Mar de Andaman
| Mar de Andaman | |
|---|---|
 | |
| Localización administrativa | |
| Estado |  India Myanmar Tailandia Indonesia |
| División | Illas Andaman e Nicobar (IND) Divisións de Ayeyarwady, Yangon e Tanintharyi, e Estado de Mon (BIR) Rexión de Tailandia do Sur (TAI) Provincia de Aceh (Sumatra) (IDN) |
| Localización xeográfica | |
| Océano / Mar | Océano Índico |
| Continente | Asia |
| Illa/s | Illas Andaman e Nicobar e Sumatra |
| Xeografía | |
| Mares contiguos | Golfo de Bengala e mar da China Meridional |
| Características | |
| Superficie | 797.700 km² |
| Lonxitude máxima | 1.200 km (N-S) |
| Anchura máxima | 650 km (E-O) |
| Profundiade máxima | 3.777 m |
| Profundidade media | 870 m |
| Mapa | |
 Localización do mar de Andaman | |
 Mapa do mar de Andaman | |
O mar de Andaman[1] (en birmano မုတ္တမ Mottama, en tailandés ทะเลอันดามัน Thale Andaman, en malaio e indonesio Laut Andaman); tamén chamado mar de Birmania, é un sector do océano Índico situado ao sueste do golfo de Bengala, ao sur de Birmania, ao oeste de Tailandia e ao leste das illas Andaman, das que toma o seu nome. Ten uns 1.200 km de norte a sur e 650 km de leste a oeste, formando unha área de 797.700 km². A súa profundidade media é de 870 metros e a máxima chega aos 3.777 metros. O principal río que desemboca nas súas augas é o Irawady.
No seu extremo sueste, o mar de Andaman comunícase co mar da China Meridional a través do estreito de Malaca, que separa a illa de Sumatra da península Malaia.
Placas tectónicas[editar | editar a fonte]
No fondo oceánico do mar de Andaman corre de sur a norte o límite de dúas placas tectónicas: a placa de Birmania e a placa de Sunda. Estas microplacas crese que anteriormente formaban parte da gran placa Euroasiática, e que apareceron co constante choque da placa da India.
Como resultado, o fondo mariño. no seu centro, esténdese formando unha cunca marxinal que comezou a súa formación fai 3 ou 4 millóns de anos.
Actividade volcánica[editar | editar a fonte]
Ao leste da principal illa do arquipélago, Gran Andaman, atópase a illa Barren, que ten un volcán activo (o único volcán activo de todo o subcontinente indio). Esta actividade volcánica está provocada pola subdución da Placa India no arco formado polas illas Andaman, o que forza ao magma a emerxer na Placa de Birmania. A illa volcánica de Narcondam tamén foi formada por este proceso, pero non ten actividade eruptiva recente.
Delimitación da IHO[editar | editar a fonte]
A máxima autoridade internacional en materia de delimitación de mares, a Organización Hidrográfica Internacional («International Hydrographic Organization, IHO), considera o mar de Andaman («Andaman» ou «Burma Sea» (Mar de Birmania)) como un mar. Na súa publicación de referencia mundial, «Limits of oceans and seas» (Límites de océanos e mares, 3ª edición de 1953), asígnalle o número de identificación 44 e define os seus límites do seguinte xeito:
No suroeste.
Unha liña que vai de Oedjong Raja (5º32'N, 95°12'E) en Sumatra, a Poeloe Bras (Breueh) e a través das illas occidentais do grupo Nicobar até punta Sandy na illa Pequena Andaman, de tal maneira que todas as augas dos estreitos pertencen ao mar de Birmania.
No noroeste.
O límite oriental da baía de Bengala (43).
No sueste.
Unha liña que une Voalan Lem (7º47'N) en Siam, e Pedropunt, (5º40'N) en Sumatra.Limits of oceans and seas, páx. 21 e 22.[2]
Notas[editar | editar a fonte]
- ↑ Definición de andamanés, -esa no Dicionario de Galego de Ir Indo e a Xunta de Galicia.
- ↑ A versión orixinal en inglés está dispoñible en liña no sitio oficial da «International Hydrographic Organization» en: http://www.iho-ohi.net/iho_pubs/standard/S-23/S23_1953.pdf Arquivado 08 de outubro de 2011 en Wayback Machine.. Consultado o 10 de xullo de 2011.
Véxase tamén[editar | editar a fonte]
 |
Wikimedia Commons ten máis contidos multimedia na categoría: Mar de Andaman  |
