Lois Pereiro

Luis Ángel Sánchez Pereiro
Lois Pereiro aos 20 anos
Nacemento:	16 de febreiro de 1958 Monforte de Lemos, Lugo Galicia
Falecemento:	24 de maio de 1996 A Coruña
Lingua:	galego
Xénero(s):	poesía
Sinatura:

Luis Ángel Sánchez Pereiro, máis coñecido como Lois Pereiro, nado en Monforte de Lemos o 16 de febreiro de 1958 e finado na Coruña o 24 de maio de 1996, foi un escritor e poeta galego. No ano 2011 dedicóuselle o Día das Letras Galegas.

Traxectoria

Naceu en Monforte de Lemos, de familia procedente do Incio. Estudou no colexio dos Escolapios, e comezou a escribir con 15 anos. Tras rematar o COU marchou a Madrid, onde comezou Ciencias Políticas e Socioloxía. Logo dunha estancia en Monforte traballando na empresa familiar, adicada ao vidro, regresou a Madrid para estudar lingua inglesa, francesa e alemá. Alí fundou a revista Loia xunto a Antón Patiño, Manuel Rivas e o seu irmán Xosé Manuel Pereiro.

Cara a 1981 marcha a vivir á Coruña, onde se une á revista La Naval. Neste período entrou en contacto cun grupo de poetas entre os que figuraban Xavier Seoane, Francisco Salinas Portugal ou Xulio Valcárcel, participando en varias antoloxías coma De amor e desamor (1984) e De amor e desamor II (1985), e colaborando en revistas como La Naval, Trilateral, Anima+l e Luzes de Galiza. Esta última publicaría en 1997 os oito capítulos da novela curta Náufragos do Paradiso.

En 1983 e 1987 viaxou canda Fernando Saco por Europa. Traballou como tradutor do alemán, francés e inglés de dobraxe de cinema e, sobre todo, de televisión tanto convencional (episodios de Dallas, Kung Fu e a primeira tempada d' Os novos) como porno.

Publicou dous poemarios en vida, Poemas 1981/1991 (1992) e Poesía última de amor e enfermidade (1995). No 1996, ano da súa morte, saíu á luz Poemas para unha Loia, que recolle obras da época madrileña, publicadas na revista Loia, e que inclúe o ensaio Modesta proposición para renunciar a facer xirar a roda hidráulica dunha cíclica historia universal da infamia, publicado no nº 27 de Luzes de Galiza.

Lois Pereiro, caricatura de Ruth Caramés Blanco en Tintadelura.com

Canto das causas da morte de Pereiro, malia estar daquela enfermo de SIDA, foron un cúmulo de doenzas que remataron cunha insuficiencia hepática. Oficialmente e segundo unha sentenza da Audiencia Provincial de Lugo, logo dun preito para que o Estado pagase o enterro, o motivo do seu pasamento foi unha intoxicación por aceite de colza desnaturalizado.

Recoñecemento

Fundación Luis Seoane cun cartel dunha exposición de Lois Pereiro co gallo do Día das Letras Galegas que se lle adicou o ano 2011.

Nos últimos anos, víñase reivindicando a dedicación do día das Letras Galegas a este poeta monfortino. No marco desa campaña sitúase unha reedición da súa obra poética verquida ó castelán, catalán e vasco, xunto cos textos orixinais en galego .

Finalmente, o 26 de xuño de 2010 a RAG publicou a súa decisión de adicarlle o Día das Letras Galegas do 2011. A Academia apreciou:

"Evidentes pegadas expresionistas, referencias á literatura xermánica e certos trazos de contracultura [...] unha imaxe e unha estética que fixeron del un autor de culto. Cartografou coma ninguén o labirinto do mundo contemporáneo conciliando para tal fin o individualismo escéptico coa tradición demoledora do expresionismo centroeuropeo."

En palabras do escritor e membro da RAG Manuel Rivas:

"Adicarlle a Lois o Día das Letras 2011 foi unha decisión valente da Academia, porque é un autor de culto, pero en canto se difunda a súa obra será un autor moi popular"..

Exemplo da súa lírica

Velaquí un parágrafo dun dos seus poemas, epitafio gravado en pedra na súa tumba en Santa Cristina do Viso (O Incio):

"Cuspídeme enriba cando pasedes por diante do lugar onde eu repouse, enviándome unha húmida mensaxe de vida e de furia necesaria". (Lois Pereiro)

Obra

Cartel no concello de Carral en lembranza do Día das Letras Galegas adicado a Lois Pereiro no ano 2011.

Poesía

• Poemas 1981/1991 (1992, Positivas).
• Poesía última de amor e enfermidade (1995, Positivas).
• Poemas para unha Loia (1997, Espiral Maior).
• Antoloxía (2011).
• Modesta proposición e outros ensaios (2011, Xerais).
• Obra poética completa (2011, Xerais).
• Obra completa (edición bilingüe galego-castelán) (2011, Libros del Silencio).
• Collected Poems (obra poética completa en inglés) (2011).

Diarios

• Conversa ultramarina (2010, Positivas)

Narrativa

• Náufragos do Paraíso (2011, Galaxia)

Obras colectivas

• De amor e desamor. I e II (1984, 1985, Edicións do Castro).
• Concurso Nacional de Poesía O Facho (1978-1989) (1990, Edicións do Castro).
• Antoloxía consultada da poesía galega 1976-2000 (2003, Tris Tram).
• Dix-sept poètes galiciens 1975-2000. Dezasete poetas galegos 1975-2000 (2008, Universidade da Coruña).

Predecesor: Uxío Novoneyra

Día das Letras Galegas 2011 Lois Pereiro

Sucesor: Valentín Paz-Andrade

Véxase tamén

Bibliografía

• Patiño, A.: Lois Pereiro. Radiografía do abismo. Espiral Maior Edicións, 2010. ISBN 978-84-92646-43-2.
• Souto, X., Braxe, L., Pereiro, X.M.: Lois Pereiro. Fotobiografía sonora. Ouvirmos, 2010.
• Calvo, J.L., Gegúndez, C.: O negro leite da aurora. Viaxe á xeografía lírica de Lois Pereiro. Toxosoutos, 2011. ISBN 978-84-92792-80-1.
• Calveiro, M.: Lois Pereiro: náufrago do paraíso. Biografía e Antoloxía. Edicións Xerais de Galicia, 2011.
• Fernández Serrano, J.: Lois Pereiro. Breve encontro. Edicións Xerais, 2011.
• Lopo, A.: A palabra exacta. Biografía de Lois Pereiro. Editorial Galaxia, 2011.
• Martínez, I.: Lois Pereiro. Vida e obra. Edicións Xerais de Galicia, 2011.
• Queixas, M.: Lois Pereiro. A urxencia poética dun futuro alleo. Laiovento, 2011.
• Regueira, M.: Lois Pereiro. Unha persecución. 2.0 editora, 2011.

Ligazóns externas

• Web oficial de Lois Pereiro
• Biografía na Real Academia Galega
• Páxina de recursos da CGENDL
• Biografía na Praza das Letras
• Biografía na BVG
• "La poesía bisturí de Lois Pereiro", artigo de Daniel Salgado en El País.
• Poema musicado de Contra a morte o amor que vai comigo
• Lois Pereiro, homenaxe a unha vida e a unha obra páxina web na Xunta de Galicia