Estadio Municipal de Riazor

Para outras páxinas con títulos homónimos véxase: Riazor.

Riazor

Datos
Localización	Avda. de Manuel Murguía, s/n 15011 A Coruña, Galicia
Arquitecto	Santiago Rey Pedreira
Inauguración	28 de outubro de 1944
Renovación	1982, 1995–1998
Superficie	Herba
Capacidade	34.600
Dimensións	105 x 68 m.
Propietario	Concello da Coruña
Localía	Deportivo da Coruña
Eventos
Final da Copa do Rei 1947 Mundial de Fútbol España 1982 Trofeo Teresa Herrera Trofeo Juan Acuña

O Estadio Municipal de Riazor é un estadio de fútbol, situado na cidade da Coruña. Serve de sede habitual ao Real Club Deportivo da Coruña.

Cunha capacidade para 34.600 espectadores sentados e un terreo de xogo cunhas medidas de 105x68 metros tras ser remodelado en 1982 e de 1995 a 1998, é o estadio máis grande de Galicia. A dirección do estadio é Avda. de Manuel Murguía, s/n 15.011 - A Coruña.

Historia

Pese a que nas proximidades do actual Estadio de Riazor xogaba habitualmente o Deportivo desde 1909, ata 1944 o equipo herculino non contou cun estadio en condicións, con gradas, vestiarios e demais instalacións. A inauguración do novo terreo de xogo produciuse o 28 de outubro de dito ano, nun Deportivo-Valencia no que caerían derrotados os coruñeses por 2-3.

O enorme tamaño do novo estadio, con capacidade para máis de 60.000 espectadores de pé, permitiu a celebración nas súas instalacións de partidos internacionais, sendo o primeiro deles un España-Portugal celebrado o 6 de maio de 1945, e no que venceu a selección española por 4-2. Do mesmo xeito permitía a celebración de finais de torneos oficiais, sendo a primeira a final da Copa do Rei da temporada 1946-47, que enfrontou ao Real Madrid e ao Espanyol, e que gañaron os merengues por 2-0.

Non obstante, a gran capacidade do campo e as pistas de atletismo que o rodeaban facían de Riazor un campo frío, que nunca se enchía. Con motivo da disputa en España do Mundial de fútbol de 1982 estes problemas paliáronse en parte, debido ás remodelacións necesarias para que o campo puidese aloxar partidos de tan alta competición. Así, a capacidade do estadio viuse reducida a 29.000 localidades, aforo co que albergaría tres partidos do Mundial, todos de primeira rolda.

Na temporada 1995-96, coincidindo cos inicios do periplo europeo do Deportivo, Riazor sofre unha nova remodelación coa finalidade de pechar o recinto polos seus catro costados, pois ata entón tiña forma de ferradura. Tras dita obra, o estadio perdería as pistas de atletismo, e alcanzaría as súas actuais 34.600 localidades.

Co renacer da Selección galega de fútbol a comezos do século XXI, o estadio de Riazor converteuse tamén en escenario dalgún dos enfrontamentos da Irmandiña, acollendo os partidos de 2006 e 2008 contra Ecuador e Irán respectivamente.

Eventos deportivos

Final da Copa do Rei de 1947

En 1947 xogouse a única final da Copa do Rei disputada ata o momento en Riazor. Os finalistas foron o Real Madrid e o Espanyol, sendo o resultado favorable ao conxunto branco (2-0), que gañou na prórroga.

Real Madrid	2–0	Espanyol	22 de xuño de 1947, 18:00 (CET) – Estadio de Riazor, A Coruña Asistencia: 30.000 espectadores Árbitro: Francisco Echave
Vidal 107' Pruden 119'	Informe

Mundial de Fútbol de 1982

Con motivo do Mundial de Fútbol de 1982 organizado en España, Riazor acolleu tres partidos de primeira rolda, especificamente do Grupo A do mundial, a saber: Polonia-Perú, Polonia-Camerún e Perú-Camerún.

