Otto Fritz Meyerhof

Otto Fritz Meyerhof
Datos persoais
Nacemento	12 de abril de 1884
Lugar	Hannover (Alemaña)
Falecemento	6 de outubro de 1951
Lugar	Filadelfia (EUA)
Causa	Infarto agudo de miocardio
Residencia	Alemaña, EUA
Nacionalidade	Alemá
Actividade
Campo	medicina, fisioloxía, bioquímica
Alma máter	Strasbourg Heidelberg
Director de tese	Otto Heinrich Warburg
Contribucións e premios
Coñecido por	Atopar a relación entre o consumo de osíxeno e o metabolismo do ácido láctico nos músculos.
Premios	Premio Nobel de Medicina (1922)
[ editar datos en Wikidata ]

Otto Fritz Meyerhof, nado en Hannover o 12 de abril de 1884 e finado en Filadelfia (EUA) o 6 de outubro de 1951, foi un fisiólogo alemán.

Traxectoria

Realizou os estudos de Medicina en Friburgo e Estrasburgo, e o doutoramento en Heidelberg. Traballou no instituto de Fisioloxía e Bioloxía de Kiel. Foi director do instituto de Fisioloxía e Bioloxía Wilhelm Kaiser, Berlín.

O ascenso do partido nazi obrigou a Meyerhof, de orixe xudía, a emigrar a París, e posteriormente a Estados Unidos. Foi profesor de fisioloxía na Universidade de Pensilvania, e faleceu en Filadelfia, en 1951.

Os seus traballos orientáronse, preferentemente, no proceso químico que se verifica na combustión da glicosa presente no organismo e na liberación de enerxía que se desprende en toda contracción muscular.

Meyerhof comprobou que se a contracción muscular se produce en presenza de osíxeno, a glicosa transfórmase en ácido láctico e este, pola presenza do osíxeno, en anhídrido carbónico e auga.

Obtivo o Premio Nobel de Medicina en 1922, compartido con Archibald Vivian Hill.