Suesca

Suesca

Localización
5°06′06″N 73°47′53″O
Estado	Colombia
Departamentos	Cundinamarca
Provincia	Almeidas (pt)
Poboación
Poboación	17.318 (2015) (97,84 hab./km²)
Xeografía
Superficie	177 km²
Altitude	2.580 m
Datos históricos
Fundador	Gonzalo Jiménez de Quesada
Creación	14 de marzo de 1537
Páxina web	suesca-cundinamarca.gov.co

Suesca é un concello colombiano de Cundinamarca, situado na provincia de Almeidas, a 59 km ó nordés de Bogotá. A altitude media do concello é de 2584 m s. n. m., e o clima é tépedo, cunha temperatura media anual de 14.3 °C.

Toponimia

O topónimo «Suesca» deriva do muysc cubun (lingua muisca), e está formado por dous vocábulos: sue, que significa «ave», e hyca, que significa «rocha», ou «pedra», de modo que Suehyca, simplificado como Suesca, significa «Rocha das Aves».

Historia

Na época precolombiana, Suesca era un dos once uta (poboados, ou aldeas) que integraban o zybyn (clan) de Guatavita, no territorio que na Confederación Muisca correspondía ó Zipazgo. O tybaragüe (gobernante local) de Suesca era tributario do sybyntiba (cacique) de Guatavita.

En 1536, por mandato de don Pedro Fernández de Lugo, daquela gobernador de Santa Marta, Gonzalo Jiménez de Quesada emprendeu a súa expedición con miras a descubrir o nacemento do Río Grande da Madalena. Seguindo o curso do río, chegou a Tora de las Barrancas Bermejas (a actual Barrancabermeja); preto deste sitio atoparon un indíxena que lles falou das riquezas da Confederación Muisca e do bo clima das terras do interior. Entón abandonaron as terras do Magdalena e ascenderon pola Cordilleira Oriental, pasando por terras do que hoxe é o departamento de Boyacá, para entrar a Cundinamarca polos concellos de Susa, Guachetá, Lenguazaque, Cucunubá e Suesca.

O 14 de marzo de 1537, Jiménez de Quesada chegou a este último poboado e quedou marabillado pola bondade dos seus habitantes e pola beleza das súas impoñentes rochas, o mesmo que polo seu clima e a súa tranquilidade. En 1565 resolveuse e ordenou trasladar o casarío ó sitio onde hoxe se atopa, para evitar así as graves consecuencias que sufrían os indíxenas coas inundacións do río Funza (antigo nome do río Bogotá).

Véxase tamén

Ligazóns externas

• Páxina oficialArquivado 01 de agosto de 2019 en Wayback Machine. (en castelán)