Perú		0–0		Camerún	15 de xuño de 1982, 17:15 (CEST) - Estadio de Riazor, A Coruña Asistencia: 11.000 espectadores Árbitro: Franz Wöhrer (Austria)
		Informe

Polonia		0–0		Camerún	19 de xuño de 1982, 19:15 (CEST) - Estadio de Riazor, A Coruña Asistencia: 19.000 espectadores Árbitro: Alexis Ponnet (Bélxica)
		Informe

Polonia		5–1		Perú	22 de xuño de 1982, 17:15 (CEST) - Estadio de Riazor, A Coruña Asistencia: 25.000 espectadores Árbitro: Mario Rubio Vázquez (México)
Smolarek 55' Lato 58' Boniek 61' Buncol 68' Ciolek 76'		Informe	La Rosa 83'

Partidos da selección galega

Galicia		1–1		Ecuador	28 de decembro de 2006 - Estadio de Riazor, A Coruña Asistencia: 20.000 espectadores Árbitro: Bernardino González Vázquez
Pereira 68'		Informe	Calle 63'

Galicia		3–2		Irán	27 de decembro de 2008, 20:45 (CET) - Estadio de Riazor, A Coruña Asistencia: 12.000 espectadores Árbitro: Ignacio Iglesias Villanueva
Novo 23' 59' Losada 66'		Informe	Borhani 32' Khalatbari 82'

Afluencia

O Deportivo tivo dúas épocas na súa historia recente de gran afluencia ao estadio de Riazor. A primeira delas, entre os anos 1992–93 e 1996–97, onde a media de entrada situábase en 25.000 espectadores, para un estadio con capacidade para 29.000. Na segunda etapa, xa cunha capacidade para 35.000 espectadores, o número de socios e de afluencia situábase en torno os 30.000 espectadores, entre as tempadas 2000–01 e 2003–04. Na actualidade, o número de socios e a asistencia supera lixeiramente a media entrada. Na tempada 2009–10, a asistencia media foi de 21.240 espectadores.

Proxecto do novo estadio

En 2003 o presidente Augusto César Lendoiro presentou unha maqueta dun novo estadio de Riazor deseñado polo prestixioso arquitecto norteamericano Peter Eisenman. O presidente declarou que sería o estadio máis bonito do mundo, de cinco estrelas e que tería unha capacidade de 36.000 espectadores. O proxecto prevía a súa construción enriba do actual estadio, porén as non demasiado boas relacións entre o club e o Concello, así como o alto custo económico fixeron que o proxecto fose deixado de lado.

Anos máis tarde, en 2008, a raíz da candidatura conxunta das federacións española e portuguesa de fútbol para se converteren en sede oficial do mundial de fútbol de 2018, as reivindicacións para a construción dun novo estadio na Coruña víronse avivadas. O Deportivo e o Concello presentaron toda a documentación necesaria para postularen á Coruña como unha das sedes do campionato (de feito foi a primeira cidade en facelo) e amosaron o apoio non só do propio Concello senón tamén doutras institucións como a Deputación provincial e a Xunta de Galicia. Esta candidatura levaba consigo o problema de que Riazor non cumpre os requisitos (p.ex: ter unha capacidade superior aos 40.000 espectadores), o que compromete ás institucións a realizaren ben unha remodelación do estadio actual, ou ben a construír un novo estadio tal e como levaba reivindicando Lendoiro nos últimos anos.

O 18 de marzo de 2010, desde o Concello da Coruña presentábase o proxecto de reforma, no suposto de que a cidade fose elixida como sede para o Mundial de fútbol de 2018 ou 2022. O novo estadio tería unha capacidade de 45.000 espectadores e remodelaríase a zona próxima, incluíndo o soterramento das rúas próximas, para crear así unha nova área de lecer na cidade. O custo do proxecto estímase en 170 millóns de euros e o prazo de execución sería dun ano.

Galería de imaxes

Artigo principal: Galería de imaxes do Estadio Municipal de Riazor.

• 

  Interior do estadio

• 

  Gradas baleiras

• 

  Vista do estadio

• 

  Riazor durante a celebración do Galiza - Irán

• 

  Exterior

Véxase tamén

• Deportivo da Coruña
• Cidade Deportiva de Abegondo

Ligazóns externas

• Estadio de Riazor en Google Maps
• Programa oficial de visitas ó estadio