Ramón González Figueroa

Na Galipedia, a Wikipedia en galego.
Saltar ata a navegación Saltar á procura
Ramón González
Información persoal
Nome Ramón González Figueroa
Nacemento 1898
Lugar de nacemento A Coruña
Falecemento 4 de novembro de 1977
Posición Dianteiro
Carreira sénior
Anos Equipos Aprs (Gls)
1914–1917 Fabril
1917–1918 Real Club Coruña
1918–1923 Vigo Sporting
1923 Celta de Vigo
1924–1931 Deportivo da Coruña
Selección nacional
1920 España
Partidos e goles só en liga doméstica.

editar datos en Wikidata ]

Ramón González Figueroa, nado na Coruña en 1898 e finado na mesma cidade o 4 de novembro de 1977, foi un futbolista galego. Xogaba de dianteiro e destacou especialmente no Vigo Sporting e no Deportivo da Coruña. foi internacional coa selección española, coa que gañou a medalla de prata nos Xogos Olímpicos de 1920.

A súa fichaxe polo Deportivo da Coruña en 1923, xunto ás de Otero, Isidro e Chiarroni, pouco despois de que a fusión do Vigo Sporting co Fortuna dese orixe ao Celta de Vigo, provocou unha batalla legal entre os dous clubs e foi o detonante da actual rivalidade Celta-Deportivo.

Traxectoria[editar | editar a fonte]

Comezou xogando no Fabril, dende o mesmo ano da creación do club, e tras un curto paso polo Real Club Coruña marchou a Vigo, onde xogou no Vigo Sporting.[1] Co club vigués disputou o Campionato de Galicia, proclamándose campión nas tempadas 1918/19, 1919/20 e 1922/23. Disputou ademais a Copa de España, marcando dous goles na edición 1922/23.

O 11 de marzo de 1923 foi o autor do único gol no derradeiro derbi entre o Vigo Sporting e o Fortuna de Vigo, pouco antes de que estes dous equipos se fusionasen para formar o Celta de Vigo.[2] Días antes do comezo da tempada 1923/24, González, xunto a outros tres futbolistas (Otero, Isidro e Chiarroni), fichou polo Deportivo da Coruña. O Celta acusou ao Deportivo de subornar aos catro futbolistas, pois naquela época non estaba permitido o profesionalismo no fútbol, desencadeándose unha batalla legal que deu inicio á actual rivalidade entre os dous clubs.[3] A Federación Galega intercedeu e descualificou ao Deportivo do Campionato de Galicia, sancionando ademais aos xogadores, que quedaron temporalmente inhabilitados.[4]

En 1924 puido xogar finalmente co Deportivo, converténdose pouco despois no capitán e nun dos xogadores máis emblemáticos do club.[4] En 1927 recibiu un forte golpe nun partido en Pontevedra, que o mantivo inconsciente durante case un día, motivo polo que estivo de baixa varios meses. Aínda que cun rendemento menor tralo seu regreso, continuou no club branquiazul ata 1930, xogando os dous últimos anos na Segunda División, trala creación das ligas nacionais.[5] En 1931 regresou para xogar un último partido contra o Racing de Ferrol no antigo Campo de Riazor, correspondente ao Campionato de Galicia.[6]

Selección española[editar | editar a fonte]

Participou coa selección española nos Xogos Olímpicos de 1920 en Antuerpen, conseguindo a medalla de prata e converténdose no primeiro medallista olímpico coruñés.[7]

Familia[editar | editar a fonte]

Casou con María Pereiro Rey, irmá do tamén futblista do Deportivo Emilio Pereiro, coa que tivo un fillo, chamado tamén Ramón. Foi tío de Luis Precedo, futbolista e adestrador, que xogou tamén no Fabril, entre outros equipos.[8]

Palmarés[editar | editar a fonte]

Vigo Sporting

Deportivo da Coruña

Notas[editar | editar a fonte]

  1. "Ha muerto Ramón González". La Voz de Galicia (en castelán). 4 de novembro de 1977. p. 32. 
  2. "El último Fortuna-Vigo Sporting". Faro de Vigo (en castelán). 24 de marzo de 2019. Consultado o 14 de setembro de 2021. 
  3. "El nacimiento del derbi gallego". La Voz de Galicia (en castelán). 10 de novembro de 2011. Consultado o 15 de setembro de 2021. 
  4. 4,0 4,1 ""Todo por y para Vigo"". Faro de Vigo (en castelán). 23 de agosto de 2013. Consultado o 14 de setembro de 2021. 
  5. "Notas deportivas". La Voz de Galicia (en castelán). 31 de decembro de 1931. p. 5. 
  6. "El Deportivo vence al Racing ferrolano". La Voz de Galicia (en castelán). 20 de outubro de 1931. p. 5. 
  7. "El Ayuntamiento homenajea al futbolista Ramón González al cumplirse cien años desde que se convirtió en el primer olímpico coruñés" (en castelán). 4 de setembro de 2020. Consultado o 14 de setembro de 2021. 
  8. "Murió Luis Precedo". La Voz de Galicia (en castelán). 10 de maio de 1975. p. 28. 

Véxase tamén[editar | editar a fonte]

Ligazóns externas[editar | editar a fonte]