O Fiel contraste

Na Galipedia, a Wikipedia en galego.

Coordenadas: 42°25′56″N 8°38′48″O / 42.432111111111, -8.6466666666667

O Fiel Contraste
A escultura detrás da casa consistorial
Presentación
LocalizaciónPontevedra
DirecciónRúa da Alhóndiga
EstruturaBronce
EstiloEscultura conmemorativa
TipoEstatua
Construción
Data da construción2010
Remate30 de abril de 2010
Dimensións
Altura1,93 m
Equipo
EscultorRamón Conde

O Fiel contraste é un grupo escultórico creado polo escultor Ramón Conde, situado en Pontevedra. Atópase na rúa da Alhóndiga, detrás da Casa Consistorial de Pontevedra, e foi inaugurado o 30 de abril de 2010.[1]

Historia[editar | editar a fonte]

O grupo escultórico está situado no lugar onde na Idade Media atopábase a Alfándega ou mercado municipal de cereais. A estatua central lembra ao funcionario medieval (contratado polo concello) que, á entrada das murallas de Pontevedra, xunto á Torre da Bastida, contrastaba fielmente coa súa balanza os pesos e medidas das mercadorías que se ían vender na cidade.[2]

Ata o século XVI, a Alfándega estaba situada onde hoxe atópase a casa do Concello de Pontevedra. Á entrada da Alfándega, o Fiel Contraste encargábase de comprobar os pesos e medidas de todas as mercadorías que chegaban alí para ser vendidas.[3] Da comprobación do peso do pan ou dos cereais ou das medidas do viño dependían os impostos do mercado. A desaparición desta profesión produciuse coa unificación de pesos e medidas que levou a cabo a administración borbónica, coa aparición do sistema métrico decimal e, finalmente, coa inauguración da actual Casa do concello en 1880.

O auxe comercial e pesqueiro de Pontevedra impulsara a celebración de mercados na cidade, destacando a Feira Franca concedida a Pontevedra en 1467 polo rei Henrique IV de Castela, cando a cidade era o principal porto de Galicia.[4]

Descrición[editar | editar a fonte]

O grupo escultórico consta de cinco pezas. A peza central de bronce é o Fiel Contraste, que representa a un home hercúleo (característico da obra de Ramón Conde) e intemporal, co brazo esquerdo estendido sostendo unha balanza na man. A estatua mide 1,93 metros de altura e pesa 300 kg.[5] Os seus marcados trazos denotan poder e autoridade no exercicio da súa función de resolver conflitos sobre o peso exacto dos produtos nas feiras e mercados da cidade.

Ao redor desta estatua central hai catro pezas bidimensionais de aceiro corten en forma de siluetas ou sombras que representan personaxes populares dun mercado urbano medieval, como os vendedores coas súas cestas diante ou os mercadores dun día calquera nun mercado urbano.[6]

O grupo escultórico está valorado en 100.000 euros.[7]

Galería[editar | editar a fonte]

Notas[editar | editar a fonte]

  1. ↑ "El Fiel Contraste volvió a la Alhóndiga". La Voz de Galicia (en castelán). 1 de maio de 2010. 
  2. ↑ "El regreso del «fiel contraste»". La Voz de Galicia (en castelán). 18 de agosto de 2009. 
  3. ↑ "Investigan la rotura de la balanza del Fiel Contraste". Diario de Pontevedra (en castelán). 3 novembro de 2015. 
  4. ↑ "Sin impuestos en la Pontevedra bendecida por Enrique IV". El Mundo (en castelán). 3 de setembro de 2011. 
  5. ↑ "El Fiel Contraste amanece lleno de pintadas". Diario de Pontevedra (en castelán). 3 de xuño de 2018. 
  6. ↑ "Conde deja su huella en Pontevedra con el 'Fiel Contraste'". El Correo Gallego (en castelán). 1 de maio 2010. Arquivado dende o orixinal o 24 de setembro de 2015. Consultado o 30 de outubro de 2022. 
  7. ↑ "El Fiel Contraste amanece lleno de pintadas". Diario de Pontevedra (en castelán). 3 de xuño de 2018. 

Véxase tamén[editar | editar a fonte]

Outros artigos[editar | editar a fonte]

Ligazóns externas[editar | editar a fonte]

Traído desde «https://gl.wikipedia.org/w/index.php?title=O_Fiel_contraste&oldid=6624906»