James Cook

Retrato de Cook por Nathaniel Dance (~1775)

James Cook, nado o 27 de outubro de 1728 e finado o 14 de febreiro de 1779, foi un explorador, navegador e cartógrafo británico. Fixo tres viaxes ao Océano Pacífico, nas cales foron descubertas as súas costas principais. Foi asasinado en Hawai nun combate contra hawaianos, na súa terceira viaxe exploratoria polo Pacífico.

Traxectoria

Cook naceu en Marton, Yorkshire, pero sendo pícaro mudouse xunto coa familia a Great Ayton. Sendo novo desenvolveu unha fascinación polo mar (aprendeu el só cartografía) e viaxou ata Whitby para atopar emprego alá no transporte de hulla.

Durante a Guerra dos Sete Anos serviu na mariña real, participando no sitio de Quebec antes da batalla dos Plains of Abraham en 1759. Demostrou talento no recoñecemento de lugares e en cartografía e foi responsábel do levantamento de planos da entrada do Río Saint Lawrence durante o asedio. O seu dominio no recoñecemento serviu durante a década de 1760 para o levantamento de planos da enrevesada costa de Terra Nova, o que o puxo no punto de mira da Royal Society.

En 1768, no navío HMS Endeavour, foi o comandante escollido para levar os membros da Royal Society ao Tahití, para observar o tránsito de Venus, na primeira expedición científica polo Pacífico. Despois do éxito da expedición científica, Cook proseguiu con obxectivos de exploración. Durante a viaxe, descubriu o arquipélago que bautiza de Illas da Sociedade, na Polinesia francesa, e cartografou toda a Nova Celandia. No regreso, descubriu a costa occidental da Australia.

En 1772, Cook partiu para nova circunnavegación ao comando das naus Resolution e Adventure. Durante esta viaxe chegou á máis baixa latitude ao sur alcanzada até entón (70°10''S), cruzando pola primeira vez o círculo Polar Antártico. Esta viaxe resultou na descuberta das Illas Cook.

Réplica do HMS Endeavour.

En 1776, cos navíos Resolution e Discovery, partiu para o que sería a súa última misión e descubriu o arquipélago do Hawai, que chamou de Sandwich. Costeou a América e atravesou o estreito de Bering, chegando ao Ártico. No regreso ao Hawai, Cook morreu nun enfrontamento con nativos.

A distinción de Cook e a súa grande habilidade poden ser atribuídas á combinación da excelente arte no mar, a súa superior capacidade de recoñecemento e soltura no levantamento de planos, coraxe na exploración de lugares perigosos para confirmar os datos (por exemplo: baixou numerosas veces até o círculo polar antártico e explorou a Gran Barreira) e o seu sangue frío xunto coa procura das cadencias nas súas exploracións e o ir máis aló das instrucións dadas dende o Almirantado.

Cook ficou coñecido pola preocupación coa saúde e a alimentación da súa tripulación. Na súa primeira viaxe, ningún membro da tripulación morreu de escorbuto, doenza causada pola falta de ácido ascórbico no organismo e responsábel da morte de moitos mariñeiros até o século XVIII. É considerado o pai da Oceanía.

As rutas do capitán James Cook. A primeira viaxe en cor vermello, a segunda viaxe en cor verde e a terceira viaxe en azul. A ruta da tripulación de Cook seguida despois da súa morte en liña descontinua en azul.