Saul Bellow

Saul Bellow (esq.) e Keith Botsford en 1990, na Universidade de Boston.

Saul Bellow, nado o 10 de xuño de 1915 en Lachine, Québec, e finado o 5 de abril de 2005 en Brookline, Massachusetts, foi un escritor norteamericano de orixe xudía. Naceu en Canadá, pero viviu desde pequeno en Estados Unidos. Foi galardoado co Premio Nobel de Literatura en 1976.

Traxectoria

Naceu o 10 de xuño de 1915 en Lachine (Quebec), no seo dunha familia xudía, aos 9 anos a súa familia (de orixe rusa) trasladouse a Chicago. Participou como soldado na II Guerra Mundial, estudou na Universidade de Northwestern e foi profesor da de Chicago. Estivo casado en cinco ocasións. Considéraselle un referente dentro do grupo de escritores norteamericanos de relixión xudía da segunda metade do século XX.

A súa primeira novela, Dangling man (1944), reflicte a ansiedade e a preocupación dun mozo que espera ser mobilizado en tempo de guerra. A esta primeira novela seguiulle The victim (1947). Tras obter unha bolsa da fundación Guggenheim, Bellow viviu durante un tempo en Europa, onde escribiu a maior parte de The Adventures of Augie March (1953). Esta novela, un longo relato libremente estruturado cun heroe propio da picaresca, ofrece un vivo e humorístico retrato da comunidade xudía de Chicago a través dun mozo en busca da súa identidade. A humanidade moderna, ameazada con perder a súa identidade pero aínda non destruída espiritualmente, é o tema das súas obras posteriores, Seize the Day (1956) e Henderson the Rain King (1959). Herzog (1964) e Mr. Sammler's Planet (1970), galardoadas co National Book Award (Premio Nacional do Libro), retratan aos intelectuais xudeus na súa loita contra o malestar espiritoal que os rodea.

Pulitzer e Nobel

Bellow recibiu o Premio Pulitzer en 1976 por Humboldt's Gift (1975) e tres meses máis tarde foi laureado co Premio Nobel de Literatura (1976) pola comprensión e análise sutil que realiza da sociedade contemporánea nos seus traballos. O autor prosegue a súa análise da cultura contemporánea en The Dean's December (1982). Bellow dominou o escenario da ficción americana, en especial o do romance xudeu-americano na posguerra. O seu traballo expresa a ascensión da sensibilidade dos imigrantes xudeus a un lugar de poder e visión na América urbana contemporánea, ben como a angustia moral daqueles que se viron como "sobrevivintes" do Holocausto - como Sammler, heroe de seu libro Mr. Sammler's Planet.

Obras

Ficción

• Dangling Man (1944)
• The Victim (1947)
• The Adventures of Augie March (1953)
• Seize the Day (1956)
• Henderson the Rain King (1959)
• Herzog (1964)
• Mosby's Memoirs (contos que aparecen tamén en Collected Stories) (1968)
• Mr. Sammler's Planet (1970)
• Humboldt's Gift (1975), co que gañou o Pulitzer de 1976
• The Dean's December (1982)
• Him with His Foot in His Mouth (contos que aparecen tamén en Collected Stories) (1984)
• More Die of Heartbreak(1987)
• A Theft (1989)
• The Bellarosa Connection (1989)
• Something to Remember Me By: Three Tales (cos contos A Theft e The Bellarosa Connection) (1991)
• The Actual (1997)
• Ravelstein (2000)
• Collected Stories (2001)

Ensaios

• To Jerusalem and Back (1976)
• It All Adds Up (1994)
• Graven Images (1997)

Véxase tamén

Ligazóns externas

• Site Nobel con dous discursos (un gravado) e biografía.