Manuel Simón Campos

Na Galipedia, a Wikipedia en galego.
Manuel Simón Campos
Nacemento1914
Lugar de nacementoLavadores
Falecemento21 de maio de 1947
Lugar de falecementoLavadores
NacionalidadeEspaña
Ocupaciónmembro da resistencia
editar datos en Wikidata ]

Manuel Simón Campos, coñecido como Xanote e Luis Peña, nado en Lavadores en 1914 e finado o 21 de maio de 1947, foi un guerrilleiro antifranquista galego.

Traxectoria[editar | editar a fonte]

Foi repartidor de peixe no peirao do Berbés e militante do PCE. Mobilizado en 1936, desertou para estar coa súa muller e o seu fillo acabado de nacer, e permaneceu agochado. En 1938 integrouse no grupo de Rogelio García Morales O Maletas. En 1939 presentouse ao chamamento do Gobernador civil de Pontevedra Manuel Gómez Cantos, que prometeu unha amnistía, e pola súa condición de desertor foi obrigado a repetir o tempo do servizo militar. Destinado a un Rexemento con gornición en Zaragoza, aproveitando un permiso fuxiu de forma definitiva a mediados de 1941.

En 1943 contactou co PCE que pretendía organizar a guerrilla no sur da provincia de Pontevedra. En abril de 1943 foi procesado por roubo e asasinato do veciño de Petelos Fructuoso Costas Giráldez (o garda cívico que rematou a Manuel González Fresco), con José García Morales, Ramón Pereira Antelo, José Luís Quintas Figueroa e Abraham Lloriente Sánchez.[1] En 1946 creou o destacamento Paco Barreiro integrado na V Agrupación do Exército Guerrilleiro de Galicia con Avelino Otero Montes como lugartenente. No grupo integráronse os fuxidos pola represión policial Basilio Calvar Solla, Agustín Álvarez Araujo e Claudio Rodríguez Vázquez. Foi acusado co seu lugartenente Avelino Otero da morte do falanxista de Cabral Eusebio Lago Campos acontecida o 30 de xaneiro de 1947.[2] Morreu o 21 de maio de 1947 nun enfrontamento coa Garda civil preto de Lavadores. Con el faleceu Avelino Otero Montes. Foron detidos Ramón Villar Paz e Eladio Covelo Álvarez.

Notas[editar | editar a fonte]

  1. Requisitoria, El Pueblo Gallego, 17-4-1943, p. 2.
  2. El Pueblo Gallego, 9-4-1947, p. 4.

Véxase tamén[editar | editar a fonte]

Bibliografía[editar | editar a fonte]

  • Abad Gallego, Xoán Carlos (2005). Héroes o forajidos. "Fuxidos" y guerrilleiros antifranquistas en la comarca de Vigo. Vigo: Instituto de Estudios Vigueses. ISBN 84-89599-33-5. 
  • Redondo Abal, Francisco Xavier (2006). Botarse ao monte. Censo de guerrilleiros antifranquistas na Galiza (1939-1965). Sada: Do Castro. p. 130. ISBN 84-8485-231-8. 

Ligazóns externas[editar | editar a fonte]