Corporación de Servizos Audiovisuais de Galicia

Corporación de Servizos Audiovisuais de Galicia
Instancia de organismo público canle de televisión pública emisora de radio pública organización
Parte de Xunta de Galicia
Forma xurídica sociedade anónima
Composto por Televisión de Galicia Radio Galega
Persoas e organizacións
Cargo dirixente Alfonso Sánchez Izquierdo
Matriz Consellería de Presidencia, Administracións Públicas e Xustiza
Datas e cronoloxía
Fundación 11 de xullo de 1985
Localización
Situado en Santiago de Compostela
Sede Santiago de Compostela
Área de operación Galicia
País España
Coordenadas  42°51′44″N 8°33′28″O
Fontes e ligazóns
Páxina WEB crtvg.gal
Wikidata C:Commons

A Corporación de Servizos Audiovisuais de Galicia (CSAG), chamada antes de 2024 Corporación de Radio e Televisión de Galicia (CRTVG) é un ente público con titularidade xurídica propia creada polo Parlamento de Galicia en 1984 co obxectivo de pór en funcionamento, xestionar, e explotar os medios de comunicación públicos de Galicia. Para tal fin e para contribuír na normalización lingüística e a cohesión social de Galicia, creáronse as sociedades anónimas Televisión de Galicia S.A. e Radio-televisión de Galicia S.A. que co seu sinal chegan a todo o territorio galego.

Historia

O primeiro goberno galego xurdido dunhas eleccións autonómicas en 1981 estaba dividido acerca da constitución dun medio público galego que entre outras cousas favorecese a normalización da lingua galega. Dunha banda o conselleiro da Presidencia, Xosé Luís Barreiro Rivas, era o principal impulsor do proxecto e da outra o vicepresidente José Manuel Romay Beccaría era totalmente contrario preferindo unha política de axuda aos medios privados. Cando Romay Beccaria deixou o goberno galego, Barreiro comezou a redactar a Lei de Radio e Televisión que conduciu á creación da CRTVG aínda que se mantivo a oposición dun sector de AP; na oposición o PSOE tamén estaba dividido xa que os catro deputados independentes galeguistas que concorreron polas listas socialistas estaban a favor da súa creación mentres o PSOE mantiña unha política ambigua, tan só os nacionalistas do BNPG-PSG e EG estaban totalmente a favor da súa creación. O 11 de xullo de 1984 aprobouse a Lei de Creación da Compañía de Radio-Televisión de Galicia

A TVG e a Radio Galega iniciaron as súas emisións o 29 de marzo de 1985 e foron o primeiro medio audiovisual e radiofónico en emitir en lingua galega toda a súa programación.

"Nace hoxe esta emisora nova e rebulinte, cos folgos e coa promesa de realidade do noso propio camiñar cara o futuro"

Gerardo Fernández Albor no acto de inauguración

A CRTVG xestiona as cadeas de radio Radio Galega, Radio Galega Música e Son Galicia Radio (DAB e TDT) e as canles de televisión TVG, tvG2, TVG Europa e TVG América, emitindo as dúas últimas canles por satélite. Ademais TVG América tamén emite por TDT e tvG2 exclusivamente por TDT.

O seu Consello de Administración está composto por seis membros elixidos para un mandato de cinco anos polo Parlamento de Galicia entre persoas de acreditado prestixio profesional. A súa misión céntrase en velar polo cumprimento do disposto na Lei de Creación da Compañía e, especialmente, en aprobar aquelas materias que asentan as directrices do funcionamento da entidade pública, como son a programación, a memoria anual, o cadro de persoal e as normas reguladoras da emisión de publicidade.

A TVG e a Radio Galega contan cun consello asesor, que non ten competencias decisorias, senón só asesoras. Está compostos por vogais elixidos entre os traballadores, xestores dos servizos públicos, representantes da Administración Autónoma, Consello da Cultura Galega, universidades, Parlamento e deputacións provinciais.

