Cántigas da Terra

Cántigas da Terra
Instancia de coro
Datas  Fundación / creación 28 de decembro de 1916
Historia  Premios e distincións Medalla Castelao (2016)
Localización  Lugar de formación A Coruña
Fontes e ligazóns  Páxina WEB cantigasdaterra.gal
Wikidata C:Commons

Cántigas da Terra é un coro galego, formado na Coruña o 28 de decembro de 1916.

Historia

Cántigas da Terra foi fundado o 28 de decembro de 1916 na Coruña, por un grupo de intelectuais vencellados ás Irmandades da Fala que tiñan como obxectivo normalizar a cultura galega. O coro, formado inicialmente só por homes, naceu coa idea de abranguer varias disciplinas: canto, danza, teatro, poesía, pintura, etc. Eladio Rodríguez foi elixido primeiro presidente.

Debutou ante o público o 12 de xullo de 1917 no Teatro Rosalía de Castro da Coruña, coa peza A festa do Tabeirón, de Enrique Labarta Pose. Estaban dirixidos musicalmente por Mauricio Farto Parra e artisticamente por Leandro Carré Alvarellos e Xosé Iglesias Roura. Entre 1927 e 1929 o seu presidente foi Antón Villar Ponte .

O 25 de setembro de 1922 o grupo actuou na praza de touros de Corcubión, con seis mozas vestidas co traxe típico das Mariñas cantando no Coro acompañadas por vinte e tres homes. Naquela ocasión estiveron dirixidos por Manuel Fernández Amor, creador dos corpos de baile e polifonía.

En 1954 o coro foi invitado ao II Congreso de música celta celebrado en Brest, na primeira actuación dunha colectividade galega na Bretaña. Nese congreso, logo da comunicación presentada pola representación do Coro, aceptouse que "as características e constantes esenciais da música popular galega, eran coincidentes con aquelas outras dos países representados". Dese xeito, Galicia pasou a ser considerada unha das nacións celtas.

A formación gravou 19 discos. O primeiro deles foi en 1920, en matrices de cera, e o último foi presentado no 2004. Ademais participou en gravacións para programas de radio e televisión de varios países. Durante a súa historia o coro fixo centos de actuacións en Galiza e viaxou por España, Portugal, Francia, Suíza, Alemaña, Gran Bretaña, a Arxentina e o Brasil.

1917.

Repertorio

O coro foi fundado co gallo de recuperar e espallar a música e a cultura galegas. O seu repertorio conta con máis de setecentas partituras, entre alalás, pandeiradas, maneos, foliadas, muiñeiras, cántigas de berce, cantares de arrieiro e de desafío ou alboradas.

Procuran tamén a preservación do traxe tradicional, buscando antecedentes históricos e estudando as variación das distintas comarcas, así como o coidado da lingua vernácula coa recollida de termos propios. Tamén recollen todo tipo de instrumentos musicais populares, recuperando os xa en desuso.

Colaboraron coa formación personalidades como o boticario e gaiteiro Perfecto Feijoo, o crego Saturnino Cuíñas, Mauricio Farto Parra (un dos fundadores do coro), Manuel Fernández Amor (primeiro gaiteiro e posteriormente director do coro), Leandro Carré Alvarellos (director do grupo teatral), os presidentes da Agrupación Eladio Rodríguez González, Antón Vilar Ponte, Manuel Abelenda Zapata, José Luis Bugallal Marchesí e Geranio Torreiro Antón, ou os futbolistas do Deportivo da Coruña Salvador Fojón (vogal da primeira directiva), Venancio Deus (fundador e baixo na primeira actuación) e Angelito (director artístico).

Recoñecementos

Placa en homenaxe ao centenario do coro Cántigas da Terra no teatro Rosalía de Castro da Coruña

• Medalla de Ouro ao Mérito Artístico da Coruña.
• Medalla de Ouro da Federación de Coros Clavé.
• Cruz dos Angeles de Oviedo.
• Medalla da Cidade de Saint-Malo, en Francia.
• Medalla da Cidade de Recife, no Brasil.
• Gravata de Honra da Generalitat de Valencia.
• Gravata de Honra da Generalitat de Cataluña.
• Gravata de Honra da Deputación de Barcelona.
• Gravata de Honra da Deputación da Coruña.
• Gravata de Honra do Concello de Granada.
• Premio Lorenzo Barja do Real Coro Toxos e Froles de Ferrol.
• En 2013 o concello da Coruña nomeou unha praza co seu nome.
• Medalla Castelao 2016.

Véxase tamén

Ligazóns externas

• Páxina oficial