Editorial Galaxia

Para outras páxinas con títulos homónimos véxase: Galaxia (homónimos).

Editorial Galaxia

Tipo	Sociedade Anónima
Fundación	25 de xullo de 1950
Localización	Avenida de Madrid, 44 baixo 36204 Vigo Galicia
Fundador	Ramón Otero Pedrayo
Persoas clave	Víctor Freixanes
Industria	Cultural
Páxina web	editorialgalaxia.es

Stand da editorial no CulturGal 2010.

A Editorial Galaxia é unha editora galega fundada en 1950 e radicada en Vigo. O seu director xeral é Víctor Freixanes.

Historia

Rematada a Guerra Civil española apenas se publicaron libros en Galiza e moito menos en galego. A edición, igual que a resistencia política e cultural, desenvolveuse neste período principalmente en América (México, Uruguai, Arxentina), arredor de figuras como Castelao, Manuel Puente, Arturo Cuadrado ou Luís Seoane, auténticos motores da produción editorial no exilio. En 1949 publicouse en Pontevedra a colección de poesía Benito Soto, promovida por Sabino Torres, Manuel Cuña Novás, Emilio Álvarez Negreira e Celso Emilio Ferreiro. Polas mesmas datas saíron os primeiros títulos de Bibliófilos Gallegos, e máis a Editorial Monterrey, da man de Luís Viñas Cortegoso e Xosé María Álvarez Blázquez, orientada maiormente cara á edición de bibliofilia. O proxecto Galaxia consolidouse, de entre todas elas, como o máis estábel e o de máis continuidade, e constituíu a referencia obrigada do rexurdimento da actividade intelectual na Galiza interior.

Caricatura de Ramón Piñeiro

O Partido Galeguista do interior considerou que había que aproveitar as escasas posibilidades que ofrecía o franquismo para desenvolver a lingua e literatura galega e o propio pensamento galeguista, en aberta contradición do galeguismo do exilio, e así o 25 de xullo de 1950 celebrouse no mesón do hotel Compostela, en Compostela, a asemblea fundacional da Editorial Galaxia. Presidida por Ramón Otero Pedrayo, o Patriarca das Letras, e coa presenza de personalidades senlleiras do galeguismo, como Manuel Gómez Román, secretario do Partigo Galeguista. A Editorial Galaxia converteuse no núcleo principal da resistencia cultural e política do galeguismo, obrigado á clandestinidade e ao exilio despois da guerra civil. Francisco Fernández del Riego, Xaime Isla Couto e Ramón Piñeiro foron as tres personalidades que desde o primeiro momento orientaron a editorial, comprometida coa recuperación da lingua e da cultura galega, nos tempos difíciles da ditadura.

A idea foi de Xaime Isla, que a tiña moi pensada e moi elaborada, e contou coa colaboración eficacísima de Paco del Riego, que xa fora a alma do suplemento de "La Noche". Foi Xaime Isla quen pensou en darlle a Galaxia a forma dunha sociedade mercantil, co seu consello de administración correspondente, para integrar neste ao equipo representativo do galeguismo, é dicir, Otero Pedrayo como presidente, Gómez Román como vicepresidente, Paco del Riego como secretario, Xaime Isla como conselleiro delegado, e eu mesmo como director literario. Máis ou menos a dirección do partido.

Ramón Piñeiro en Casares: Da miña acordanza

A resistencia galeguista deseñou daquela un programa de acción cultural e política que frutificou sobre todo nas seguintes xeracións. Máis de medio século despois, os seus catálogos son referencia obrigada do libro e a creación galega do noso tempo.

Na súa colección Illa Nova (1957) pensada para dar cabida aos escritores novos publicáronse as obras máis representativas da coñecida como a nova narrativa galega que renovou a narrativa galega de posguerra.

Características

A oferta de Galaxia ten carácter xeralista, como corresponde a unha editora que, seguindo aos seus principios fundamentais, tenta manter activo o proceso de modernización da sociedade lectora, incorporando temas, xéneros, novas propostas e novas liñas de traballo e investigación. O seu proxecto concrétase en coleccións de clásicos, traducións de grandes autores da literatura universal, poesía, ensaio, guías de ocio e de medio ambiente, libros de viaxes, literatura infantil e xuvenil, gastronomía...; e resumindo, atinxe dende a creación literaria e o pensamento á didáctica e os materiais de referencia escolar, como manuais, dicionarios, etc.

A Editorial Galaxia ten publicados uns 2.000 títulos, dos cales a metade xa están descatalogados. Desde 1963 edita trimestralmente Grial. Revista galega de cultura.

Curiosidades

O primeiro libro publicado por Galaxia foi Antífona da cantiga, de Ramón Cabanillas, que saíu do prelo en abril de 1951.

A editorial recibiu a Medalla de ouro de Galicia en 2008, outorgada polo goberno galego. En 2010 recibiu tamén o Premio Cultura Galega á Promoción Cultural de Galicia, tamén outorgado pola Xunta de Galicia.

Véxase tamén

Bibliografía

• CASARES, Carlos: Ramón Piñeiro. Da miña acordanza. Memorias. Galaxia 2002.
• RODRÍGUEZ-POLO, Xosé Ramón: Ramón Piñeiro e a estratexia do galeguismo. Xerais, Vigo, 2009.

Outros artigos

• Lingua galega
• Edicións do Castro
• Distribución editorial galega

Ligazóns externas

• Portal oficial en internet
• Ficha na Asociación Galega de Editores