Borja Jiménez

Borja Jiménez

Biografía
Nacemento	21 de xaneiro de 1985 (40 anos) Ávila, España
Actividade
Ocupación	adestrador de fútbol
Deporte	fútbol
Traxectoria   Adestrador 2013–2014 Real Ávila CF (en) 2015–2016 Real Valladolid Club de Fútbol B 2016–2017 Club Deportivo Izarra 2017–2018   Rápido de Bouzas 2018–2019   Club Deportivo Mirandés 2019–2019 Asteras Tripolis F.C. 2019–2020 FC Cartagena 2021–2022   Deportivo da Coruña 2023–2025   Club Deportivo Leganés 2025–   Sporting de Gijón

Borja Jiménez Sáez, nado en Ávila o 21 de xaneiro de 1985, é un adestrador de fútbol español, que dende outubro de 2025 adestra o Sporting de Gijón, da Segunda División. Conta con tres ascensos no seu palmarés, dous deles á Segunda División (con Mirandés e FC Cartagena) e un á Primeira División (co Leganés).

Traxectoria

Comezos

Tivo unha breve carreira como futbolista, militando no Real Ávila e no CD Colegios Diocesanos. Como adestrador comezou no fútbol base do Real Ávila, pasando logo pola Milan Academy, a escola de fútbol do AC Milan na cidade abulense, e o Casa Social.

Real Ávila

En 2011 regresou ao Real Ávila, onde exerceu como segundo adestrador de José Luis Diezma e de Kiko, así como de director da canteira. En outubro de 2013, con 28 anos, púxose á fronte do primeiro equipo en Terceira división tras a destitución de Kiko. Conseguiu meterse na promoción de ascenso a Segunda B, onde caeu eliminado fronte ao AD Mérida.

Valladolid Promesas

Tras a súa dimisión en novembro de 2014, adestrou nas categorías inferiores do Real Valladolid, e na tempada 2015/16 colleu as rendas do filial, o Valladolid Promesas, na xornada 10 da Segunda División B, substituíndo ao vigués Rubén Albés. Dirixiu o equipo ata o final da tempada, logrando a permanencia. Na seguinte campaña adestrou o CD Izarra, ascendido a Segunda B un ano antes, e conseguiu manter a categoría, rematando no 13º posto.

Rápido de Bouzas

Na tempada 2016/17 converteuse no novo adestrador do Rápido de Bouzas, que acababa de ascender por primeira vez á Segunda B na tempada anterior, comandado por Patxi Salinas. Con Jiménez no banco o equipo vigués realizou unha grande estrea na categoría, asinando a mellor tempada da súa historia ao rematar na quinta praza, a só dous puntos de disputar a promoción a Segunda.

Mirandés

En xuño de 2018, o CD Mirandés e Borja Jiménez chegaron a un acordo para a tempada 2018/19. Co equipo de Miranda de Ebro rematou terceiro do seu grupo de 2ªB, clasificándose para a promoción de ascenso. Nesta, eliminou sucesivamente ao Atlético de Madrid B, ao Recreativo de Huelva e ao Atlético Baleares, logrando así o segundo ascenso á categoría de prata na historia do club. Ademais, nesa mesma tempada, o Mirandés conseguiu gañar a Copa Federación por primeira vez na súa historia.

Asteras Tripolis

En xullo de 2019 adestrou por primeira vez no estranxeiro, asinando contrato co Asteras Tripolis da Superliga de Grecia, unha experiencia que durou só 5 meses, xa que tras un total de tres vitorias en doce encontros, foi destituído o 5 de decembro.

FC Cartagena

O 23 de decembro de 2019 anunciouse a súa fichaxe polo FC Cartagena, que ostentaba o liderado do grupo IV da Segunda B, tras 19 xornadas. Chegou a Cartaxena para substituír a Gustavo Munúa, que deixou o equipo para aceptar unha oferta do Nacional de Montevideo. Con Jiménez como adestrador o equipo cartaxinés proclamouse campión do seu grupo, despois de que a tempada acabase antes de tempo por mor da pandemia de COVID-19, e xogou a promoción de ascenso. Accedeu pola ruta de campións de grupo, tendo así unha dobre oportunidade, e enfrontouse na primeira delas ao Atlético Baleares. O partido acabou con empate a cero goles, ao igual que a prórroga, polo que o partido se decidiu na quenda de penaltis, logrando o ascenso o Cartagena despois de que Pablo Caballero transformase o cuarto e definitivo penalti. Comezou a tempada na Segunda División con bos resultados, pero máis tarde encadeou unha mala xeira de encontros, con só unha vitoria en nove partidos, sendo destituído en decembro.

Deportivo da Coruña

O 26 de maio de 2021 foi anunciado como novo adestrador do Deportivo da Coruña para a tempada 2021/22 na Primeira RFEF, relevando no cargo a Rubén de la Barrera. Na súa primeira tempada acabou segundo, só por detrás do Racing de Santander, e disputou así a promoción de ascenso a Segunda, onde eliminou en semifinais ao Linares por 4-0, enfrontándose na final en Riazor ao Albacete de Rubén de la Barrera. O Deportivo adiantouse na primeira parte cun gol de Mario Soriano pero Alberto Jiménez empatou na segunda metade, enviando o encontro á prórroga. Ao equipo de Borja Jiménez bastáballe co empate para ascender, pero Jordi Sánchez anotou para o Albacete preto do final, deixando o equipo galego outro ano máis na categoría de bronce.

Confirmado pola directiva para unha segunda tempada na Coruña, recibiu críticas dende as primeiras xornadas, debido ao pobre xogo do equipo. Finalmente foi destituído o 11 de outubro de 2022, despois de colleitar tres vitorias, tres empates e unha derrota en sete xornadas, e co equipo situado na zona de promoción pero a sete puntos do líder, o Racing de Ferrol.

Leganés

En xuño de 2023 foi presentado como novo adestrador do Leganés, da Segunda División. No equipo madrileño dirixiu un equipo cuxo núcleo estaba formado por xogadores como Diego Conde, Franquesa, Sergio González, Neyou, Jorge Sáenz, Raba, Diego García ou Miguel de la Fuente, cos que liderou a táboa durante case toda a competición. Finalmente proclamouse campión da categoría, logrando así o segundo ascenso á Primeira División na historia do club.

Continuou á fronte do equipo na tempada 2024/25, na que o equipo se mantivo fóra dos postos de descenso durante a meirande parte da competición, ata que os seus pobres resultados o fixeron caer ata a 18ª posición trala xornada 28. As tres vitorias que conseguiu nas catro últimas xornadas non foron suficientes para salvar o equipo, que acabou descendendo con 40 puntos, un menos que o 17º clasificado, o Sevilla de Joaquín Caparrós. Tralo descenso, o seu contrato non foi renovado e deixou o club.

Sporting de Gijón

O 8 de outubro de 2025 foi anunciado como novo adestrador do Sporting de Gijón, trala destitución de Asier Garitano, que deixou o equipo na 14ª posición da Segunda División.

Palmarés

Mirandés

• Copa Federación (1): 2018/19.

FC Cartagena

• Segunda División B (1): 2019/20.

Leganés

• Segunda División (1): 2023/24.

Véxase tamén

Ligazóns externas

• Datos do adestrador en Transfermarkt (en castelán).
• Datos do adestrador en BDFutbol (en castelán).
• Entrevista a Borja Jiménez en Fútbol de Banquillo (en castelán).