Praza de Concepción Arenal (Pontevedra)

Na Galipedia, a Wikipedia en galego.

Coordenadas: 42°25′58″N 8°39′00″O / 42.432666666667, -8.6500555555556

Praza de Concepción Arenal
A praza de Concepción Arenal en 2023
Tipoloxíapraza
Dimensións
Lonxitude35 m
Largura55 m
Área2 500 m2
Localización
LocalidadePontevedra
Código postal36002
Construción
Completado1908
Inauguración2006 (reforma)

A Praza de Concepción Arenal é unha praza de principios do século XX situada na cidade de Pontevedra, no límite do barrio da Moureira.

Orixe do nome[editar | editar a fonte]

A praza debe o seu nome á escritora e activista galega Concepción Arenal (1820-1893), que viviu na cidade de Pontevedra, no número 27 da rúa da Oliva entre 1889 e 1890, onde impulsou un prestixioso faladoiro de intelectuais.[1][2]

Historia[editar | editar a fonte]

A praza creouse a partir da construción da próxima ponte da Barca. O 17 de xullo de 1904, o concello de Pontevedra, con motivo da mellora das comunicacións na zona coa próxima apertura desta ponte sobre o río Lérez e a ría de Pontevedra, propuxo a creación dunha praza na confluencia das rúas Afonso XIII e Ferreiros, en terreos cedidos por José Riestra López, Marqués de Riestra.[3][4]

A praza atopábase nun espazo en expansión da cidade xa que á construción da próxima ponte sumouse a construción do novo cuartel de San Fernando entre 1905 e 1909, cuxa longa fachada lateral na rúa Xeneral Martitegui daba paso cara á nova praza desde a praza de España.[5][6][7][8][1]

As obras da praza finalizaron en 1908, do que deu conta o pleno municipal nunha sesión celebrada o 17 de marzo de 1908, na que se aprobou a denominación de Concepción Arenal para a nova praza.[3]

A praza de Concepción Arenal reformouse na súa totalidade no século XXI, converténdose en semipeonil e configurándose ao redor dunha glorieta central. As obras empezaron en 2005 e concluíron en 2006, sendo reaberta a un tráfico restrinxido o 27 de abril de 2006.[9][10]

Descrición[editar | editar a fonte]

A praza, de 2.500 m², ten forma circular irregular e nela conflúen as seis rúas de Afonso XIII, da Barca, Xeneral Martitegui, Ferreiros, Condesa de Pardo Bazán e Jofre de Tenorio.[3][9]

A praza é semipeonil e está configurada cun deseño circular con varios círculos concéntricos no pavimento, cuxo punto central é unha glorieta peonil atravesada por varios camiños, con cinco columnas de proxectores de iluminación, céspede e arboledo.[11][12] Ao redor desta glorieta disponse un único carril circular para vehículos con limitación de velocidade de 20 km/h e que distribúe o limitado tráfico das rúas contiguas.[13] A praza está pavimentada con lastros de cor sepia delimitados por franxas de granito circulares e horizontais que estruturan o deseño. No lado leste da praza sitúase nun nivel máis elevado unha ampla plataforma de granito que actúa como outra pequena praza dentro da praza e que dispón de bancos. Está enmarcada por muros de granito e ofrece no seu lado oeste unha especie de pequeno miradoiro sobre a glorieta, en cuxo muro de peche frontal atópase unha inscrición que lembra á escritora á que está dedicada a praza: "Concepción Arenal 1820-1893. Abride escolas e han pechar os cárceres".[14]

A praza de Concepción Arenal conta con varias árbores: un pradairo xaponés e vexetación na glorieta central e un pradairo vermello e dous pradairos prateados nun extremo da praza empedrada no lado leste.[15]

A praza está rodeada por edificios modernos dunha media de seis e sete alturas, estando dominada na súa parte sur polo Edificio do Colexio Froebel (inicialmente Escolas Froebel).[16] Este edificio cuxa construción se aprobou en 1910, previa adquisición dun soar ao Marqués de Riestra, foi proxectado en 1914 e dedicado ao novo sistema pedagóxico Froebel. As súas obras empezaron en 1924 e finalizaron en 1936. Ten dous pisos e soto e torreóns nos ángulos. Anticipa formas racionalistas e presenta multitude de grandes fiestras simétricas resaltadas en vertical que proporcionan moita luz ás aulas. No interior o edificio ten un gran patio acristalado con soportais perimetrais.[17]

