Roberto Blanco Torres
| Roberto Blanco Torres | |
|---|---|
 |
|
| Nacemento: | 18 de marzo de 1891 Cuntis, provincia de Pontevedra  Galicia |
| Falecemento: | 3 de outubro de 1936 Entrimo, provincia de Ourense Galicia |
| Lingua: | Galego |
| Xénero(s): | Poesía |
| Cónxuxe(s): | Xulia Sánchez Novoa |
Roberto Blanco Torres, nado en Cuntis o 18 de marzo de 1891 e finado en Entrimo o 3 de outubro de 1936, foi un xornalista e poeta galego. Deu os primeiros pasos na poesía da man das vangardas artísticas. A súa obra poética é cualificada polos críticos como dunha grande beleza e intensidade expresiva. Outra das facetas deste home de letras é a de xornalista. O seu traballo nos medios impresos foi moi extenso e variado. A sinatura de Roberto Blanco Torres nas columnas de opinión caracterizou practicamente unha época xornalística.
Ademais de ser colaborador asiduo da prensa galega dirixiu varios xornais. As súas columnas desprenden o talante combativo que caracteriza toda a súa obra. Dende Cuntis, a súa vila natal, emigrou a Cuba. Este desterro condicionou a súa personalidade, que se foi forxando pouco a pouco no transcorrer dos anos. Comprometido co seu tempo, evolucionou politicamente dende o agrarismo ata o galeguismo.
Á súa figura dedicouse o Día das Letras Galegas de 1999.
Índice |
Traxectoria [editar]
O menor de nove irmáns dun sacerdote dispensado, seu pai deulle unha sólida cultura clásica, seguindo os pasos dos seus irmáns maiores en 1906 emigrou a Cuba, alí comeza a colaborar na prensa da comunidade galega, para o que emprega o pseudónimo de Fray Roblanto, o trato con Antón Villar Ponte e Ramón Cabanillas foron decisivos para a súa traxectoria ideolóxica.
O semanario Follas Novas da Habana vai ser a primeira publicación que acepte os seus artigos en setembro de 1907. Tamén colaborou con Santos e Meigas, Suevia e Galicia.
En 1910 apareceu o seu primeiro artigo na prensa galega, concretamente na revista Vida Gallega. No mes de decembro de 1911 dirixiu a revista La Alborada, colaborou en La Región Gallega (1913) e dende abril de 1915 dirixiu La Tierra Gallega, dende onde atacou a algúns dos administradores do Centro Gallego de La Habana, ao tempo que colaboraba na prensa cubana, en especial no Diario de la Marina e El Comercio.
A fins de 1916 regresou a Galicia, establécese na Coruña, participou nas Irmandades da Fala e a comezos de abril de 1917 publicou o seu primeiro artigo n' A Nosa Terra. Participou na I Asemblea Nacionalista celebrada en Lugo en decembro de 1918.
En 1920 fíxose cargo da dirección de El Correo Gallego de Ferrol, en 1921 pasou a dirixir La Zarpa en Ourense ata 1923 no que foi redactor xefe de Galicia. Diario de Vigo. En 1926 casou con Xulia Sánchez Novoa e durante uns meses de 1927 foi o redactor xefe de El Pueblo Gallego.
En 1929 publicou Orballo da media noite, colección de 31 poemas, nos que amosa o coñecemento dos recursos da poesía vangardista e futurista, e en 1930 saíu do prelo De esto y de lo otro, unha escolma de 38 artigos xornalísticos. Participou na creación da Asociación Galega de Escritores (1930).
Blanco Torres foi membro do comité executivo da Federación Republicana Gallega e en marzo de 1931 asumiu a dirección de La República de Ourense, ao tempo que comezou a desilusionarse coa actuación do seu grupo político na consecución da autonomía para Galicia, aínda así aceptou o cargo de gobernador civil de Palencia entre o 29 de decembro de 1931 e o 16 de xuño de 1932. En 1935 dirixiu El País de Pontevedra, e dende maio de 1936 foi o xefe do gabinete de prensa do Ministerio de Gobernación, e participou activamente na campaña para a aprobación do estatuto de autonomía de Galicia.
A sublevación militar do 18 de xullo de 1936 sorprendeu a Blanco Torres na aldea de Amido, no concello da Peroxa, na casa familiar da súa muller; detido en setembro foi levado á prisión de Ourense, e o 3 de outubro de 1936 foi paseado polos falanxistas que o fusilaron no concello de Entrimo. Por orden xudicial, foi soterrado nunha fosa común da igrexa parroquial de San Fiz de Galez no concello de Entrimo.
Véxase tamén [editar]
Bibliografía [editar]
- Durán, Xosé (1999). Roberto Blanco Torres - Xornalista e poeta. ISBN 978-84-8288-253-6.
- Seixo, Marcos (1998). Roberto Blanco Torres. ISBN 84-89976-50-3.
Ligazóns externas [editar]
- Real Academia Galega
- Roberto Blanco Torres, un grande esquecido (na web Galicia espallada)
- Roberto Blanco Torres (no blog Memoria de Cuntis)
| Predecesor: Mendinho , Martín Codax e Xohán de Cangas en conxunto |
Día das Letras Galegas 1999 Roberto Blanco Torres |
Sucesor: Manuel Murguía |
|
||||||||
