Cidade da Cultura de Galicia

Coordenadas: 42°52′13″N 8°31′32″W / 42.87028°N 8.52556°W / 42.87028; -8.52556

A Cidade da Cultura en 2009.

A Cidade da Cultura de Galicia é un complexo arquitectónico, cultural e de entretemento que está a ser construído na cidade de Santiago de Compostela. O complexo tratará de reconciliar a conservación patrimonial coa produción de coñecemento, investigación, creación e consumo cultural.

Índice

1 O concurso
- 1.1 O arquitecto
- 1.2 O proxecto
2 O Complexo
3 Obras e redefinición
4 Galería de imaxes
5 Notas

[editar] O concurso

A Cidade da Cultura na paisaxe.

Corredor dun dos edificios da Cidade da Cultura.

O proxecto de construción da Cidade da Cultura de Galicia naceu no ano 1999 cando a Xunta de Galicia convocou un concurso internacional para escoller o proxecto que rexería a súa construción no monte Gaiás.

Inicialmente presentáronse ao concurso doce propostas de destacados equipos de arquitectura, tanto nacionais coma internacionais, que logo da retirada do proxecto do arquitecto Santiago Calatrava quedaron en once. Os arquitectos que presentaron os seus proxectos ao concurso foron Ricardo Boffil, Peter Eisenman, Manuel Gallego Jorreto, Annette Gigon e Mike Guyer, Steve Holl, Rem Koolhaas, Daniel Libeskind, Juan Navarro Baldeweg, Jean Nouvel, Dominique Perrault e César Portela.

Unha vez avaliadas tódalas propostas, elixiuse como proxecto final o do grupo Eisenman Architects, atendendo, segundo o fallo do concurso, á súa singularidade tanto conceptual como plástica, e á súa excepcional sintonía co lugar.^[1]

[editar] O arquitecto

Peter Eisenman (Newark, Nova Jersey, 1932) é un prestixioso arquitecto estadounidense membro do grupo Five Architects de Nova York. Licenciado en Arquitectura pola Universidade Cornell, Eisenman é doutor en Filosofía pola Universidade de Cambridge e en Belas Artes pola Universidade de Chicago. Impartiu docencia nalgunhas das universidades máis prestixiosas do mundo, como Harvard, Cambridge, Princeton, Yale e Ohio. En 1980 estableceu un estudio de arquitectura de seu na cidade de Nova York.^[2]

[editar] O proxecto

O proxecto de Eisenman crea un novo cumio no monte Gaiás. Trátase dunha codia pétrea que quere lembrar un pregamento xeolóxico dividido por cortes naturais que evocan o motivo da vieira. O complexo proxectado sobre o Gaiás pretende transmitir a sensación de que se funde co terreo como se estivese tallado nel, configurando unha masa pétrea na que urbanismo de figura/figura no que os edificios e a topografía son un todo.

A proposta de Eisenman constitúe unha acrópole cultural nun outeiro que convoca a peregrinos do coñecemento. Nos seus espazos, a Cidade da Cultura acollerá servizos e actividades destinados á preservación do patrimonio e da memoria, ao estudo, a investigación, a experimentación, a produción e a difusión nos ámbitos das letras e o pensamento, a música, o teatro, a danza, o cine, as artes visuais, a creación audiovisual e a comunicación.

As obras de construción da Cidade da Cultura foron obxecto de atención do programa Extreme Engineering, emitido en Discovery Channel, que se centra en presentar proxectos arquitectónicos e de enxeñería caracterizados polo seu tamaño ou dificultade excepcionais.

