Fernando Martínez Morás

Fernando Martínez Morás

Biografía
Nacemento	31 de maio de 1885 A Coruña, España
Morte	11 de setembro de 1937 (52 anos) León, España
Causa da morte	morte accidental, accidente de tráfico
Actividade
Ocupación	xornalista
Membro de	Real Academia Galega (académico de número) (1926–1937) Real Academia Galega (membro correspondente) (1908–1926)
Familia
Pai	Andrés Martínez Salazar
Irmáns	Marcelino Martínez Morás Andrés Martínez Morás

Fernando Martínez Morás, nado na Coruña o 31 de maio de 1885 e finado en León o 11 de setembro de 1937, foi un xeógrafo e escritor galego.

Traxectoria

De pé, de esquerda a dereita: Sebastián González, Eladio Rodríguez González, Enrique Peinador, Gonzalo López Abente, Pura González Varela (muller de Lugrís), Celia Brañas Fernández, Otero Pedrayo, David Fernández Diéguez, Ángel del Castillo e Fernando Cortés Bugía. Sentados: Fernando Martínez Morás, Castelao, Manuel Lugrís Freire, Antón Villar Ponte e Félix Estrada Catoyra.

Naceu na Coruña, sendo fillo de Andrés Martínez Salazar e Petra Morás Suevos. Estudou na Escola Superior de Comercio da Coruña e foi un dos pioneiros do fútbol na cidade, actuando como defensa no Corunna Foot Ball Club, futuro Real Club Coruña. Máis tarde ampliou os seus estudos en Londres e Oxford grazas a unha bolsa do Estado concedida en 1907.

Foi comisario pola Coruña na Exposición Rexional de 1909 e concelleiro da Coruña. Ingresou na Real Academia Galega o 20 de novembro de 1926 co discurso La toponimia de Galicia, respondido por Eladio Rodríguez González. Foi secretario da Real Academia Galega dende 1927 e mestre de xeografía económica na Escola de Comercio da Coruña. Tamén traballou como redactor de La Voz de Galicia e publicou artigos no Boletín de la Real Academia Gallega e noutras revistas de historia e literatura.

Amais de á RAG, pertenceu a outras institucións, como a Comisión Provincial de Monumentos, a Real Academia Provincial de Belas Artes e foi secretario do Instituto de Estudios Gallegos. Tamén foi un dos fundadores e o presidente da Universidade Popular da Coruña, nada no seo do Círculo de Artesáns e que tiña como obxectivo formar de xeito gratuíto á clase obreira. Presidiu tamén a Sociedade Filharmónica da Coruña, a Asociación da Prensa Local e a Federación de Xornalistas do Norte e Noroeste de España.

Morreu por mor dun accidente de tráfico, mentres cubría como xornalista a guerra civil española.

Vida persoal

Casou coa pianista Dora Castillo, irmá da tamén músico Pilar Castillo.

Obras

Fernando Martínez Morás, 1910.

• Las alarmas de Galicia, 1908.
• La Junta Superior de Subsidios, Armamento y Defensa del Reino de Galicia, 1908.
• Medios prácticos de fomentar entre la juventud el amor al estudio y el alejamiento de aquellos lugares en que puedan peligrar su honradez y buenas costumbres, 1916.
• Guía del turista, 1926.
• La región gallega. Notas geográfico-económicas, 1926, en colaboración con María de los Ángeles Lens de Patiño.

Véxase tamén

Bibliografía

• Couceiro Freijomil, A. (1952). "MARTÍNEZ MORÁS, Fernando". Diccionario bio-bibliográfico de escritores (en castelán) II. Santiago de Compostela: Bibliófilos Gallegos. p. 386. 
• "Martínez Morás, Fernando". Gran Enciclopedia Galega (DVD). El Progreso. 2005. ISBN 84-87804-88-8. 

Ligazóns externas

• "Artigos de Fernando Martínez Morás no Boletín da RAG". Real Academia Galega.