Roberto Blanco Torres

Na Galipedia, a Wikipedia en galego.
Roberto Blanco Torres
Día das Letras Galegas 1999, Roberto Blanco Torres.jpg
Datos persoais
Roberto María Blanco Torres
Nacemento 18 de marzo de 1891
Lugar Cuntis
Falecemento 3 de outubro de 1936 45 a.
Lugar Entrimo
Soterrado Galez, Entrimo
Cónxuxe Xulia Sánchez Novoa
Fillos (non tivo)
Actividade
Lingua Galego e castelán
Debut 1907
Movemento agrarismo - galeguismo
Xéneros Poesía, xornalismo
Obras principais Orballo da media noite
De esto y de lo otro
Influencias Basilio Álvarez,
Antón Villar Ponte [1]
Alma máter (sen formación universitaria)
Ocupación xornalista
Organización Irmandades da Fala

Roberto Blanco Torres, nado en Cuntis o 18 de marzo de 1891 e finado en Entrimo o 3 de outubro de 1936, foi un xornalista e poeta galego. Deu os primeiros pasos na poesía da man das vangardas artísticas. A súa obra poética é cualificada polos críticos como dunha grande beleza e intensidade expresiva. Outra das facetas deste home de letras é a de xornalista. O seu traballo nos medios impresos foi moi extenso e variado. A sinatura de Roberto Blanco Torres nas columnas de opinión caracterizou practicamente unha época xornalística.

Ademais de ser colaborador asiduo da prensa galega dirixiu varios xornais. As súas columnas desprenden o talante combativo que caracteriza toda a súa obra. Dende Cuntis, a súa vila natal, emigrou a Cuba. Este desterro condicionou a súa personalidade, que se foi forxando pouco a pouco no transcorrer dos anos. Comprometido co seu tempo, evolucionou politicamente dende o agrarismo ata o galeguismo. Á súa figura dedicouse o Día das Letras Galegas de 1999.

Traxectoria[editar | editar a fonte]

Os seus pais foron Pedro Blanco Iglesias (despois chamado Pedro Blanco de Crespo)[a] sacerdote dispensado, natural de Donramiro, Lalín, e Carmen Torres Fuentes, mestra.[2] Roberto foi o menor de nove irmáns. Seu pai deulle unha sólida cultura clásica. Seguindo os pasos dos seus irmáns maiores Segismundo e Nuño, en 1906 emigrou a Cuba. Alí comeza a colaborar na prensa da comunidade galega, para o que emprega o pseudónimo de Fray Roblanto. O trato con Antón Villar Ponte e Ramón Cabanillas foron decisivos para a súa traxectoria ideolóxica.

Publicou os seus primeiros artigos no semanario Follas Novas da Habana en setembro de 1907. Tamén colaborou con Santos e Meigas, Suevia e Galicia. Durante eses anos entrou en contacto, tamén, con Waldo Álvarez Insua, Virxilio Blanco e o mestre Chané.[3]

En 1910 apareceu o seu primeiro artigo na prensa galega, na revista Vida Gallega. No mes de decembro de 1911 dirixiu a revista La Alborada, colaborou en La Región Gallega (1913) e dende abril de 1915 dirixiu La Tierra Gallega, dende onde atacou a algúns dos administradores do Centro Gallego de La Habana, ao tempo que colaboraba na prensa cubana, en especial no Diario de la Marina e El Comercio.

A fins de 1916 regresou a Galicia, onde coñeceu ao cura José Toubes Pego, un dos fundadores de El Ideal Gallego. Estableceuse na Coruña. Participou nas Irmandades da Fala e a comezos de abril de 1917 publicou o seu primeiro artigo n' A Nosa Terra. Participou na I Asemblea Nacionalista celebrada en Lugo en decembro de 1918.

