Igrexa de Bunge
| Igrexa de Bunge | |
|---|---|
 | |
| Datos xerais | |
| País |  Suecia |
| Rexión | Gotland  |
| Localización | Bunge |
| Coordenadas | 57°51′13″N 19°01′24″L / 57.85372222, 19.02347222Coordenadas: 57°51′13″N 19°01′24″L / 57.85372222, 19.02347222 |
| Culto | |
| Culto | Igrexa de Suecia |
| Diocese | Diocese de Visby |
| [ editar datos en Wikidata ] | |
A igrexa de Bunge (sueco: Bunge kyrka) é unha igrexa medieval luterana en Bunge, na illa sueca de Gotland, pertencente á diocese de Visby.
Historia[editar | editar a fonte]
Escavacións arqueolóxicas realizadas en 1916 e 1971 descubriron que a presente igrexa, principalmente gótica, foi precedeida por outra de estilo románico do século XII. A súa enorme torre é posterior pero pertencía a ese primeiro edificio.[1] A torre está apoiada por un cantraforte e está construída como unha fortaleza con habitacións fortificadas en tres plantas.[2] A nave e o coro construíronse no século XIV nun estilo gótico clásico típico de Gotland; a nave e alta e espazosa, dividida en dúas partes por esveltas columnas; o coro carece de ábsida; e a parte leste da igrexa remata no seu lugar nunha parede recta adornada con tres fiestras alongadas.[3][4]
A igrexa e o cemiterio están rodeados por un muro que orixinalmente era máis alto e tiña un propósito defensivo. Nel aínda sobreviven catro portas medievais e varias seteiras.[1][3][4] O complexo da igrexa evidentemente tivo un rol defensivo xa que hai marcas de picas e frechas de béstas na robusta porta da torre, que aínda se conserva no seu lugar orixinal.[1][3][4][5][6][7] Ademais, o interior da igrexa está densamente decorado con frescos que representan, entre outras cousas, a cabaleiros loitando.[1][3][4][5] Os frescos e a muralla da igrexa poden datar do curto período de tempo no que Gotland pertenceu á Orde Teutónica. Isto levou a algúns académicos a especular se a igrexa puido ser durante un tempo propiedade da Orde e converteuse nun Ordensburg a pequena escala.[1]
Arquitectura[editar | editar a fonte]
A igrexa é unha das máis grandes do norte de Gotland.[3][4] Como se menciona arriba, amosa unha mestura entre estilo románico (torre) e gótico (nave e coro). A igrexa ten un portal sur finamente tallado, rico en esculturas, e un portal norte con detalles románicos, posiblemente tamén incorporado do anterior edificio.[3][4]
A característica máis distintiva do interior son as ricas pinturas das paredes, con frescos executados por un mestre pintor probablemente de Prusia ou Bohemia.[1] Estes son de finais do século XIV ou principios do século XV e representan distintos temas cristiáns, como o Xuízo Final, a crucifixión de Xesús, algúns apóstolos ou lendas de santos.[1][3][4] En canto aos cabaleiros mencionados anteriormente, os académicos teñen diferentes teorías sobre o que representan. Unha di que son Cabaleiros Teutóns,[1] outra afirma que é unha representación da batalla de Visby,[6] mentres que outras cren que son, en relación con outras pinturas, unha representación do tema cristián do martirio da Lexión Tebana.[1][3] A igrexa conserva unha única vidreira, unha pía bautismal do século XIII e unha rareza: un cepillo de esmolas de pedra asinado con runas por un canteiro: Lafrans fixo esta pedra.[3][4]
Galería de imaxes[editar | editar a fonte]
-
Vista dende o norte -
Portal sur da nave -
Unha das portas da muralla -
Frescos do interior
Notas[editar | editar a fonte]
- ↑ 1,0 1,1 1,2 1,3 1,4 1,5 1,6 1,7 1,8 Andrén, Anders (2011). Historiska Media, ed. Det medeltida Gotland: en arkeologisk guidebok. Lund. pp. 181–184. ISBN 978-91-85873-83-8.
- ↑ Jonson, Christer (2017). Angels et dragons : Gotland's cultural treasures. Visby: Gotlands Museum. ISBN 9789188036988. OCLC 1077527198.
- ↑ 3,0 3,1 3,2 3,3 3,4 3,5 3,6 3,7 3,8 Lagerlöf, Erland (1973). Rabén & Sjögren, ed. Gotlands kyrkor. Uddevalla. pp. 108–110. ISBN 9129410355.
- ↑ 4,0 4,1 4,2 4,3 4,4 4,5 4,6 4,7 Jonsson, Marita; Lindquist, Sven-Olof (1987). Gotlands fornsal, ed. Vägen till kulturen på Gotland. Visby. pp. 57–58. ISBN 91-971048-1-7.
- ↑ 5,0 5,1 Guteinfo (ed.). "Bunge kyrka". Consultado o 23 de abril de 2018.
- ↑ 6,0 6,1 Guteinfo (ed.). "Vår Gud är oss en väldig borg". Consultado o 23 de abril de 2018.
- ↑ Gotland.net (ed.). "Bunge kyrka". Arquivado dende o orixinal o 24 de abril de 2018. Consultado o 23 de abril de 2018.
