Konrad Emil Bloch

Konrad Bloch
Nacemento	21 de xaneiro de 1912
Lugar de nacemento	Nysa
Falecemento	15 de outubro de 2000
Lugar de falecemento	Lexington
Causa	Insuficiencia cardíaca
Nacionalidade	Alemaña e Estados Unidos de América
Alma máter	Universidade de Columbia, Universidade de Múnic e Universidade Técnica de Munique
Ocupación	bioquímico e químico
Premios	Bolsa de estudos Guggenheim, Premio Nobel en Fisioloxía ou Medicina, Medalla Nacional de Ciencia, Foreign Member of the Royal Society, Prêmio Ernest Guenther e Oesper Award
Na rede
[ editar datos en Wikidata ]

Konrad Bloch, de nome completo Konrad Emil Bloch nado en Neisse, Silesia, que hoxe é a cidade de Nysa, en Polonia o 21 de xaneiro de 1912 e finado o 15 de outubro de 2000, foi un químico alemán-polaco-estadounidense.

Traxectoria

Placa de Konrad Bloch, en Nysa .

Konrad Bloch coa súa familia en Estocolmo, 1964

Formación

Estudou química na Escola Técnica Superior de Múnic, especializándose en química orgánica.

Migración e docencia

De orixe xudía, tras o ascenso ao poder do partido nazi emigrou a Suíza e tras permanecer alí dous anos emigrou aos Estados Unidos onde adquiriu a nacionalidade en 1944. Traballou no Departamento de Bioquímica da Universidade de Columbia onde recibiu o seu doutoramento. Máis tarde pasou a traballar no departamento de Química da Universidade de Cambridge, Massachusetts, e na Universidade de Chicago. Obtivo a cátedra de bioquímica da Universidade de Harvard.

Investigación e recoñecemento

Independentemente de Feodor Lynen, quen tamén tiña estudado en Múnic, dedícouse ao estudo do proceso de síntese do colesterol, descubrindo que o ácido acético é o inicio dunha sucesiva cadea de reaccións químicas cuxo produto final é o colesterol. Ambos os investigadores contribuíron ao coñecemento do metabolismo intermediario de graxas e lípidos. Os avances neste campo foron determinantes no estudo das enfermidades circulatorias e no tratamento posterior da arteriosclerose.

Foi un dos últimos investigadores en descubrir o importante papel do colesterol na formación de hormonas sexuais, un descubrimento que abriu o camiño para a biosíntese de esteroides activos.

Recibiu, xunto con Feodor Lynen, o Premio Nobel de Fisioloxía ou Medicina en 1964.

En 1985, Bloch converteuse en membro da Royal Society. En 1988, recibiu a Medalla Nacional da Ciencia.

Vida persoal

Bloch e a súa esposa Lore Teutsch coñecéronse por primeira vez en Múnic. Casaron nos Estados Unidos en 1941. Tiveron dous fillos, Peter Conrad Bloch e Susan Elizabeth Bloch, e dous netos, Benjamin Nieman Bloch e Emilie Bloch Sondel. Viviron durante moitas décadas no enclave Six Moon Hill de Lexington, Massachusetts. Era afeccionado ao esquí, ao tenis e á música. Konrad morreu en Burlington, Massachusetts de insuficiencia cardíaca conxestiva no 2000, aos 88 anos. Lore Bloch morreu en 2010 aos 98 anos.

Predecesor: John Carew Eccles Alan Lloyd Hodgkin Andrew Fielding Huxley

Premio Nobel de Fisioloxía ou Medicina de 1964

Sucesor: François Jacob André Lwoff Jacques Monod

Véxase tamén

Ligazóns externas

• Konrad Bloch, Nobel Lecture, The biological synthesis of cholesterol, 11 de decembro de 1964
• Eugene P. Kennedy, «Konrad Bloch», Biographical Memoirs – Proceedings of the American Philosophical Society (vol. 147, no. 1, 2003, pp. 67–72)
• Center for Oral History. "Konrad E. Bloch". Science History Institute. 
• Bohning, James H. (22 de marzo de 1993). Konrad E. Bloch, Transcrción dunha entrevista de James H. Bohning en Harvard, o 22 de marzo de 1993 (PDF). Philadelphia, PA: Chemical Heritage Foundation.