Ribeira

Ribeira.

Para outras páxinas con títulos homónimos véxase: Ribeira (homónimos).

Ribeira
Panorámica da cidade
Situación
Xentilicio:	Ribeirán - Ribeirense
Xeografía
Provincia:	Provincia da Coruña
Comarca:	Barbanza
Poboación:	27.518 hab. (2009)
Área:	69,0 km²
Densidade:	397,54 hab./km²
Entidades de poboación:	9 parroquias
Capital do concello:	Santa Uxía de Ribeira
Política (2011)
Alcalde:	Manuel Ruíz Rivas (PPdeG)
Concelleiros:	BNG: 4 PPdeG: 13 PSdeG-PSOE: 3 Outros: IPDER 1
Eleccións municipais en Ribeira
Uso do galego (2001)
Galegofalantes:	97,01 %
Sitio web oficial
www.riveira.com

Ribeira é un concello da provincia da Coruña, pertencente á comarca do Barbanza. Segundo o IGE en 2010 tiña 27.504 habitantes (27.053 no 2006, 26.884 no 2005, 26.623 no 2004, 26.589 en 2003). O seu xentilicio (véxase no Galizionario) é Ribeirense.

Evolución da poboación de Ribeira - desde 1900 ata 2010 -
1900	1930	1950	1981	2004	2010
12.218	16.870	18.280	24.542	26.623	27.504
Fontes: INE e IGE (Os criterios de rexistro censual variaron entre 1900 e 2004, e os datos do INE e do IGE poden non coincidir.)

Localización

O concello de Ribeira ocupa o extremo da península do Barbanza, asomándose ás rías de Arousa e de Muros-Noia. A maior parte do territorio ocúpano as estribacións da serra do Barbanza, de cuxos 200 m. de alto baixan numerosos regatos encaixados en vales estreitos, como o de Artes.

Merece especial consideración o conxunto formado polo Complexo Dunar de Corrubedo e a Lagoa de Carregal e Vixán, declarado parque natural.

Historia

Como en toda a Barbanza, abundan os restos megalíticos, entre os que cabe mencionar o dolmen de Axeitos. Da época castrexa son de salientar os castros da Cidá e o de Artes. A costa foi atacada polos viquingos desde o século IX e por outros pobos nos séculos seguintes. No século XVI a peste bubónica dezmou a poboación da comarca.

Os fomentadores cataláns que chegaron no século XVIII construíron fábricas de salazón e no século XIX introducíronse as novas técnicas de conservación e envasado en folla de lata, co que as fábricas se reconverteron e deron lugar ás conserveiras actuais.

O pleno do concello aprobou o 11 de novembro de 1984 unha moción para denominar o concello "Santa Uxía de Riveira", con v, previo informe do cronista oficial Carlos García Bayón, o concello basea nese acto a súa utilización da forma Riveira malia que a única forma oficial é Ribeira, tal como aprobou a Comisión de Toponimia da Xunta de Galicia.

Festexos

Na cidade de Ribeira cobran especial importancia a festa da dorna e as festas do verán. A festa da Dorna ten lugar entre o 20 e o 24 de xullo. Nese tempo a xente agrúpase en peñas e levan a cabo todo tipo de actividades, como o "voo sen motor", a "regata de embarcacións feitas a machada" ou o "gran prix de carrilanas" Cómpre destacar que é unha festa que consta de "idioma propio". É unha festa disfrutada por todos,na que toda a cidade se bota á rúa con gañas de divertirse e disfrutar desta festa esperada por todos os habitantes.

Tamén teñen importancia as festas de agosto, onde as atraccións, barracas e tómbolas se apoderan dalgunhas rúas ribeirenses. Son amenizadas con orquestras e concertos de artistas tanto nacionais como internacionais.

Galería de imaxes

Vexa o artigo principal en: Galería de imaxes de Ribeira

Imaxes da cidade de Ribeira

• 

  Vista de Ribeira dende o monte de San Alberte

• 

  Vista de Ribeira dende San Roque (monte periurbano)

• 

  Vista da cidade desde a entrada do porto

• 

  Porto

Imaxes doutros lugares de Ribeira

• 

  Serra do Barbanza desde Ribeira

• 

  Praia do Vilar, na parroquia de Carreira

• 

  Lagoa de Vixán, na parroquia de Carreira

Lugares de Ribeira

Para unha lista completa de todos os lugares do concello de Ribeira vexa: Lugares de Ribeira.

Véxase tamén

Concellos da Comarca da Barbanza
Boiro	A Pobra do Caramiñal	Rianxo	Ribeira