Rodrigo García Vizoso

Na Galipedia, a Wikipedia en galego.
Saltar para a navegação Saltar para a pesquisa
Vizoso
Información persoal
Nome completoRodrigo García Vizoso
Nacemento26 de febreiro de 1909
LugarA Coruña, Galicia
Falecemento2 de xuño de 2009 (100 anos)
LugarA Coruña, Galicia
PosiciónPorteiro
Carreira sénior
AnosEquiposAprs(Gls)
1928–1934Deportivo da Coruña
1934–1935Real Madrid0(0)
?–?Granada
Adestrador
1955–1956Deportivo da Coruña
1964–1965Deportivo da Coruña
* Partidos e goles só en liga doméstica.
† Aparicións (Goles)

Rodrigo García Vizoso, nado na Coruña o 26 de febreiro de 1909 e finado na mesma cidade o 2 de xuño de 2009, foi un futbolista e adestrador de fútbol galego. Xogaba de gardameta.

Traxectoria[editar | editar a fonte]

Nado na coruñesa rúa de Fuente Luisa -agora chamada Agudín Bolivar- en 1909, foi un dos vinte e dous xogadores que estreou a Segunda división española de fútbol defendendo a portería do RC Deportivo da Coruña no ano da súa estrea, 1929, contra o Deportivo Alavés.[1]

Desde aquela teceu unha carreira que o levou ser considerado durante anos o máximo referente do club coruñés. A súa lenda foi cimentada en proezas como a que serviu para que, tres anos despois, o Deportivo, aínda na segunda categoría, eliminara da Copa do Rei ao Real Madrid CF en Chamartín unha tarde na que o conxunto branco tirara 76 veces á porta que gardaba Rodrigo.[1]

En 1934 o propio Real Madrid CF contrataría os servizos de Rodrigo, onde habería pasar a tempada como suplente de Ricardo Zamora. Posteriormente fichou polo Granada CF, cun salario de 500 pesetas ao mes.[1]

A guerra civil española levouno pasar 34 meses no exército e após da contenda decidiu colgar as luvas para volver á Coruña, onde atopou traballo na Fábrica de Armas, onde fundaría un equipo de fútbol co nome da empresa e que anos máis tarde se deu en chamar Deportivo Xuvenil[2], xermolo do actual Deportivo da Coruña B Rodrigo sería un dos descubridores do talento de Luis Suárez, daquela eran ámbolos dous veciños do barrio de Monte Alto.[1]

Volveu ao Deportivo nos anos 50, xa como adestrador, establecendo novas marcas históricas, como ser o primeiro técnico deportivista en facer gañar ao seu equipo en Chamartín ou o primeiro tamén en erguer o Trofeo Teresa Herrera.[1] O club herculino recorreu moitas veces aos seus servizos xa que cando un técnico era despedido Rodrigo sempre estaba diposto para o substituír e así adestrou xuvenís, Fabril e primeiro equipo, baixo as súas ordes estiveron grandes nomes do fútbol galego e español como Arsenio Iglesias ou Amancio Amaro.[2]

Chegou acadar os cen anos de idade e, como homenaxe polo seu centenario, realizou o saque de honra en Riazor nun dos últimos partidos do Deportivo en competición oficial europea. Falecería poucos meses despois. Como tributo, o Concello da Coruña decidiu mudar o nome do Campo Municipal de Fútbol A Grela II polo de Rodrigo García Vizoso así como colocar un busto coa súa imaxe na Cidade Deportiva Municipal da Torre.

Notas[editar | editar a fonte]

  1. 1,0 1,1 1,2 1,3 1,4 Juan L. Cudeiro. El País (3 de xuño de 2009). "Necrológica: Rodrigo García Vizoso, el último de la primera Liga". Consultado o 31-03-2016. 
  2. 2,0 2,1 Pepe Guillín. Revista RCD. "RODRIGO GARCÍA VIZOSO, un centenario ex jugador del Deportivo" (PDF). Consultado o 31-03-2016. 

Véxase tamén[editar | editar a fonte]

Ligazóns externas[editar | editar a fonte]