Velocidade da luz

Na Galipedia, a Wikipedia en galego.
Este é un dos 1000 artigos que toda Wikipedia debería ter.
A luz do Sol tarda uns 8 minutos e 17 segundos en percorrer os 150 millóns de quilómetros de distancia media entre a superficie do Sol e a Terra.

A velocidade da luz (c) no baleiro é exactamente 299.792.458 metros por segundo (1.079.252.848,8 km/h). Noutros medios, esta velocidade é menor e depende do índice de refracción.

A primeira proba experimental de que a luz tiña unha velocidade finita debeuse a Ole Christensen Rømer, que a calculou cunha precisión notable - tendo en conta o suporte técnico e teórico de que dispuña (Newton aínda non escribira os Principia Mathematica).

É con James Clerk Maxwell, e coas Ecuacións de Maxwell, cando se dispón dun marco teórico que insire a luz no eido do electromagnetismo, convertendo a velocidade da luz no baleiro, na velocidade das ondas electromagnéticas no mesmo. Pero será Einstein quen a converta na trabe de ouro da teoría da relatividade, establecéndoa coma límite universal de velocidades e invariante respecto de calquera sistema de referencia, sexa inercial ou non.

Como explicación da exactitude citada, hai que ter en conta que se ben hai tempo a velocidade da luz medíase en función de espazo e tempo e as súas unidades, na actualidade é a unidade de lonxitude, o metro, m, a que se define en función da velocidade da luz no baleiro, como o espazo que recorre a luz en (1/299 792 458) s

Artigos relacionados[editar | editar a fonte]