Xilosa
A xilosa é un monosacárido (azucre simple) de cinco carbonos (pentosa) cun grupo aldehido (aldosa). Foi illado por primeira vez da madeira por Koch en 1881, de onde lle vén o nome, xa que en grego xylos (ξυλος) significa madeira. É o precursor da hemicelulosa, un dos principais constituíntes da biomasa vexetal. É un azucre redutor.
Índice |
Estrutura [editar]
A fórmula química da xilosa de cadea aberta é HOCH2(CH(OH))3CHO. O hemiacetal cíclico pode aparecer en dúas formas isómeras: piranosa, que forma aneis de seis membros, e furanosa, que forma aneis de cinco membros e ten un carbono fóra do anel. Cada unha destas formas pode orixinar anómeros segundo a orientación do grupo hidroxilo (OH) do carbono anomérico.
A xilosa na natureza [editar]
A xilosa é o monómero básico na estrutura da hemicelulosa, molécula que supón un 30 % da materia vexetal. A xilosa atópase nos embrións da maioría das plantas comestibles.
A xilosa é tamén o primeiro sacárido que se engade á serina ou treonina na O-glicosilación dos proteoglicanos, polo que é o primeiro sacárido que intervén na ruta biosintética da maioría dos polisacáridos aniónicos, como o heparán sulfato e a condroitina sulfato, ambos os dous glicosaminoglicanos.[1]
Aplicacións [editar]
A degradación catalizada por ácidos da hemicelulosa orixina furfural,[2] un disolvente industrial e un precursor de polímeros sintéticos.[3] A xilosa non é metabolizada polos humanos. Absórbese completamente nos intestinos, pasa ao sangue e é secretada polos riles.
En veterinaria, a xilosa úsase para comprobar a mala absorción administrándoa disolta en auga ao paciente despois dun período de xexún. Se a xilosa se detecta no sangue ou na urina poucas horas despois, significa que foi absorbida nos intestinos.[4] A redución da xilosa por hidroxenación catalítica produce xilitol, que se usa como edulcorante alimentario baixo en calorías e que non produce carie dental.
A oxidación do grupo aldehido do carbono 1 da xilosa orixina o ácido xilónico.
Notas [editar]
- ↑ Buskas Therese, Sampat Ingale, Geert-Jan Boons (2006). "Glycopeptides as versatile tool for glycobiology". Glycobiology 16 (8): 113R–36R. DOI:10.1093/glycob/cwj125. PMID 16675547..
- ↑ Roger Adams and V. Voorhees (1921). "Furfural". OrgSynth 1: 49.
- ↑ H. E. Hoydonckx, W. M. Van Rhijn, W. Van Rhijn, D. E. De Vos, P. A. Jacobs. ""Furfural and Derivatives"". Ullmann's Encyclopedia of Industrial Chemistry 2007 - Wiley-VCH, Weinheim. DOI:10.1002/14356007.a12_119.pub2.
- ↑ "D-xylose absorption". MedlinePlus (U.S. National Library of Medicine). July 2008. http://www.nlm.nih.gov/medlineplus/ency/article/003606.htm..
Véxase tamén [editar]
Outros artigos [editar]
- Xilitol
- Saccharophagus degradans (bacteria que fermenta xilosa)
|
|||||||||||||||||||||||||||||||||||
