Homosexualidade
Na Galipedia, a wikipedia en galego.
A homosexualidade defínese como a atracción sexual e romántica entre dous individuos do mesmo sexo. Dende que a palabra fora acuñada, no 1869, por Karl-Maria Kertbeny, influenciou o desenvolvemento do concepto moderno de orientación sexual, engadindo as asociacions de amor romántico e identidade ao seu significado orixinal, sempre relacionado co eido sexual.
A homosexualidade contrástase moitas veces coa heterosexualidade e a bisexualidade. O termo gai úsase para se referir aos homes homosexuais. A palabra lesbiana é un termo específico que só se usa para definir ás mulleres homosexuais. O adxectivo homosexual úsase tamén para as relacións entre persoas do mesmo sexo que non son gais ou lesbianas.
[editar] Lexislación
Na maioría dos países desenvolvidos, as relacións homosexuais acéptanse e teñen protección legal, algúns estados estableceron estruturas formais para confirmar as relacións legais, denominadas unión civil, sociedade ou simplemnte matrimonio. Non obstante en moitos países as relacións homosexuais non se aceptan socialmente por razóns culturais ou relixiosas e mesmo existen leis de sodomía que prohibe a actividade homosexual con diversas penas, así teñen pena de morte en Arabia Saudí, Emiratos Árabes Unidos, Iemen, Irán, Mauritania, Sudán e algunhas rexións de Nixeria e Somalia. Cadea perpetua en Barbados, Bangladesh, Güiana, India, Maldivas, Myanmar, Paquistán, Qatar, Serra Leoa, Tanzania e Uganda.
Os Países Baixos foron o primeiro estado en recoñecer o matrimonio homosexual, seguíronlle Bélxica, Canadá, España e Sudáfrica.
A unión civil entre parellas do mesmo sexo rexe en Alemaña, Andorra, Chequia, Colombia, Croacia, Dinamarca, Eslovenia, Finlandia, Francia, Hungría, Islandia, Israel, Luxemburgo, Noruega, Nova Celandia, Portugal, Reino Unido, Suecia, Suíza e o Uruguai, tamén nalgunhas rexións da Arxentina, Australia, Brasil, os Estados Unidos e México.
