A Illa de Arousa

Para outras páxinas con títulos homónimos véxase: Arousa.

Coordenadas: 42°33′16″N 8°51′50″W / 42.55444°N 8.86389°W / 42.55444; -8.86389

A Illa de Arousa


Casa do concello.
Situación

Xentilicio^[1]	arousán
Xeografía
Provincia	Provincia de Pontevedra
Comarca	Salnés
Poboación	5.020 hab. (2010)
Área	7,0 km²
Densidade	717,14 hab./km²
Entidades de poboación	1
Capital do concello	San Xulián da Illa de Arousa (única parroquia)
Política (2007)
Alcalde	José Manuel Vázquez Vázquez (PSdeG-PSOE)
Concelleiros	BNG: 1 PP^deG: 4 PS^deG-PSOE: 6 Outros:
Eleccións municipais na Illa de Arousa
Uso do galego^[2] (2001)
Galegofalantes	99,44 %
Sitio web oficial
http://www.ailladearousa.es/

A Illa de Arousa ou A Arousa, é unha illa e concello da provincia de Pontevedra, situada no interior da ría de Arousa. Segundo o IGE en 2010 tiña 5.000 habitantes. O seu xentilicio (véxase no Galizionario) é arousán.

Censo Total	5.000
Menores de 15 anos	779 (15,58%)
Entre 15 e 64 anos	3.352 (67,04%)
Maiores de 65 anos	869 (17,38%)

[editar] Xeografía

A illa ten unha superficie de 7 km², acadando a súa maior altitude no Con do Forno (68 m). Desde setembro de 1985 está unida ao continente por unha ponte de 2 km.

Algunhas das súas praias son A Area da Secada, A Lavanqueira, O Vao, Camaxe, a praia de Carreirón, Espiñeiro e O Cabodeiro.

Esta illa ten catro portos: o do Xufre, (onde se comercializa o marisco e o peixe), Cabodeiro, Naval e O Campo. Hai tres paseos marítimos: o do Campo, o do Cantiño e o que vai do IGAFA (Instituto Galego de Formación en Acuicultura) á Area da Secada. É tamén de interese turístico o faro de Punta Cabalo.

As precipitacións danse en inverno e en outono e en menor cantidade en primavera; no verán as precipitacións son menores de 50 mm. En todo o ano danse mais de 1.000 mm de choivas e é rara a vez que cae algunha nevada en inverno xa que a última foi no 1985. As temperaturas medias de inverno son de 10º e no verán de 21,5º, con máximas de 40º en agosto.

[editar] Historia

A illa xa foi habitada nos primeiros tempos do paleolítico (quedando mámoas na illa Guidoiro Areoso) e na idade do bronce, en épocas en que o nivel do mar era máis baixo. Da época romana quedan restos dunha vila preto da punta do Naso, e localizouse unha necrópole na praia dos Bufos.

No ano 912 a metade da illa pasou a pertencer ao mosteiro de San Martiño Pinario, da orde de San Bieito, trala doazón do bispo de Iria Sisenando. No ano 929 o rei Afonso IV fundou o mosteiro de San Xián.

No século XII, ante as invasións dos normandos, o arcebispo Xelmírez ordenou a construción de naves e torres para protexer a costa, converténdose a illa nun punto de encontro para as tropas.

Peirao.

A partir de 1845 desenvolveuse a industria de salgado e pesca da sardiña, chegando a haber sete factorías. En 1879 inaugurouse a fábrica de salgado Goday, a segunda implantada en Galicia.

Trala División territorial de 1833 converteuse en concello, pero en 1873 pasou a formar parte de Vilanova de Arousa, ao que pertenceu até 1996 agás entre 1935 e 1945, cando formou parte de Vilagarcía de Arousa. En 1996 volveu ser concello de seu, logo da presión social da veciñanza.

O 14 de setembro de 1985 inaugurouse a ponte que une a illa a terra, que dinamizou a economía da poboación. Até entón os desprazamentos tiñan lugar en pequenos barcos.

Tradicionalmente a economía estivo baseada na pesca e no marisqueo, pero actualmente está máis diversificada.

[editar] Patrimonio histórico-artístico

Centro de Interpretación da Conserva

[editar] Festas

Festa do Patrón: o 7 de xaneiro, San Xulián. Duran tres días, logo de Reis.
Entroido: O carnaval é unha das celebracións máis importantes na Arousa desde hai moito tempo. Actualmente acode moita xente dos arredores, especialmente o Luns de Entroido.
Festas do Carme: As festas do verán duran cinco ou seis días, adicados aos quintos, a San Ramón, San Roque, San Antonio, e á Virxe do Carme. O día do Carme é sempre un sábado, e celébrase normalmente a finais de xullo, variando a data para que coincida con mareas vivas, pois con marea alta celébrase a procesión marítima na que participan centos de embarcacións levando a arousáns e visitantes.

[editar] Festas gastronómicas

Festa da Navalla, o 27 de xullo
Festa do Mexillón, o 1º domingo de agosto.
Festa do Polbo, a 1ª fin de semana de setembro.
Festa gastronómica do Mar, todas as fins de semana de agosto agás a 1ª (que é a do mexillón).