Galicia (A Habana)

Para outras páxinas con títulos homónimos véxase: Galicia (homónimos).

Galicia
Instancia de xornal  Título Galicia (es)  Subtítulo Revista semanal ilustrada (es)
Características  Lingua lingua castelá
Implicados  Fundador/a Vicente López Veiga  Director/a Vicente López Veiga
Datas  Fundación / creación 1902  Disolución / destrución 1930  Data de publicación 1902
Localización  Sede A Habana  Lugar de publicación A Habana
Fontes e ligazóns
Wikidata C:Commons

Galicia é o título dun semanario ilustrado que se publicou na Habana entre 1902 e 1930, baixo o subtítulo de Revista semanal ilustrada, se ben este subtítulo foi modificado en numerosas ocasións. En 1905 engadiu á cabeceira o lema: Autonomía regional. Fundouno o rexionalista Vicente López Veiga, natural de Moeche (A Coruña) quen foi o seu primeiro director ata o número 48 do segundo ano, para ser substituído por José Benito Cerdeira, que tamén figura como administrador a partir dese mesmo número. Constantino Horta foi o director de 1906 a 1908.

Características

O primeiro número saíu o 25 de xullo de 1902 e desapareceu o 30 de maio de 1930. A partir de 1911 abandonou o formato grande (40 x 28 cm) e aumentou significativamente o número de páxinas. A lingua utilizada foi maioritariamente o castelán, reservando o galego para algúns textos poéticos, aínda que tamén nalgún en prosa. O 25 de xullo de 1920 publicouse un número extraordinario integramente en galego.

Xa desde os primeiros números contou coa colaboración de Manuel Curros Enríquez, pero a nómina de colaboradores é extensísima e acolle a practicamente todos os escritores da época, como Concepción Arenal, Uxío Carré Aldao, Lamas Carvajal, Manuel Lugrís Freire, Manuel Murguía, Emilia Pardo Bazán, José Pérez Ballesteros, Mercedes Vieito, Eladio Vázquez Ferro etc., ademais de numerosos pseudónimos identificados ou non. Esporadicamente publicou na portada algunha caricatura de Castelao (como acontece no número extraordinario xa citado) e de Ignacio Vidales Tomé.

Nesta revista publicouse o 9 de abril de 1905 a primeira referencia á constitución da Asociación Iniciadora y Protectora de la Academia Gallega, da que actuou como voceiro, sendo unha constante da publicación a vinculación con esta organización, co Centro Gallego de La Habana e coa Sociedad de Beneficencia de Naturales de Galicia. Dedicou un número monográfico á Curros Enríquez con motivo da súa morte, asemade cedeu a bandeira de Galicia que cubría o seu cadaleito no enterro. En 1909, ao formarse o Comité Redencionista da Habana, a revista converteuse no seu voceiro e, en 1912, publicou numerosas colaboracións en apoio do labor do movemento Acción Gallega, de Basilio Álvarez.

Véxase tamén

Bibliografía

• Galicia. Revista semanal ilustrada. Edición facsimilar (anos 1902 a 1905) do Centro Ramón Piñeiro para a Investigación en Humanidades, 2007 e 2008.
• Neira Vilas, Xosé: "Galicia: revista semanal bilingüe", en Gran Enciclopedia Galega Silverio Cañada, s. v. Galicia (2003).
• Neira Vilas, Xosé (2011). A prensa galega de Cuba. Centro Ramón Piñeiro para a Investigación en Humanidades. ISBN 978-84-453-5020-1. 
• Vilavedra, Dolores, ed. (1997). Diccionario da literatura galega. Publicacións periódicas II. Vigo: Editorial Galaxia. ISBN 84-8288-137-X. 

Ligazóns externas

• Galicia. Revista semanal ilustrada (anos 1902-1903). Edición facsimilar do CIRP, 2007.
• Galicia. Revista semanal ilustrada (anos 1904-1905). Edición facsimilar do CIRP, 2008.