ingresou na Universidade de Santiago de Compostela, na que durante dous anos cursou Matemáticas. Trasladouse logo a Madrid para estudar na Escola Técnica Superior de Arquitectura de Madrid, na que se graduou en 1941 e onde foi nomeado Doutor Arquitecto en 1965. Durante case dúas décadas, de 1956 a 1972, foi profesor nesa mesma escola. Ao tempo, foi arquitecto oficial de numerosas empresas estatais, incluíndo Aviaco, a Dirección Xeral de Correos, Iberia ou o Instituto Nacional de Colonización.

Pavillón Municipal dos Deportes de Pontevedra.

Obra

De la Sota desenvolveu boa parte da súa carreira en Madrid, cidade na que faleceu, mais sempre mantivo fortes ligazóns familiares coa súa Galiza natal. A súa obra é expoñente dun racionalismo equilibrado, que une unha intensa creatividade arquitectónica xunto coa simplicidade construtiva. Foi un dos grandes promotores do industrialismo na construción dos anos 1960, introducindo elementos industriais na obra e mais na profesionalización da mesma. Os seus edificios acostuman combinar, de forma sorprendente, un gran rigor xeométrico, de liñas claras e rectas, coa audacia nas estruturas.

Recoñecementos

De la Sota recibiu o Premio Nacional de Arquitectura en tres ocasións; a Medalla de Ouro ao Mérito das Belas Artes e mais a Medalla de Ouro do Consello de Arquitectos. En 1990 foille concedida a Medalla Castelao.

Exterior do Colexio de Maravillas.

Vida persoal

En 1952 casou con Sara Ríus Taylor. Tiveron seis fillos: Alejandro, Ana, Daniel, José, Juan e Sara

Obras representativas

Ximnasio do Colexio de Maravillas.

• Vivenda de Ramón de Dios, Pontevedra (1945)
• Escola de Capataces (1948), Bastiagueiro (Oleiros), actualmente incluída no complexo do INEF.
• Laboratorios da Misión Biolóxica en Salcedo (Pontevedra) (1950)
• Casa da Avenida Doctor Arce nº 20, en Madrid, (1953-1964; derrubada)
• Goberno Civil (Tarragona) (1956-1963)
• Talleres Aeronáuticos TABSA (Madrid) (1957-1958)
• Ximnasio do Colexio Maravillas (Madrid) (1961)
• Bloque de Vivendas (Salamanca) (1963)
• Pavillón Municipal dos Deportes de Pontevedra (1966)
• Colexio Maior César Carlos (Madrid) (1967)
• Residencia de Verán Infantil (Miraflores de la Sierra, Madrid) (1957-1959)
• Central Leiteira CLESA, Madrid (1963)
• Vivendas na rúa do Prior, Salamanca (1962-1963)
• Edificio de Correos, declarado Ben de Interese Cultural, (Úbeda, Xaén) (1964)
• Igrexa de Santa Baia de Nantes (Sanxenxo)
• Casa Varela, Collado Villalba (1964-1968)
• Edificio Industrial CENIM (Madrid) (1965-1967)
• Colexio Residencia da Caixa de Aforros Provincial (Ourense) (1966-1967)
• Vivenda Guzmán (Algete), (1972). Derrubada en 2017.
• Aulas e Seminarios da Universidade (Sevilla) (1972) (Premio Nacional de Arquitectura)
• Centro de Cálculo da Caixa Postal (Madrid) (1973-1976)
• Banco Pastor, en Pontevedra (1974)
• Colexio dos Irmáns Maristas, A Coruña (1974)
• Vivenda Domínguez, A Caeira (Poio) (1976)
• Edificio de Correos e Telecomunicacións (León) (1980-1983)
• Edificio Caixa Postal de Aforros (Madrid) (1986-1989)
• Biblioteca Universitaria (Santiago de Compostela) (1990)
• Edificio de Xulgados (Zaragoza) (1991-1993)
• Redeseño e Rehabilitación do Edificio do Cabido Insular (As Palmas de Gran Canaria) (1994)

Véxase tamén

Bibliografía

• Dicionario biográfico de Galicia III. Ir Indo Edicións. 2010-2011. p. 249. 
• "Sota Martínez, Alexandre de la". Enciclopedia Galega Universal. Ir Indo. 1999-2002. ISBN 84-7680-288-9. 
• Gran Enciclopedia Galega Silverio Cañada (DVD). El Progreso. 2005. ISBN 84-87804-88-8. 
• Agrasar, Fernando: "El pabellón ingrávido de Pontevedra", in supl. "Galicia", La Voz de Galicia, 4-VI-1994.
• Vázquez Varela, Yzquierdo Perrín, García Iglesias e Castro Fernández (1996). 100 obras mestras da Arte Galega. Vigo: Nigra Arte. ISBN 84-87709-50-8. 

Ligazóns externas

• alejandrodelasota.org (en castelán) (en inglés).
• Mera, Irene. Os outros protagonistas. A historia descoñecida do XIX e XX. Alejandro de la Sota culturagalega.org (en Internet Archive).