Santiago Rey Fernández-Latorre

Santiago Rey Fernández-Latorre

Biografía
Nacemento	31 de agosto de 1938 A Coruña, España
Morte	28 de agosto de 2024 (85 anos) A Coruña, España
Causa da morte	morte natural
Actividade
Ocupación	empresario
Familia
Nai	María Victoria Fernández-Latorre
Parentes	María Victoria Fernández-España, media irmá
Premios
(2022)  Gran Cruz da Orde de Isabel a Católica (2005)  Medalla de Ouro de Galicia (2002)  doutor honoris causa pola Universidade da Coruña  honorary doctor of the University of León (en)  Premio Miguel Moya  Gran Cruz da Orde do Mérito Civil
Descrito pola fonte	Gran Enciclopedia Galega Silverio Cañada Dicionario biográfico de Galicia Enciclopedia Galega Universal

Santiago Rey Fernández-Latorre, nado na Coruña o 31 de agosto de 1938 e finado no hospital San Rafael (Oza, A Coruña) o 28 de agosto de 2024, foi un empresario galego, propietario e presidente da Corporación Voz de Galicia, propietaria á súa vez do xornal La Voz de Galicia, que é o primeiro grupo de comunicación na comunidade autónoma de Galicia.

Traxectoria

Carreira empresarial

Foi fillo de Emilio Rey Romero e de María Victoria Fernández-Latorre. Licenciouse en Dereito, e en 1961 entra a traballar en La Voz de Galicia, a empresa familiar que fundara o seu avó Juan Fernández Latorre en 1882. En 1963 converteuse no seu xerente, ascendeu logo a conselleiro delegado, en 1987 a vicepresidente e posteriormente, en 1988, foi nomeado presidente, logo do falecemento do seu irmán Emilio Rey Fernández-Latorre. En 1992 controlaba o paquete de accións maioritario da empresa, o 26 %. A súa época na dirección do xornal viu marcada pola expansión, coa merca doutras cabeceiras e medios, coa construción dunha planta de impresión en Sabón, e co despregamento dunha rede de edicións.

O negocio ademais estendeuse ao sector audiovisual Galicia en cinema, radio e televisión, coa creación da Corporación Voz de Galicia S.A. que inclúe RadioVoz (anteriormente o seu xermolo fora a creación en Galicia de Antena 3 de Radio), a Voz Audiovisual e do instituto demoscópico Sondaxe. Tamén engloba a sociedade de contidos dixitais Canal Voz, a distribuidora Disgasa, Galicia Editorial — que é a planta de impresión con maior capacidad de Galicia—, e o xornal dixital La Voz de Asturias.

En 1993 deixou a primeira fila de xestión do grupo empresarial en mans do seu fillo Emilio Rey Berguer, pero en 2001 destituíuno e recuperou o control da liña empresarial e da toma de decisións.

Tamén foi presidente do Instituto Internacional de Prensa (IPI), foi un dos fundadores e presidiu a Asociación de Editores de Diarios Españois (AEDE), creou e presidiu a axencia de noticias Colpisa. E creou Antena 3 Galicia e o grupo Cable, e foi conselleiro de Antena 3 TV e Antena 3 Radio.

Fundación Santiago Rey

Ademais, no 2001, inaugurou a Fundación Santiago Rey, responsable do programa de educación ambiental Voz Natura, da convocatoria do Premio Fernández Latorre, da organización dun Mestrado Universitario en Produción Xornalística e Audiovisual (MPXA). A fundación, tamén, xestiona o Museo Santiago Rey Fernández-Latorre, creado en 1998 e sito no Polígono de Sabón (Arteixo), que garda unha colección de case 5.000 publicacións periódicas e maquinaria histórica da profesión periodística.

Influencia política e económica

Tivo unha enorme influencia tanto na comunidade autónoma como, en diferentes momentos, nas proximidades do goberno en Madrid; mesmo aparecendo, en ocasións, como valedor de Galicia e exercendo un papel reivindicativo.

Un exemplo foi cando, en xaneiro de 2003, durante a crise do Prestige, segundo contou o, daquela, alcalde Francisco Vázquez, cando Mariano Rajoy, ministro e voceiro do goberno de José María Aznar, chamou ao editor para intercambiar opinións sobre unha cita inminente na Coruña, e o editor lle preguntou se incluíran na orde do día a aprobación do Porto exterior da Coruña. Ao dicir Rajoy, que non había nada previsto, Santiago Rey, respondeulle que, entón, mellor que non viñesen. E cando Aznar, inmediatamente, anunciou a súa construción, as informacións do xornal tamén cambiaron de ton.

Tamén foi moi belixerante contra o goberno bipartido do PSdeG-PSOE e BNG, entre 2005-2009, especialmente contra o vicepresidente Anxo Quintana de quen declarou: "Un enfermeiro de Allariz non pode vir mudar o marco económico de Galicia", referíndose ao concurso eólico do momento. Tamén se enfrontou a Augusto César Lendoiro no Deportivo e, o actual dono e presidente do club, Juan Carlos Escotet, é hoxe patrono da Fundación Santiago Rey.

Beneficiouse de grandes contratos co sector público, como a impresión do Diario Oficial de Galicia, así como da maior cantidade de subvencións recibida polos medios de comunicación. Tamén se beneficiou doutras subvencións oficiais como cando en 2011, levou a cabo un investimento de 22 millóns de € para unha nova rotativa, e recibiu do Instituto Galego de Promoción Económica (IGAPE), o 10 % na maior subvención dada ese ano polo organismo, á que sumou outros 2,6 millóns do goberno de Rajoy.

Galardóns

• Gran Cruz do Mérito Civil (1986)
• Fillo Predilecto da cidade da Coruña (2001), e da provincia e Fillo Adoptivo de Ferrol, Ortigueira, Culleredo e Muxía.
• Doutor honoris causa pola Universidade da Coruña (2002)
• Premio periodístico Diego Bernal (2002), outorgado pola Asociación de Periodistas de Galicia.
• Medalla de Ouro de Galicia (2005).
• Doutor honoris causa pola Universidade de León (2006).
• Medalla de ouro e brillantes da Fundación Barrié da Coruña (2007)
• Medalla de ouro do Colexio de Médicos da Coruña (2011)
• Gran Cruz da Orde de Isabel a Católica (2022)

Vida persoal

Estaba casado en segundas nupcias con Salomé Fernández-San Julián Martínez.

Véxase tamén

Bibliografía

• "Rey Fernández-Latorre, Santiago". Dicionario biográfico de Galicia 3. Ir Indo Edicións. 2010-2011. p. 162. 
• "Rey Fernández-Latorre, Santiago". Enciclopedia Galega Universal. Ir Indo. 1999-2002. ISBN 84-7680-288-9. 
• "Rey Fernández-Latorre, Santiago". Gran Enciclopedia Galega Silverio Cañada (DVD). El Progreso. 2005. ISBN 84-87804-88-8. 

Outros artigos

• La Voz de Galicia

Ligazóns externas

• https://fundacionsantiagoreyfernandezlatorre.es/