1000 12/16

Parlamento de Galicia

Na Galipedia, a Wikipedia en galego.
Saltar ata a navegación Saltar á procura

Para outras páxinas con títulos homónimos véxase: Galicia (homónimos).
Parlamento de Galicia
XI Lexislatura
Parlamento de Galicia.svg
Datos xerais
Ámbito Galicia
Creación1981
TipoParlamento autonómico (unicameral)
LímiteLexislatura de 4 anos
Liderado
PresidenteMiguel Ángel Santalices Vieira (PPdeG)
desde o 21 de outubro de 2016[1]
Vicepresidenta primeiraElena Candia (PPdeG)
desde o 24 de maio de 2022
Líder da maioríaAlfonso Rueda (PPdeG)
desde o 12 de maio de 2022
Líder da oposiciónAna Pontón (BNG)
desde o 2020
Composición
Membros75 deputados
GaliciaParliamentDiagram2020.svg
Grupos representadosGoberno (42)

     PPdeG

Oposición (33)     BNG 19 deputados

     PSdeG-PSOE 14 deputados
Salario4.953,39 €/mes [2]
Título primeiro, capítulo primeiro do Estatuto de autonomía de Galicia
Eleccións
Sistema electoralRepresentación proporcional por listas
Última elección12 de xullo de 2020
Sede(s)
Hemiciclo da cámara (Pazo do Hórreo, Santiago de Compostela)
Sitio web
www.parlamento.gal
Cronoloxía
←
X Lexislatura 		→
XII Lexislatura

O Parlamento de Galicia é a institución na que reside o poder lexislativo da Comunidade Autónoma de Galicia e é o máximo órgano representativo do pobo galego. Instaurouse con anterioridade ás primeiras eleccións autonómicas de 1981 formado polos deputados elixidos para o Congreso dos Deputados de España polas circunscricións galegas. Segundo o Estatuto de Autonomía de Galicia debe estar formado por entre 60 e 80 deputados, así e todo desde a primeira lexislatura fixouse o seu número en 75, que se elixen por sufraxio universal, igual, libre, directo e secreto por un prazo de catro anos. Destes 75, son elixidos 25 pola provincia da Coruña, 22 pola de Pontevedra, 14 pola de Lugo e 14 pola de Ourense (Decreto 92/2016).

Funcións[editar | editar a fonte]

  • Exercer a potestade lexislativa da Comunidade Autónoma.
  • Controlar a acción executiva da Xunta de Galicia.
  • Aprobar os seus orzamentos.
  • Designar para cada lexislatura das Cortes Xerais os senadores representantes da Comunidade Autónoma galega.
  • Escoller de entre os seus membros a Presidencia da Xunta.
  • Esixirlles responsabilidades á Xunta de Galicia e ao seu presidente.
  • Solicitar do Goberno do Estado a adopción de proxectos de lei.
  • Presentar ante a Mesa do Congreso dos Deputados proposicións de lei.
  • Interpoñer recursos de inconstitucionalidade.
  • Presentarse perante o Tribunal Constitucional nos supostos e termos previstos nas leis.

O Parlamento representa o pobo de Galicia e constitúe a primeira das institucións da Comunidade Autónoma da que derivan todas as outras, e é inviolable.

Sede[editar | editar a fonte]

Artigo principal: Pazo do Hórreo.
Pazo do Hórreo.
Sede do Parlamento de Galicia, en Santiago de Compostela.

O pazo de Xelmírez foi a sede provisional do Parlamento de Galicia desde a súa constitución o 19 de decembro de 1981[3] ata que se trasladou ó pazo de Fonseca no verán de 1982[4] e, finalmente, á actual sede no pazo do Hórreo en marzo de 1989. Para conmemorar os 30 anos da institución, o 19 de decembro de 2011 celebrouse no pazo de Xelmírez unha sesión extraordinaria do Parlamento.[5][6]

O Pazo do Hórreo conta con todas as dotacións necesarias para que os deputados e deputadas poidan desenvolver o seu traballo: salón de plenos, salas de comisións, de prensa e outras dependencias de uso polivalente, tanto para as reunións de carácter interno como para a actividade pública e encontros con colectivos. Así mesmo, un completo equipamento tecnolóxico permite ofrecer en directo, a través da web, as sesións do Pleno e das comisións.

O salón de plenos é o lugar habitual onde teñen lugar as sesións do Pleno do Parlamento de Galicia, e os deputados ocupan os asentos arranxados en forma de hemiciclo ante a Mesa presidencial. O presidente da Xunta de Galicia e o seu Goberno ocupan a primeira ringleira de escanos, e o resto de deputados, agrupados en grupos parlamentarios, ocupan os restantes, previamente asignados pola Mesa do Parlamento.