Galería de imaxes[editar | editar a fonte]

  • A praza de Concepción Arenal co edificio do Colexio Froebel á dereita
    A praza de Concepción Arenal co edificio do Colexio Froebel á dereita
  • A praza coa inscrición dedicada a Concepción Arenal
    A praza coa inscrición dedicada a Concepción Arenal
  • Edificio do Colexio Froebel
    Edificio do Colexio Froebel

Notas[editar | editar a fonte]

  1. ↑ 1,0 1,1 "La vida de Concepción Arenal en Pontevedra". Faro (en castelán). 10 de marzo de 2013. 
  2. ↑ "Cuando Concepción Arenal vivió en Pontevedra". Diario de Pontevedra (en castelán). 1 de decembro de 2019. 
  3. ↑ 3,0 3,1 3,2 Juega Puig 2000, p. 72.
  4. ↑ "Ruta por la Galicia de Concepción Arenal". La Voz de Galicia (en castelán). 27 de febreiro de 2020. 
  5. ↑ "En febrero empezarán las obras de cantería del cuartel de San Fernando". El Diario de Pontevedra (en castelán). 3 de novembro de 1905. 
  6. ↑ "Bonifacio Menéndez Conde inspeccionará las obras del nuevo cuartel". El Diario de Pontevedra (en castelán). 10 de outubro de 1908. 
  7. ↑ "Ingenieros militares supervisan las obras de San Fernando". El Diario de Pontevedra (en castelán). 14 de outubro de 1908. 
  8. ↑ "Finalizadas las obras del nuevo cuartel de San Fernando". El Diario de Pontevedra (en castelán). 23 de marzo de 1909. 
  9. ↑ 9,0 9,1 "La plaza de Concepción Arenal se reabre hoy al tráfico con importantes cambios circulatorios". La Voz de Galicia (en castelán). 27 de abril de 2006. 
  10. ↑ "Pedrosa critica el diseño de la plaza Concepción Arenal". El Correo Gallego (en castelán). 15 de maio de 2006. 
  11. ↑ "Nuevo diseño para la plaza de Concepción Arenal". Faro (en castelán). 29 de outubro de 2005. 
  12. ↑ "Deciden acondicionar la glorieta de Eduardo Pondal tras 7 años con la rotonda de plástico". Faro (en castelán). 29 de marzo de 2007. 
  13. ↑ "El diseño de Concepción Arenal admite todos los sentidos de tráfico". La Voz de Galicia (en castelán). 26 de xaneiro de 2006. 
  14. ↑ "El inicio del asfaltado, programado para mañana". Faro (en castelán). 11 de abril de 2006. 
  15. ↑ Blanco Dios & Castro González 2010, p. 41,44,45.
  16. ↑ "Plaza de España, Concepción Arenal y calles aledañas". La Voz de Galicia (en castelán). 13 de novembro de 2004. 
  17. ↑ Fontoira Surís 2009, p. 423.

Véxase tamén[editar | editar a fonte]

Bibliografía[editar | editar a fonte]

  • Blanco Dios, Jaime Bernardo; Castro González, Amancio (2010). As árbores da cidade de Pontevedra. Pontevedra: Concello de Pontevedra. p. 41; 44-45. ISBN 978-84-606-5147-5. 
  • Fontoira Surís, Rafael (2009). Pontevedra monumental. Pontevedra: Deputación de Pontevedra. p. 423. ISBN 9788484573272. 
  • Juega Puig, Juan (2000). As rúas de Pontevedra. Pontevedra: Diputación de Pontevedra. p. 71-72. ISBN 84-8457-044-4. 

Outros artigos[editar | editar a fonte]

Traído desde «https://gl.wikipedia.org/w/index.php?title=Praza_de_Concepción_Arenal_(Pontevedra)&oldid=6664502»