Niamey é unha cidade africana, capital e cidade máis poboada do Níxer. Está situada sobre as marxes do río Níxer, no extremo oeste do país. En 2011 tiña 1 302 910 habitantes, cunha taxa de acrecentamento anual do 4,8%. Desde o 24 de novembro de 1988 forma unha comunidade urbana, formada por 5 comunas.
O barrio Mouray-Kwaratagui é o centro histórico de Niamey. A rexión de Niamey está habitada desde hai moito tempo por poboación voltaicas como os Gourmantches. Porén os fundadores da cidade de Niamey, parece que foron Maouris, vindos de Matankanri a fins do século XIX. Instaláronse sobre unha illa chamada Neni Goungou, en fronte do actual Niamey, antes de acabar por asentarse na beira esquerda do Níxer, dise que ao pé dunha árbore de cuxo nome sairía o da cidade: Niame, de Nia, o nome da árbore e me en zarma, que significa "río" ou ben "onde mana a auga".
A aldea de Niamey estaba habitada apenas por arredor de 600 persoas en 1901, cando chegou até alí a misión Lenfant. Niamey era por entón a cabeza da zona de Djerma que comprendía as rexións entre o río e Dallol Bosso. Niamey converteuse en capital do Níxer o 28 de decembro de 1926.
Abrangue unha superficie de 255km², ocupando dúas mesetas que dominan o río Níxer, a 218 m de altitude.
O clima é de tipo subtropical saheliano, cunha pluviosidade que varía de 500 a 750mm, segundo ano. Para combater a desertificación e máis as frecuentes tempestades de area que ameazan a cidade, arrastrada polo harmattan, un vento procedente do Norte, a municipalidade dispuxo, na década de 1960, un cinto de árbores de 2.500 ha (25km de longo, nunha banda de 1km de ancho). Porén, dado o éxodo rural e a urbanización crecente con bidonvilles (favelas), esta barreira non cesa de se reducir.
Niamey acolle a maioría das industrias do país. É tamén o principal polo comercial do Níxer. Durante os derradeiros cinco anos exportáronse desde a cidade arredor de 200.000 toneladas de cobre e unha cantidade similar de ouro.
