A Nosa Terra (1977)
- Para outras páxinas con títulos homónimos véxase: A Nosa Terra.
A Nosa Terra foi un xornal en papel, e posteriormente electrónico, que operou en Galicia dende 1977 ata 2011. Encadrado na órbita do nacionalismo, e escrito integramente en galego, foi dirixido por Margarita Ledo, Xosefina López Corral, Afonso Eiré e Manuel Veiga.
Índice |
[editar] Historia
Entre os promotores do proxecto de 1977 estaban Margarita Ledo, que foi a súa primeira directora, os xornalistas Xosé Ramón Pousa, Antón Galocha, Xosé López, Marita Otero, Lois Celeiro; o deseñador gráfico Pepe Barro e o fotógrafo Fernando Bellas. A primeira etapa deste xornal, como diario, durou ata 1980, foi dirixida por Ledo e tivo a súa sede en Santiago de Compostela. Ledo foi substituída en 1980 por Xosefina López Corral e o xornal convertido en semanario. En 1981 a publicación foi condenada por ataques á Constitución e estivo clausurada durante tres meses. Daquela a redacción trasládase a Vigo e reabre co director en funcións, Afonso Eiré, que sería director formal do semanario a partir de 1983[1].
Ao longo dos seus anos recolleu artigos dos mellores e máis destacados xornalistas e escritores galegos (Manuel Rivas, María Xosé Queizán, Carlos Casares, Xosé Antón Gaciño, Xesús González Gómez etcétera) e dos máis destacados humoristas gráficos, como Xaquín Marín ou O Carrabouxo.
O xornal funcionou como diario ata 1981 e a partir de entón como semanario, facendo en total 33 anos. En decembro de 2007 o xornal realizou unha importante reforma deseñística e de contidos[2]: Eiré, o daquela director, ascendía a conselleiro delegado, e as tarefas de dirección xornalística recaían en Manuel Veiga. Asemade, publicábase unha edición electrónica semi-independente, dirixida por Xurxo Salgado, quen porén só aguantaría uns meses na dirección do medio. Os probleas económicos comezaron a sucederse[3] ata que en agosto de 2010 a empresa editora, Promocións Culturais Galegas SA anunciou a suspensión de pagamentos e o peche do semanario en papel. A partir dese momento, e baixo a dirección de César Lorenzo, continuou editándose unha edición electrónica, que pechou definitivamente os seus contidos o 23 de setembro de 2011[4].
[editar] Notas
- ↑ Un consello de administración plural, A Nosa Terra, 3/12/2007.
- ↑ Manuel Veiga dirixirá a nova A Nosa Terra, A Nosa Terra, 3/12/2007.
- ↑ 'A Nosa Terra' se vuelve virtual, OBELLEIRO, P., El País, 1/9/2010.
- ↑ Cento catro anos despois, un novo até logo, A Nosa Terra, 23/9/2011.
[editar] Véxase tamén
[editar] Ligazóns externas
- Anosaterra.org, o xornal electrónico.