O Parlamento alberga tamén unha variada e valiosa colección de arte galega contemporánea, pintura e escultura fundamentalmente, e conta cunha nutrida biblioteca. Desde 1997 a biblioteca do Parlamento acolle o arquivo bibliográfico e persoal de Ricardo Carvalho Calero, unha colección formada por 4.872 volumes de monografías e coleccións de 197 títulos de revistas, documentos persoais e docentes, correspondencia, expedientes e recortes de prensa, obra propia e allea, así como material gráfico (láminas, mapas, planos e carteis).[7]

Composición[editar | editar a fonte]

Artigo principal: Composición do Parlamento de Galicia.

O Parlamento de Galicia está formado por 75 deputados. Para a configuración da cámara na XI Lexislatura foron convocadas eleccións ao Parlamento de Galicia e convocáronse eleccións para o día 12 de xullo de 2021. Dos resultados desas eleccións deriva a configuración da cámara para a XI Lexislatura.

Nestas eleccións celebradas o 12 de xullo, o resultado foi:

Mesa do Parlamento[editar | editar a fonte]

Grupos parlamentarios no Parlamento de Galicia

Nome Partidos Portavoz Escanos
Grupo Parlamentario Popular PPdeG Pedro Puy Fraga 42
Grupo Parlamentario Nacionalista BNG Ana Belén Pontón Mondelo 19
Grupo Parlamentario Socialista PSdeG Luis Manuel Álvarez Martínez 14

Actividade[editar | editar a fonte]

A actividade do Parlamento de Galicia desenvólvese en dous períodos de sesións: un que abrangue os meses de setembro a decembro e outro que vai do 15 de xaneiro ao 15 de xullo. Durante estes períodos, os deputados pódense reunir en sesións ordinarias de Comisión que, habitualmente, teñen lugar de martes a venres de cada semana.

Fóra destes períodos de sesións, pódense realizar sesións extraordinarias de cumprirse determinados requisitos.

Quen exerce a Presidencia do Parlamento fixa a Orde do día das Sesións Plenarias, de acordo coa Mesa e a Xunta de Voceiros e tendo en conta o calendario de actividades. A orde do día das Comisións vén determinada pola súa Mesa, de acordo co calendario establecido pola Mesa do Parlamento.

Presidencia[editar | editar a fonte]

A presidencia do Parlamento de Galicia é o cargo do máximo representante do poder lexislativo dentro da comunidade autónoma. Ostenta a representación da Cámara e é elixida polo Pleno para a totalidade da lexislatura. Preside todos os demais órganos colexiados do Parlamento. Até o de agora foi ocupada por:

  1. Antonio Rosón (1981-1986)
  2. Tomás Pérez Vidal (1986-1989)
  3. Vitorino Núñez (1989-1997)
  4. Xosé María García Leira (1997-2005)
  5. Dolores Villarino (2005-2009)
  6. Pilar Milagros Rojo Noguera (2009-2016)
  7. Miguel Ángel Santalices Vieira (2016-actualidade)

Composicións anteriores do Parlamento de Galicia[editar | editar a fonte]

Artigo principal: Lista de deputados no Parlamento de Galicia.

Notas[editar | editar a fonte]

  1. ↑ "Santalices, reelegido presidente del Parlamento con los votos del PPdeG" Europa Press, 21/10/2016.
  2. ↑ "Réxime económico dos/as deputados/as do Parlamento de Galicia no ano 2022" (PDF). Parlamento de Galicia. Consultado o 18 de agosto de 2022. 
  3. ↑ Fotografía dos parlamentarios Arquivado 19 de abril de 2014 en Wayback Machine. achegándose aquel día ó acto de constitución no Pazo de Xelmírez.
  4. ↑ Marcos Peŕez Pena (11 de xullo de 2020). "Canto sabes sobre a historia das eleccións ao Parlamento galego?". Praza Pública. 
  5. ↑ "El Parlamento agradece a la USC su hospitalidad durante casi siete años". La Voz de Galicia (en castelán). 2012-06-29. Consultado o 2019-07-25. 
  6. ↑ "El Parlamento de Galicia, tres décadas de democracia". www.elcorreogallego.es. Consultado o 2019-07-25. 
  7. ↑ O pazo do Hórreo na páxina web do Parlamento de Galicia.

Véxase tamén[editar | editar a fonte]

Bibliografía[editar | editar a fonte]

Outros artigos[editar | editar a fonte]

Ligazóns externas[editar | editar a fonte]

Traído desde «https://gl.wikipedia.org/w/index.php?title=Parlamento_de_Galicia&oldid=6162965»