[editar] O Complexo

Biblioteca de Galicia

Instalacións do Arquivo de Galicia

O complexo do Gaiás ocupa unha superficie de 141.800 metros cadrados. Segundo as previsións actuais, constará dos seguintes edificios:

Biblioteca de Galicia. Contará con 15.702 m² útiles. Está previsto que sexa a cabeceira do sistema de bibliotecas galegas e que represente ao sistema bibliotecario galego ante todos os organismos, foros e plataformas internacionais do eido bibliotecario. A Xunta de Galicia confirmou o 11 de xaneiro de 2011 como data oficial de inauguración.^[3]

Arquivo de Galicia. Contará con 11.225 m² útiles. Prevese que sexa cabeceira e centro de referencia do sistema galego de arquivos e que teña como misión a de recibir, custodiar e poñer a disposición dos cidadáns todos aqueles documentos que, polo seu valor, necesiten ser conservados. A Xunta de Galicia confirmou o 11 de xaneiro de 2011 como data oficial de inauguración.^[3]

Museo de Galicia. Contará con 20.734 m² útiles. O seu programa de usos incluirá un proxecto museográfico dedicado ao pasado e presente de Galicia, e albergará exposicións temporais e actividades de formación e divulgación. O edificio foi inaugurado o 31 de outubro de 2011 pero ata o mes de maio de 2012 non se dotará de contido, coa exposición "Galicia Petrea" [1] [2].

Centro da Música e das Artes Escénicas. Contará con 35.430 m² útiles. Terá un auditorio con capacidade para 1.300 persoas, ademais doutras salas de menor dimensión, axeitadas para a experimentación e as accións formativas e de intercambio profesional.

Centro de arte internacional. Terá 13.685 m² útiles. Prevese que o seu uso sexa o dun centro de arte contemporánea para as relacións artísticas entre Latinoamérica e Europa.

Edificio de servizos centrais. Contará con 6.291 m² útiles. Acollerá os servizos de xestión e loxística. Albergará oficinas, espazos para o persoal e salas de usos múltiples.

As torres de John Hejduk completan o grupo de edificios principais, que se artella arredor de cinco viais peonís principais. O conxunto quedaría rodeado por unha zona verde de preto de 25.000 metros cadrados.

[editar] Obras e redefinición

Imaxe tomada en xuño de 2006.

As obras de construción do complexo comezaron no ano 2001, dous anos despois da convocatoria do concurso, cun presuposto inicial de 108 millóns de euros.^[4] Nun primeiro momento a Cidade da Cultura estivo formada por seis edificios (Biblioteca, Hemeroteca, Teatro da Música, Museo da Historia de Galicia, Novas Tecnoloxías e Servizos Centrais). O tamaño das obras, o desfase entre o custo real e o presupostado e a tardanza na execución das obras espertaron movementos de oposición a este proxecto, que era cualificado de faraónico por organizacións cidadás^[5] e profesionais.^[6]

Tralo cambio de goberno na Xunta de Galicia, en agosto do ano 2005 a nova Consellería de Cultura e Deporte decidiu redefinir o proxecto co fin de darlle un xiro ao uso dos edificios que beneficiase ao conxunto global do proxecto de Eisenman.^[7] O 26 de decembro de 2006 presentouse no Parlamento Galego o novo proxecto de usos da Cidade da Cultura.

Cando se presentou o proxecto de redefinición, parte das obras da Cidade da Cultura xa estaban nunha fase avanzada da súa execución: o edificio da Hemeroteca atopábase practicamente rematado, o da Biblioteca na metade da súa construción e o Museo da Historia de Galicia nun terzo construído. O traballo de redefinición do proxecto concentrouse, logo da presentación da redefinición, nos usos e contidos dos edificios do Teatro da Música e o Edificio de Novas Tecnoloxías, aínda en fase inicial de construción. Así, no mes de xaneiro de 2006, a Consellería de Cultura e Deporte anunciou a suspensión das obras do Teatro da Música e do edificio das Novas Tecnoloxías por un período de catorce meses. Neste tempo a Consellería contactou con sectores vencellados coa cultura de Galicia para levaren a cabo a redefinición estrutural destes edificios, entre outros co Consello da Cultura Galega e co Museo do Pobo Galego.

Tras a toma de posesión do goberno bipartito o parlamento galego constituíu unha comisión de investigación para esclarecer a xestión do anterior goberno. Dita comisión emitiu as súas conclusións en decembro do 2007, propoñendo enviar o seu ditame ao ministerio fiscal.^[8] A loita política chegou ata os tribunais, ao presentar a CIG unha denuncia contra altos cargos do goberno anterior polas presuntas irregularidades cometidas na xestión da Cidade da Cultura, e que finalmente foi arquivada.^[9]