Álvaro das Casas

Álvaro María Casas Blanco, ou como asina as súas publicacións Álvaro de las Casas ou, cando escribe en galego Álvaro das Casas. Naceu en Ourense o 2 de xullo de 1901 e finado en Barcelona o 8 de marzo de 1950, foi un dinamizador cultural e escritor, en galego e castelán, de poesía, novela, ensaio e, fundamentalmente, de obras de teatro.

Traxectoria

Fundación do Partido Galeguista

En Ourense cursou os seus estudos básicos e de bacharelato, trasladándose a Valladolid para cursar a carreira de Filosofía e Letras. Doutorouse en Ciencias Históricas e Xeográficas, feito que talvez inflúa na proposta de teatro histórico deste autor. Exerceu de catedrático e director do Instituto local de Noia, onde fundou os primeiros grupos Ultreya. Foi escritor dramático de renome e tradutor de obras de autores portugueses, alén de militante do Partido Galeguista e membro do Instituto Histórico do Minho aínda que no ano 1933 despois dunha longa polémica co Partido Galeguista funda a Vangarda Nazonalista Galega.

Precisamente nunha comunicación feita ao Instituto Histórico do Minho, na que fala do teatro no noso país, publica a súa proposta de teatro galego o cal, na súa opinión, debería ser poético, de temática histórica e representábel en calquera punto de Galiza. Todos estes trazos achámolos na súa obra A Morte de Lord Sataüler (1929), onde demostra Álvaro das Casas que o arriba dito pode ser levado á práctica.

En 1936, con motivo da Guerra Civil, cae na obriga de se exiliar a Bos Aires (Arxentina), o seu lugar de residencia ata 1950. Neste mesmo ano, despois de se reconciliar co réxime franquista, volta ao Estado español, concretamente á cidade de Barcelona, onde finalizou os seus días o 8 de marzo dese mesmo ano.

Obra

Álvaro das Casas foi principalmente un autor dramático, o cal non lle impediu cultivar timidamente outros xéneros. A súa traxectoria como escritor está composta polas seguintes obras:

Teatro

• O Xardín do Castelo de Vidre (1926).
• A Morte de Lord Sataüler (1929).
• Pancho de Rábade. Via Crucis en Seis Estaciós (1931).
• O Tolo da Lastra (contido en Tres Conversas, 1930).
• A Gavilla (contido en Tres Conversas, 1930).
• Dente de Ouro (contido en Tres Conversas, 1930).
• O Outro (1930).
• Mátria (1935).
• Teatro dos Nenos (1936).
• Rechouchío (1936).
• Mitin (1936).

Poesía

• Sulco e Vento (1931).
• Escolma de Cantigas (1934).

Prosa

• Ladaíña (1927).
• Xornadas de Sebastián Albor (1931).

Ensaio

• A Illa de Ons (1932, Nós).
• Verbas aos Mozos Galegos (1933).

Véxase tamén

Bibliografía

• Francisco Abeijón Núñez (2001), Álvaro de las Casas. Vida e obra, Noia: Editorial Toxosoutos. ISBN 84-95622-22-X.
• Uxío-Breogán Diéguez Cequiel (2003), Álvaro de las Casas. Biografía, documentos e epistolario, Vigo: Editorial Galaxia. ISBN 84-8288-633-9.