Gao Xingjian

Gao Xingjian
Nacemento	4 de xaneiro de 1940
Lugar de nacemento	Ganxian District
Nacionalidade	República Popular da China e Francia
Alma máter	Beijing Foreign Studies University e Nanjing Jinling High School
Ocupación	escritor, pintor, tradutor, novelista, dramaturgo, crítico literario e director de cinema
Coñecido por	The Other Shore
Premios	Premio Nobel de Literatura, honorary doctor of the Chinese University of Hong Kong e comendador da Lexión de Honor
[ editar datos en Wikidata ]

Gao Xingjian, nado en Ganzhou, China, o 4 de xaneiro de 1940, é un escritor en chinés. Nado na China, na actualidade reside en Francia e é cidadán francés. No ano 2000 obtivo o Premio Nobel de Literatura.

É dramaturgo e novelista. A súa obra máis importante é a novela A Montaña da alma.

Traxectoria

Nado na localidade de Ganzhou, na provincia de Jiangxi, estudou francés na Universidade de Pequín. Tras licenciarse, traballou como tradutor de francés na China.

A súa obra reflicte influencias do modernismo e o teatro do absurdo. Foi contratado como guionista do Teatro Popular das Artes de Pequín, onde en 1982 se representou a súa primeira obra, O Sinal de Alarma, escrita en colaboración con Liu Huiyuan. A súa segunda obra, A Estación de Autobuses estreouse en 1983, dirixida, do mesmo xeito que O Sinal de Alarma por Lin Zhaohua. Na representación, esta obra seguía a unha peza curta de Lu Xun, na que o seu protagonista acababa poñéndose na cola dunha parada de autobuses. Así, enlazábanse o final da obra de Lu Xun co comezo de A Estación de Autobuses. Esta obra, a máis famosa das súas composicións para teatro, ten certas similitudes con Esperando a Godot, cun toque de darwinismo social. Na obra empréganse numerosas expresións locais, cunha linguaxe moi pequinesa, ao estilo da famosa obra de teatro O Salón de Té de Lao She.

A "Campaña contra a Contaminación Intelectual" emprendida polo Goberno chinés a mediados dos anos 1980, causoulle problemas coa censura, e a estrea da súa terceira obra, O Home Salvaxe pospúxose ata 1985. A partir de 1986 prohibiuse a representación das súas obras novas.

En 1987 viaxa a París e queda vivindo alí. Xa non volverá a China. En Francia acaba a súa obra mestra, a novela A Montaña da alma.

No ano 2000, concedéuselle o Premio Nobel de Literatura. A noticia foi recibida con indignación por parte das autoridades chinesas, e os medios de comunicación da China continental non informaron sobre a concesión do premio.

A concesión do premio Nobel deulle fama mundial. As súas obras empezaron a traducirse ao español e outros moitos idiomas a partir dese momento.

Obra

A continuación listanse algunhas das súas obras máis representativas.

Novela

• A Montaña da Alma (Língshān 靈山 / 灵山).
• O libro dun home só (Yige ren de shenjing 一個人的神經 / 一个人的神经).
• En torno á literatura (Wenxue de liyou deng wenzhang 文學的理由等文章 / 文学的理由等文章).
• Unha cana de pescar para o avó (Gei wo laoye mai yugan 給我老爺買魚杆 / 给我老爷买鱼杆).

Obras de Teatro

• O sinal de Alarma (Juéduì xìnhào 絕對信號 / 绝对信号 ), 1981.
• A Estación de Autobuses (Chēzhàn 車站 / 车站 ), 1983.
• O Salvaxe (Yěrén 野人 ), 1984.

Notas

• Bonnie S. McDougall e Kam Louie, The Literature of China in the Twentieth Century, Columbia University Press, 1999.

Ligazóns externas

• Entrevista con Gao Xingjian. Arquivado 17 de xuño de 2005 en Wayback Machine.
• Artigo publicado no xornal arxentino Páxina 12 tras a concesión do Premio Nobel de Literatura.