Antibiótico

Un antibiótico é unha substancia química que, en baixas concentracións, é capaz de inhibir o crecemento dos microorganismos ou, mesmo, de eliminalos. Polo xeral, os antibióticos actúan sobre bacterias, e algúns tamén sobre rickettsias e aínda sobre certos virus de gran tamaño, ou até sobre células de individuos pluricelulares, animais ou vexetais, provocando alteracións ben da parede celular, ben da membrana plasmática, ben da síntese proteica, ou ben do metabolismo dos ácidos nucleicos etc.

Historia

O primeiro antibiótico que se descubriu foi a penicilina, en 1928. Alexander Fleming estaba cultivando unha bacteria (Staphylococcus aureus) nunha placa de ágar, que estaba contaminada, accidentalmente, por fungos. Logo Fleming advertiu que o medio de cultivo arredor do fungo estaba libre de bacterias. Como traballara xa con anterioridade nas propiedades antibacterianas da lisozima, puido realizar unha interpretación correcta do que viu: que o fungo estaba a segregar algo que inhibía o crecemento da bacteria. Aínda que non puido purificar o material obtido (o anel principal da molécula non era estábel ante os mètodos de purificación que utilizou), informou do descubrimento en publicacións científicas. Dado que o fungo era do xénero Penicillium, denominou o produto penicilina.

Dez anos despois Ernst Chain e Howard Florey lograron obter penicilina en forma pura. Xunto con Fleming conseguiron o premio Nobel de Medicina en 1945.

Clases

Existen diversas clases de antibióticos e antibacterianos sintéticos de uso común na actualidade. Son:

• Aminoglicósidos
• β-lactámicos
  • Carbapenemos
  • Cefalosporinas e cefamicinas
  • β-lactámicos monocíclicos ou monobactámicos
  • Penicilinas
• Estreptograminas
• Fenicoles
• Glicopéptidos
  • Vancomicina
  • Teicoplanina
• Lincosaminas
• Macrólidos
• Oxazolidinonas
• Polimixinas
• Quinolonas
• Sulfamidas
• Tetraciclinas

  Véxase tamén

  Ligazóns externas

  • Resistencia ós antibióticos nos animais (Consumer.es, 30.11.2011)