Estadio de Chamartín

Na Galipedia, a Wikipedia en galego.
Saltar para a navegação Saltar para a pesquisa
Campo del Real Madrid Fútbol Club
Estadio de Chamartín
Boca - Real Madrid 1925.jpg
Datos
Localización Madrid, España España
Construción
Inauguración 17 de maio de 1924
Demolición 1946
Arquitecto José María Castell
Estadio
Superficie Céspede
Capacidade 15 000
Propietario Real Madrid Club de Fútbol
Localía Real Madrid Club de Fútbol

O Estadio de Chamartín (oficialmente Campo del Real Madrid Club de Fútbol)[1] foi un estadio de fútbol propiedade do Real Madrid, localizado en Madrid, España.

Historia[editar | editar a fonte]

En 1923 o Real Madrid, que entón disputaba os seus encontros nun pequeno campo da rúa O'Donnell, adquiriu uns terreos en Chamartín de la Rosa —daquela municipio independente de Madrid— para construír un novo estadio. Os terreos, coñecidos co nome de Villa Rosa, tiñan 400 000 pés de extensión e ficaban delimitados polo camiño do Areal, o camiño de Maudes e a rúa Alfredo Calderón.[1]

Un ex-xogador branco, José María Castell, que xa fora o arquitecto do Estadio Metropolitano de Madrid, foi o responsable do proxecto, que incluía un complexo deportivo formado por pistas de tenis, ximnasio e piscina, alén dun campo de herba —o primeiro en propiedade da historia do Real Madrid— con capacidade para 15 000 espectadores. Para facer fronte ás obras o club tivo que pedir un crédito de medio millón de pesetas.[1]

O Estadio de Chamartín inaugurouse coincidindo coas festas de San Isidro, o 17 de maio de 1924, nun partido entre o Real Madrid e o campión inglés, o Newcastle United FC. Os locais gañaron por 3–2, sendo Félix Pérez o autor do primeiro gol na historia do novo estadio.[2]

Aínda que inicialmente se pensou en denomina-lo novo estadio como Parque de Sports del Real Madrid FC, finalmente foi bautizado oficialmente como Campo del Real Madrid Club de Fútbol.[1] Porén, popularmente foi sempre coñecido como Chamartín por causa do municipio limítrofe, absorbido máis tarde polo de Madrid.

O Estadio de Chamartín foi a sede do Real Madrid ata que en 1947 se trasladou ó Nuevo Estadio Chamartín —cuxo nome logo foi trocado polo de Estadio Santiago Bernabéu—, proxectado polo enxeñeiro de camiños Carlos Fernández Casado e que se construíu nuns terreos adxacentes. Baixo estes avanza o túnel Atocha-Chamartín, construído baixo os xardíns desta vila na época da Segunda República sendo ministro de Obras Públicas Indalecio Prieto.

O 16 de maio de 1946 disputouse o derradeiro partido no Estadio de Chamartín, que enfrontou o Real Madrid co Real Oviedo na volta das semifinais da Copa do Xeneralísimo, finalizando cun resultado de 3–1 a favor do conxunto local.

Notas[editar | editar a fonte]