Victoria, ás veces chamada Port Victoria, é a capital das illas Seychelles, cunha poboación de 24.924 habitantes (2002), máis dun terzo da total da illa. É o centro político, económico e administrativo do país.
Victoria está situada na costa nordeste da illa de Mahé, a principal do arquipélago, abríndose sobre unha ampla baía, na que se sitúa o porto marítimo. Posúe o Aeroporto International das Seychelles (acabado en 1971), que é o único do país.
A cidade vive sobre todo do turismo e da comercialización de produtos propios das illas. As principais exportacións de Victoria son a vainilla, as noces de coco, o aceite de coco, conchas de tartarugas, xabón e guano. Posúe algunha industria importante a nivel local, como a de conservas de atún.
A célebre reprodución do Big Ben no centro de Victoria, diante do edificio do Ministerio de Xustiza.
Existe unha torre de reloxo, reprodución aproximada e reducida do Big Ben de Londres. O reloxo está no centro urbano. É o monumento máis fotografado polos turistas. Foi levantado en 1903, data do acceso das Seychelles ao status de colonia británica. Punto de intersección da Avenida da Independencia e da rúa Albert, é testemuña doutra curiosidade: os únicos semáforos da illa.
Outros lugares de interese son o Pazo de Xustiza, o Xardín botánico de Victoria, o Museo nacional de historia, o Museo de historia natural e mais o mercado Sir Selwyn Selwyn-Clarke.
