Ría de Pontevedra

Na Galipedia, a Wikipedia en galego.
Ría de Pontevedra en Bueu.
Marín e a ría de Pontevedra.

A ría de Pontevedra é unha entrada de mar situada na provincia de Pontevedra, bañada polo océano Atlántico. É unha das tres principais das rías Baixas galegas, sendo a zona máis turística da comunidade.[Cómpre referencia] Ademais tamén é a máis regular delas e terceira máis grande de todas as de Galicia, con 145 km² de superficie. Conta cun volume aproximado de 3.937 hm³.

Nela está a illa de Tambo, e xa na súa saída as illas Ons. Unha das principais características da ría é a cantidade de bateas que existen.

Situación[editar | editar a fonte]

É a segunda ría das tres deste conxunto. Ao sur da ría está a península do Morrazo; ao norte a comarca do Salnés; ao oeste o océano Atlántico e as illas Ons; e ao leste, ao fondo da ría, a cidade de Pontevedra e a súa comarca.

O curso fluvial que máis auga verte a esta ría é o río Lérez, cunha media anual de 432 hm³. A media de precipitacións anuais son 1.500 mm.

Turismo[editar | editar a fonte]

Vista aérea.

Esta ría é moi turística, unha das zonas máis turísticas de Galiza, e nela están os municipios de Marín, coa súa Escola Naval Militar, a moi turística Sanxenxo, Bueu, Pontevedra ou Poio, e localidades como Portonovo ou Combarro, cos seus típicos hórreos (canastros).

Nas súas augas pódese practicar a vela e a navegación con seguridade, destacando entre as instalacións destinadas ao efecto o Real Club Náutico de Sanxenxo. Desde aquí partiu a última Volvo Ocean's Race.

Ademais hai moitas praias tanto na súa zona norte, como na sur, como as de Bueu, Aguete, Silgar, Mogor, Lourido ou Maxor.

Outro punto de atracción é a presenza das illas Ons, pertencentes a Bueu e integradas no Parque nacional das Illas Atlánticas, ao que se pode acceder en barcos que parten de Sanxenxo, Marín e Bueu. As súas praias son óptimas, ademais de ter unhas atalaias privilexiadas sobre a ría, desde O Grove ata Cabo Home, en Cangas.

A praia da Lanzada non está situada dentro da ría, pero si nas proximidades. É un importante foco turístico.

A media anual das temperaturas das súas augas son 14 °C, aínda que en agosto é duns 20 °C.

Poboación[editar | editar a fonte]

Nos municipios que rodean a ría habitan máis de 150.000 persoas, no verán debido ao turismo pode chegarse ás 200.000. O municipio máis poboado é a capital da provincia, Pontevedra, con máis de 80.000 habitantes, seguíndolle Marín con máis de 26.000 habitantes.

Fauna[editar | editar a fonte]

A fauna da Ría de Pontevedra é moi rica. Hai moitas especies de interese gastronómico, como o marisco, grazas a elas traballan algúns dos habitantes da ría.

Medio ambiente[editar | editar a fonte]

A ría sofre agresións medioambientais por varios focos industriais e pola presenza de portos. Así, os vertidos da factoría da papeleira de Pontevedra da empresa ENCE, ou recheos do porto de Marín, contribúen á contaminación directa sobre a ría. Por esta razón, en 1987 formouse a Asociación Pola Defensa da Ría, que busca a recuperación da marisma de Lourizán como banco marisqueiro e a limpeza e o coidado da ría en xeral.

Galería de imaxes[editar | editar a fonte]

Ría de Pontevedra.  
Papeleira de Pontevedra.  
Praia de Aguete en Marín.