Susana Seivane

Na Galipedia, a Wikipedia en galego.
Susana Seivane
Seivane1.jpg
Susana Seivane
Nome completo Susana Seivane Hoyo
Naceu 25 de agosto de 1976 (37 anos)
Orixe Barcelona
Xénero Folk
Instrumento(s) Gaita
Selo(s) discográfico (s) Boa Music, Enavíes Música
Tempo en activo 1999 — actualidade
Web www.susanaseivane.com

Susana Seivane Hoyo, nada en Barcelona o 25 de agosto de 1976, é unha gaiteira de recoñecido prestixio cun estilo musical tradicional dos antigos gaiteiros, mais incorporando ás veces influencias doutras músicas.

Traxectoria[editar | editar a fonte]

Susana Seivane pertence a unha familia recoñecida dentro do mundo dos gaiteiros e artesáns de Galiza, a familia Seivane. Comezou a súa andaina musical ao cumprir tres anos de idade da man do seu pai Álvaro Seivane. Aos 9 trasládase, xunto coa súa familia, a Cambre. Xa en Galiza entra en contacto con mestres gaiteiros como Ricardo Portela e Moxenas, que xunto co seu propio avó, Xosé Manuel Seivane, influenciarían grandemente o seu modo de entender e interpretar a música tradicional galega.

Dende os 10 anos comezou a ofrecer concertos por todos os recunchos do país, de maneira que desde nova consegue respecto e admiración no mundo da gaita e da música tradicional galega. Durante a súa adolescencia, Susana cursou estudos de solfexo e piano, formando parte de diferentes agrupacións musicais tradicionais. Aos 20 anos, toma contacto con escenarios da man do grupo Milladoiro como artista invitada.

No ano 2001 resultou escollida como unha das cinco finalistas dos Indie Awards, os prestixiosos premios que cada ano outorga a Asociación de Música Independente dos Estados Unidos (AFIM), na categoría de mellor artista de Músicas Contemporáneas do Mundo.

Ten catro discos editados e acostuma facer xiras anuais polo territorio europeo (Francia, Holanda, España, Escocia, Portugal, Alemaña, Italia...) e americano (Bos Aires, Río da Prata, Estados Unidos).

Susana Seivane, entrevistada na Radio Galega

Discografía[editar | editar a fonte]

Álbums[editar | editar a fonte]

* Susana Seivane (1999)
* Alma de buxo (2001)
* Mares de tempo (2004)
* Os soños que volven (2009)
  • Susana Seivane:

Este traballo está baseado en temas tradicionais e composicións de artistas galegos, e foi levado polos recoñecidos escenarios do folk nacional e internacional, conseguindo grandes éxitos e loables críticas. O seu primeiro disco editouse entón en Europa, Estados Unidos e Canadá.

  • Alma de buxo:

Como novidades, neste traballo introduce instrumentos como a batería e o baixo eléctrico e inclúe no disco composicións propias.

  • Mares de tempo:

Foi o terceiro disco de Susana Seivane, que foi interpretado por escenarios de Escocia, Alemaña, Francia, Italia, Estados Unidos, Arxentina, etc. Sen abandonar a tradición e as raíces, Susana quixo dar un importante paso na innovación dos arranxos e na selección dos temas -doce mais outro extra-, para o que contou con artistas invitados.

  • Os soños que volven:

O cuarto disco contén melodías que Susana Seivane escoitaba e/ou interpretaba na súa infancia, rexurdindo na súa voz e na súa gaita, acompañadas de arranxos modernos e ás veces atrevidos.

A banda[editar | editar a fonte]

Susana Seivane nas festas de Narón 2009

Susana faise acompañar por un elenco de músicos moi novos, que se citan a continuación: Brais Maceiras nos acordeóns, Xurxo Iglesias no Bouzouki, Carlos Gándara na batería e bombo tradicional, Carlos Freire nas percusións e tamboril tradicional, Iago Rodríguez no baixo eléctrico e Begoña Riobó na zanfona e violín.

Xiras e festivais máis relevantes[editar | editar a fonte]

Dende 1999, ano do primeiro disco de Susana Seivane, foron numerosas as xiras da gaiteira, así como a súa participación nos festivais máis importantes de España, Europa e EE.UU, recollendo unha valiosa crítica da prensa e público. Destácanse entre outros:[1]

Susana acode ós festivais nacionais e internacionais máis importantes e viaxa por todo o mundo, como o Festival Celtic Connections en Escocia, o Festival Rudolstadt en Alemaña, o Dranouter Fest en Bélxica, Irish Festival en Italia, Festival Intercéltico de Lorient, Festival de Brampton en Gran Bretaña, Eastleigh Summer Music Festival en Gran Bretaña, o Cambridge Folk Festival, o Malahide International Festival of Piping & Drumming de Dublín en Irlanda, etc. Francia sempre dálle a Susana unha grande acollida con espectaculares concertos como en París, Nantes, Lyon, etc. Acode entre outros a festivais como o de Les Irlandays e Juvisy sur Orge, o Festival du bout du Monde e o Festival de La Saint Loup en Guingamp, etc. Tamén toca nos festivais máis relevantes de España: o Festival Folk de Getxo, o Mercat de la Música Viva de Vic, en Barcelona, La Mar de Músicas en Cartagena, Festival Mendébala de Biscaia, o Festival Folk de Segovia, San Froilán de Barcelona, Karrantza de Biscaia, Festival folk de Cantabria... E en Galicia recorre todo o país: Festival do mundo celta de Ortigueira, San Froilán en Lugo, Festas de María Pita, Praza Maior de Ourense, Praza da Quintana de Santiago de Compostela, Pontevedra...

Antoloxías[editar | editar a fonte]

  • Celtic Colours Vol 4 (2001) (1 canción)
  • Celtic Women (Keltia)

Premios[editar | editar a fonte]

Notas[editar | editar a fonte]

Véxase tamén[editar | editar a fonte]

Ligazóns externas[editar | editar a fonte]