Manuel Vázquez Seijas

Na Galipedia, a Wikipedia en galego.
Saltar ata a navegación Saltar á procura
Manuel Vázquez Seijas
Nacemento15 de xaneiro de 1884
 Lugo
Falecemento23 de decembro de 1982
 Lugo
NacionalidadeEspaña
Ocupaciónhistoriador e escritor
editar datos en Wikidata ]

Manuel Vázquez Seijas, nado en Lugo o 15 de xaneiro de 1884 e finado na mesma cidade o 23 de decembro de 1982, foi un historiador e escritor galego.

Traxectoria[editar | editar a fonte]

Estudou o bacharelato en Lugo e graduouse como profesor mercantil na Coruña en 1902. Na cidade herculina forma parte da Cova Céltica, faladoiro celebrado na librería de Eugenio Carré Aldao na que participaban persoeiros como Ángel del Castillo, Manuel Murguía ou Eduardo Pondal.

Elixido concelleiro en Lugo (1912), foi tenente-alcalde durante algúns anos. Abandonou a política e no ano 1914 entrou na redacción do xornal La Idea Moderna. Ingresou por oposición no Corpo de Interventores de Administración Local sendo nomeado interventor de fondos da Deputación de Lugo en 1919. Xunto con Luis López Martí foi un dos fundadores do Museo Provincial de Lugo, pasando logo a ser director do mesmo. Foi nesa época e grazas a súa iniciativa cando a Deputación de Lugo adquiriu a Fortaleza de Xiá.

En sesión do 15 de setembro de 1905, con 21 anos e sendo presidente Manuel Murguía, foi nomeado académico adxunto da Real Academia Galega, pasando a ser académico numerario o 24 de maio de 1949. Tamén foi correspondente da Academia Provincial de Bellas Artes de La Coruña, da Real Academia de la Historia, da Real Academia de Bellas Artes de San Fernando e do Instituto Arqueolóxico Alemán.

Obras[editar | editar a fonte]

  • Lugo bajo el Imperio Romano, 1939.
  • Lugo en los tiempos prehistóricos, 1943.
  • Guía del Museo de Lugo, 1947.
  • Inscripciones Romanas de Galicia. Provincia de Lugo, 1954 (coautor canda Francisco Vázquez Saco).
  • Fortalezas de Lugo y su provincia (1955-1973) T.I 1955,T.II 1959, T.III 1967, T.IV 1962, T.V 1970 e T.VI, 1973.
  • El lenguaje de las piedras, 1971.

Foi autor de numerosos artigos periodísticos publicados en El Regional, La Idea Moderna e Lar entre outros. Destaca a súa achega á historiografía de Lugo e a súa provincia, con mais de cen artigos publicados no Boletín da Real Academia Galega, Boletín de la Comisión de Monumentos de Lugo e Boletín de la Asociación Española de Amigos de los Castillos.

Da súa obra adquire especial relevancia Fortalezas de Lugo y su provincia, seis tomos con achegas históricas, arqueolóxicas e xenealóxicas das murallas, castelos, torres e casas-torres, algunhas xa desaparecidas, da provincia de Lugo.

Véxase tamén[editar | editar a fonte]

Ligazóns externas[editar | editar a fonte]