En outubro de 1920 fíxose cargo da dirección de El Correo Gallego de Ferrol, da que cesou en abril de 1921, e pasou a dirixir La Zarpa en Ourense ata 1923, cando foi redactor xefe de Galicia. Diario de Vigo. En 1926 casou con Xulia Sánchez Novoa e durante uns meses de 1927 foi o redactor xefe de El Pueblo Gallego. Dirixiu El Progreso de Pontevedra.[4]

En 1929 Editorial Nós publicou Orballo da media noite, colección de 31 poemas, nos que amosa o coñecemento dos recursos da poesía vangardista e futurista,[5] e en 1930 saíu do prelo De esto y de lo otro, unha escolma de 38 artigos xornalísticos.[6] Participou na creación da Asociación Galega de Escritores (1930).

IV Asemblea Nacionalista (Monforte de Lemos, do 18 ao 20 de febreiro de 1922). Entre outros están: Castelao, Antón e Ramón Villar Ponte, Blanco Torres e Antón Losada.

Blanco Torres foi membro do comité executivo da Federación Republicana Gallega e en marzo de 1931 asumiu a dirección de La República de Ourense, ao tempo que comezou a desilusionarse coa actuación do seu grupo político na consecución da autonomía para Galicia, aínda así aceptou o cargo de gobernador civil de Palencia entre o 29 de decembro de 1931 e o 16 de xuño de 1932. En febreiro de 1933 fíxose cargo da dirección de El Noroeste[7]. En 1935 dirixiu El País de Pontevedra, e dende maio de 1936 foi o xefe do gabinete de prensa do Ministerio de Gobernación, e participou activamente na campaña para a aprobación do Estatuto de Autonomía de Galicia.

Morte

A sublevación militar do 18 de xullo de 1936 sorprendeu a Blanco Torres na aldea de Amido, no concello da Peroxa, na casa familiar da súa muller; detido en setembro foi levado á prisión de Ourense, e o 3 de outubro de 1936 foi paseado polos falanxistas que o fusilaron no concello de Entrimo. Por orden xudicial, foi soterrado nunha fosa común da igrexa parroquial de San Fiz de Galez no concello de Entrimo.

Obra[editar | editar a fonte]

Escolmas e edicións póstumas[editar | editar a fonte]

Galería de imaxes[editar | editar a fonte]

Retrato en Vida Gallega, 1915 
Blanco Torres é unha das figuras máis importantes do xornalismo español e galego da súa época.[8] 
De esto y de lo otro, 1930 
Orballo da media noite, 1929 
Busto en Cuntis 

Notas[editar | editar a fonte]

  1. Pedro Blanco Iglesias (ou Pedro Blanco de Crespo) era fillo natural do cacique José Crespo Villar e de María Blanco Iglesias.
  1. "Blanco Torres, Roberto". Diciopedia do século 21 1. Do Cumio, Galaxia e do Castro. 2006. p. 324. ISBN 978-84-8288-942-9. 
  2. Vidal Neira, Antonio: "El humanista de Donramiro" Faro de Vigo, 9/6/2013.
  3. Durán, José Antonio et al. (2005). "Blanco Torres, Roberto". Gran Enciclopedia Galega Silverio Cañada. ISBN 84-87804-88-8. 
  4. Vilavedra, D., ed. (1995). Diccionario da Literatura Galega I. Galaxia. pp. 84–85. ISBN 84-8288-019-5. 
  5. 5,0 5,1 Iglesias, Xabier: "Orballo da media noite" 5/10/2013.
  6. 6,0 6,1 Iglesias, Xabier: "De esto y de lo otro" 2/12/2016.
  7. El Compostelano, 4/2/1933, p. 2.
  8. High-contrast-camera-video.svg Fernando López-Acuña López: Galicia letra a letra en YouTube.

Véxase tamén[editar | editar a fonte]

Bibliografía[editar | editar a fonte]

Outros artigos[editar | editar a fonte]

Ligazóns externas[editar | editar a fonte]