Gran Premio da Coruña de Automobilismo
| Gran Premio da Coruña de Automobilismo | |
|---|---|
| Fundación | 1966 |
| Rexión | A Coruña |
| Máis laureado |  José Lampreia (2) |
| Organizador | Escudería Centollo |
O Gran Premio da Coruña de Automobilismo foi unha competición automobilística disputada durante os anos 60 e 70 no Circuíto de Riazor, na Coruña. Foi puntuable para varios campionatos nacionais.
Historia[editar | editar a fonte]
Dende 1950 viña disputándose no Circuíto de Riazor o Gran Premio da Coruña de Motociclismo, pero non foi ata o 28 de agosto de 1966, cando da man de José Larrea e da Escudería Centollo se disputou no mesmo lugar a primeira edición do Gran Premio da Coruña de Automobilismo, a primeira proba destas características en Galicia.[1] Disputáronse tres carreiras, sendo o vencedor absoluto o coruñés Álvaro Urgoiti, despois de vencer tanto na categoría B (de 951cc a 1600 cc) como na libre (sen limitacións), mentres que Eduardo Villacieros gañou na categoría A (menos de 950cc). Cada unha das carreiras tiña unha duración de 40 minutos, tempo no que os vehículos deron 31 voltas ao circuíto na categoría A e 33 nas dúas restantes.[2] O Gran Premio foi presenciado por uns 30.000 espectadores.[3]
Ao ano seguinte disputouse a segunda edición, sendo esta retransmitida en directo por TVE. O vencedor absoluto foi o portugués José Lampreia, que co seu Lotus 47 obtivo unha media de velocidade de 112 km/h, superando ao francés Bernard Tramont, segundo da xeral e primeiro da categoría B.[4] Na categoría A o gañador foi Félix Serra. Lampreia gañou tamén a terceira edición, en 1968, tras dar 40 voltas ao circuíto cunha velocidade media de 109,33 km/h, superando ao catalán Juan Fernández, que rematou segundo.[5]
En 1969 o evento constou de tras carreiras con 30 voltas cada unha, resultando gañador absoluto José de la Peña, conducindo un Porsche 907, tras vencer na categoría "sport" por diante de Juncosa e Tramont. As outras dúas mangas foron a de turismos e unha carreira monomarca puntuable para a Copa Nacional Renault 8 TS. Na primeira delas impúxose o coruñés Carlos Arrojo cun Fiat Abarth 850 TC coa carrocería dun SEAT 600, por diante de Santiago Salido e Gerardo Van Dulken, ambos con R-8 Gordini. Na Copa Renault 8 TS venceu Salvador Cañellas, seguido de Van Dulken e o vigués "Culebras", que liderou a maior parte da proba ata que se viu superado nas dúas últimas voltas.[6][7] En 1970 a proba de velocidade no circuíto foi incluída dentro da cuarta edición do Rally da Coruña, sendo a proba que pechou a competición. Eladio Doncel chegou a dita proba final cunha vantaxe de poucos segundos sobre Bernard Tramont e Manuel Juncosa. Este último, con Artemi como copiloto e cun Fiat Abarth 2000, foi o máis rápido en Riazor, aínda que a vitoria no rally foi para Doncel.[8][9] Na Copa Renault 8 TS a vitoria foi para "Correcaminos".[10]
En 1971 disputouse a última edición, gañando Bernard Tramont cun Alpine A110 1600, por diante de Rafael Barrios (Alfa Romeo GT-AM) e Jesús Iglesias (SEAT 1430), mentres que Francisco Anet gañou na Copa Renault 8 TS.[11][12]
Palmarés[editar | editar a fonte]
| Ano | Nome | Vencedor | Vehículo |
|---|---|---|---|
| 1966 | I Gran Premio da Coruña |  Álvaro Urgoiti
|
Austin Cooper 1300 |
| 1967 | II Gran Premio da Coruña | José Lampreia
|
Lotus 47 |
| 1968 | III Gran Premio da Coruña | José Lampreia
|
Lotus 47 |
| 1969 | IV Gran Premio da Coruña |  José de la Peña
|
Porsche 907 |
| 1970 | IV Rally da Coruña | Manuel Juncosa
|
Fiat Abarth 2000 |
| 1971 | VI Gran Premio da Coruña |  Bernard Tramont
|
Alpine A110 1600 |
Notas[editar | editar a fonte]
- ↑ "Ante la prueba internacional del domingo en La Coruña". La Voz de Galicia (en castelán). 26 de agosto de 1966. p. 6.
- ↑ "Alvaro Urgoiti, vencedor absoluto de la I Prueba de Velocidad". La Noche (en castelán). 29 de agosto de 1966. p. 6. Consultado o 5 de outubro de 2020.
- ↑ "Alvaro Urgoiti, de la escudería «Centollo», vencedor absoluto del I Premio de la Coruña". La Voz de Galicia (en castelán). 30 de agosto de 1966. p. 9.
- ↑ "Lampreia vencedor del ”II Gra Premio de La Coruña”". La Voz de Galicia (en castelán). 8 de agosto de 1967. p. 7.
- ↑ "El portugués Lampreia, vencedor de ”Premio de La Coruña”". La Voz de Galicia (en castelán). 13 de agosto de 1968. p. 19.
- ↑ "De la Peña, vencedor en el Gran Premio de La Coruña". La Voz de Galicia (en castelán). 5 de agosto de 1969. p. 15.
- ↑ "Clasificacións nacionais de 1969" (PDF). RFEDA (en castelán). Consultado o 5 de outubro de 2020.
- ↑ "Eladio Doncel, de la Escudería Repsol, triunfador". El Pueblo Gallego (en castelán). 11 de agosto de 1970. p. 14. Consultado o 5 de outubro de 2020.
- ↑ "Doncel-Conde, con Porsche, vencieron en el IV Rally de La Coruña". La Voz de Galicia (en castelán). 11 de agosto de 1970. p. 15.
- ↑ "Clasificacións nacionais de 1970" (PDF). RFEDA (en castelán). Consultado o 5 de outubro de 2020.
- ↑ "Tramont triunfó en el Gran Premio de La Coruña". La Voz de Galicia (en castelán). 24 de agosto de 1971. p. 17.
- ↑ "Resultados nacionais de 1970" (PDF). RFEDA (en castelán). Consultado o 5 de outubro de 2020.
Véxase tamén[editar | editar a fonte]
Ligazóns externas[editar | editar a fonte]
- Imaxes en vídeo do IV Gran Premio da CoruñaArquivado 07 de outubro de 2020 en Wayback Machine. no sitio web oficial da Escudería Centollo (en castelán).