Coia, Vigo

Coia
Avenida de Castelao en Coia.
Concello	Vigo
Provincia	Pontevedra
Coordenadas	42°14′10″N 8°43′36″O
Poboación	28.903 hab. (2020)
Entidades de poboación	4
[ editar datos en Wikidata ]

San Martiño de Coia é unha parroquia do concello de Vigo. Limita coas parroquias de Alcabre, Bouzas, Castrelos, Comesaña, Freixeiro, Matamá e Vigo Centro e pertence ó arciprestado de Vigo-Polígono.

Ten dúas entidades de poboación (Coia e As Travesas), 4 lugares e máis de 28.903 veciños (2020), 13.752 homes e 15.151 mulleres. Os lugares (que xeralmente forman parte dalgunhas das entidades): O Adro, Carballa, O Castro Castriño, O Chouzo, A Espedrigada, Esturáns, Figueirido, Lavadouro e Quintela.

Historia

En 1371 o rei Henrique II de Castela fixo doazón ao bispo tudense Joán de Castro do Couto e bailía de Coia e a parroquia foi ente independente até 1901 en que a Deputación Provincial de Pontevedra incorporouna ao concello de Vigo.

Antigamente nas Travesas atopábanse as cocheiras dos tranvías. En 1941 levantouse na praza de Travesas (actual praza de América) o IES Santa Irene, grazas á doazón de Policarpo Sanz cando morreu a súa muller Irene de Ceballos.

Os primeiros edificios foron construídos pola Promotora Benéfico Popular da Caixa de Aforros Municipal de Vigo. O proxecto foi para o arquitecto Desiderio Pernas, mais o barrio non se desenvolveu segundo os seus plans. Despois construíronse vivendas promovidas en cooperativa por empresas como Citroën e os estaleiros Vulcano, amais de vivendas de protección oficial.

No seu momento o barrio foi criticado polos excesos urbanísticos, que deron pé á construción de edificios sumamente altos, e pola alta criminalidade e marxinalidade na zona^{[Cómpre referencia]}.

Descrición

Venancio R. Riobó sinálaa como casa dos templarios a partir do ano 1200.

É un barrio residencial con numerosas zonas verdes. É un dos barrios máis poboados da cidade, estruturado en torno á Avenida de Castelao, que vai dende a Praza de América ata a Avenida de Europa (camiño para ir a Samil).

No barrio hai varios colectivos cidadáns: as asociacións de veciños "Camiño Vello" (organizadora da Marcha Ciclista de Coia, creada pola fundadora da Asociación Xuvenil desta AAVV: Nelly Pérez Giráldez) e "Cristo da Vitoria" (organizadora do Medio-Maratón de Coia), o comité de solidariedade Óscar Romero, a Asociación Xuvenil Luar, o Club Vigo Voleibol (con sede no Pavillón de Coia) e o C.D. Coya.

O calendario estival acolle en xullo as Festas da Consolación cos seus conseguintes fogos artificiais.

Instalacións

Polideportivo de Coia.

Na parroquia atópase o Pavillón Polideportivo Coia, lugar en que xoga os seus partidos o Club Vigo Voleibol, equipo profesional de voleibol que milita na Superliga. Tamén se atopa o Complexo Deportivo das Travesas, onde se celebran partidos de fútbol sala, voleibol, hóckey a patíns, baloncesto etc., así coma mitins e outros actos políticos e numerosos concertos de música.

O campo de fútbol da Bouza é o feudo do C. D. Coia e do Club Victoria. Outro club de relevancia é o Balonmán Seis do Nadal-Coia.

O campo de fútbol de Coia acolleu os partidos do Real Club Celta de Vigo até a construción do Estadio de Balaídos. Ademais, en 1922 acolleu a final da Copa do Rei de fútbol.

Galería de imaxes

Igrexa de San Martiño.  Espadana na praza da Consolación.  Igrexa do Cristo da Vitoria.  Igrexa de N.ª S.ª do Rocío.  Igrexa do Perpetuo Socorro.  Xulgados de Vigo.  Seccións da Audiencia.  Delegación de Facenda.  CPI Celso Emilio Ferreiro.  Buque Bernardo Alfageme.

Lugares e parroquias

Lugares de Coia

Lugares da parroquia de Coia no concello de Vigo (Pontevedra)
O Adro | O Castro Castriño | O Chouzo | Esturáns

Véxase tamén

Bibliografía

• Iván Sestay Martínez, A Toponimia do Val do Fragoso 1 Coia (descarga, 5'6 MB), Universidade de Vigo, 2008, ISBN 978-84-8158-417-2.
• Coia, historia dunha parroquia. RP Edicións, 1989. ISBN 84-404-4679-9

Outros artigos

• Lugares de Vigo