Casa das Campás
Coordenadas: 42°25′57″N 08°38′47″O / 42.43250, -8.64639
A Casa das Campás é unha das tres construcións máis antigas que se conservan da cidade de Pontevedra, e posiblemente a máis vella das civís. Localízase na rúa Don Filiberto, 11, no casco histórico.
Historia
Debida á falta de documentación, as súas orixes non están claras, pero suponse que pertence á Época Baixomedieval polos escudos que se atopan na fachada e o estilo das portas. Estes escudos relaciónana coa liñaxe dos García Camba ou máis probabelmente coa dos Puga, señores de Regodeigón en Ribadavia.
A primeira referencia existente das Casa das Campás é do ano 1587. Daquela, a edificación estaba preto da igrexa de San Bartolomeu o Vello, que por razóns que se descoñecen non tiña campá. Por esta razón, para chamar ós fregueses usábase o carillón da casa dos Puga, que por aquel entón xa pasara a mans dos monxes beneditinos do mosteiro de San Salvador de Lérez. Os monxes tamén empregaron a Casa das Campás como adega de viño, na que podían chegar a almacenar uns 12.000 litros.
Máis adiante, nos anos da posguerra, a casa foi coñecida como "Bar Pitillo" porque no baixo había un establecemento no que se obsequiaba ós clientes con tabaco. Na década de 1980 a edificación ficou en estado de abandono ata que foi adquirida polo concello no ano 2000 coa finalidade de restaurala. Actualmente é a sede da Vicerreitoría da Universidade de Vigo.
Lenda
Durante os séculos XIX e XX corría o rumor de que na casa estaba escondido o tesouro de Benito Soto, o pirata pontevedrés.
Véxase tamén
Ligazóns externas
- Páxina da Vicerreitoría do Campus de Pontevedra, na Casa das Campás
- Casa das Campás na páxina web colaborativa Patrimonio Galego.
- Ficha da Casa das Campás no Catálogo do Conxunto Histórico Artístico de Pontevedra (ficha 4-50-15)