A Dirección Xeral é un órgano universal que ten a responsabilidade executiva e é nomeado polo Goberno de Galicia para cada lexislatura. As súas funcións son as de xestionar o ente público e as súas sociedades. Para iso conta cun equipo técnico, administrativo e xurídico enmarcado na estrutura da Compañía. Da Dirección Xeral depende tamén a Dirección de Comunicación e Relacións Externas.

Ao redor da Corporación da Radio-Televisión de Galicia e as súas dúas sociedades móvense actualmente un total de 671 traballadores dos que un 70% son homes e un 30% mulleres.

O 1 de xaneiro de 2016 extinguiuse a Compañía de Radio-Televisión de Galicia e pasou a denominarse Corporación de Radio-Televisión de Galicia.

O 17 de xaneiro de 2024, a CRTVG creou AGalega, a plataforma dixital de contidos dispoñible como plataforma web e como aplicación. Esta nova marca de contidos audiovisuais en galego supón a adaptación da Televisión de Galicia e a Radio Galega ao eido dixital cara a un consumo de contidos á demanda e en aberto. Foi definida como a "maior plataforma dixital audiovisual en galego do mundo".

Actividades

Televisión

En televisión, Televisión de Galicia agrupa para a emisión dentro de territorio galego das canles xeneralistas. Todos as canles se poden ver por TDT en Galicia, plataformas de satélite ou cable. As canles son:

Logo	Canle	Inicio de transmisións
	TVG Canle xeneralista.	24 de xullo de 1985
	TVG2 Canle xeneralista.	2 de febreiro de 2009
	TVG UHD	26 de marzo de 2024

Televisión no exterior

As canles de TVG para o exterior están dispoñibles a través de Internet e de diversos satélites e plataformas de pago en España, Europa e Latinoamérica.

Logo	Canle	Inicio de transmisións
	TVG América Canle xeneralista.	1 de abril de 1997
	TVG Europa Canle xeneralista.	7 de marzo de 1998

Canles en liña

Logo	Canal	Inicio de transmisións
	AGalega Plataforma dixital de contidos da CRTVG.	17 de xaneiro de 2024
	Xabarín TV Plataforma dixital de contidos para o público infantil e xuvenil da CRTVG.	2 de decembro de 2016 Relanzamento: 17 de xaneiro de 2024
	Momentos G Canle online de emisión dos mellores momentos dos programas da TVG.	2 de decembro de 2016
	Musigal Canle de emisión de programas musicais online.	2 de decembro de 2016
	#Cultura365 Canle cultural online da TVG, que se chamaba ZigZag TV ata o mes de decembro de 2018.	2 de decembro de 2016

Antigas canles

Logo	Canle	Inicio de transmisións	Cesamento de transmisións
	Galeusca TV Emisión internacional para América de programas de TVG, TV3 e ETB.	31 de decembro de 1996	Setembro de 1998
	Telenoticias Canle de televisión por cable que emitía noticias das canles da FORTA, constituída, nese momento, por ETB, TV3, TVG, Telemadrid, Canal Sur e Canal 9.	15 de setembro de 1997	31 de xullo de 1998

Radio

En radio, Radio Galega conta con tres emisoras que abarcan o territorio galego.

Logo	Emisora	Inicio de transmisións
	Radio Galega Emisora xeneralista.	24 de febreiro de 1985 (40 anos)
	Radio Galega Música Emisora de música.	3 de marzo de 2004 (21 anos)
	Son Galicia Radio Emisora de música.	17 de maio de 2004 (21 anos)

Lista dos directores xerais

Anos	Director
1985-1986	Luis Losada
1986-1987	Lois Caeiro
1987-1990	Abilio Bernardo de Quirós
1990-1994	Ramón Villot
1994-2005	Francisco Campos
2005-2009	Benigno Sánchez
2009-	Alfonso Sánchez Izquierdo

Véxase tamén

Ligazóns externas

• Sitio web da CRTVG