Os deportes gaélicos son deportes practicados principalmente en Irlanda. Os dous principais deportes son o fútbol gaélico e o hurling. Estes son deportes de pelota xogados entre dous equipos integrados por quince xogadores que xogan nun campo rectangular de herba cunha portería en forma de "H" en cada extremo. Estes deportes son os máis populares en Irlanda e o seu obxectivo e anotar introducindo a pelota (ou sliotar no hurling) na portería do equipo contrario (o que se denomina gol, igual a tres puntos) ou por riba da barra (para un punto). O equipo gañador é o que anotara máis puntos ao final do partido. Tanto o fútbol gaélico como o hurling teñen a súa versión feminina, que no caso do último é denominada camogie. Os outros deportes gaélicos son a pelota gaélica, e o rounders.
A Asociación Atlética Gaélica (coñecida polas súas siglas en inglés GAA), con sede no estadio de Croke Park en Dublín, encárgase de fomentar e organizar as competicións deportivas destes deportes.
O All-Ireland Senior Hurling Championship é a principal competición de hurling no mundo. Este campionato é unha serie anual de partidos xogados en Irlanda durante o verán e o comezo do outono organizado pola Asociación Atlética Gaélica (GAA). O trofeo lévase xogando dende o ano 1887 coa excepción do ano 1888 no que non se disputou.
Normalmente, a final xógase o primeiro domingo de setembro en Croke Park que serve como culminación dunha serie de partidos xogados durante os meses de verán, e os resultados determinan que condado recibe a Liam McCarthy Cup. Nos seus comezos, o campionato foi unha competición de eliminación directa na que só xogaban os campións de cada provincia irlandesa. Durante os anos 1990, a competición ampliouse, incorporando en primeiro lugar un "sistema de porta atrás" e despois unha fase de grupos de todos contra todos. Actualmente o All-Ireland consta de varias etapas. No actual formato, o trofeo empeza a finais de maio cos campionatos provinciais de Leinster e Munster. Unha vez derrotado o equipo no provincial, a GAA concédelle ao equipo do condado outra oportunidade de gañar o título. Os campións de Leinster e Munster gañan un posto automático nas semifinais. Aí únense os dous gañadores da clasificación do All-Ireland a través de só dous cuartos de final.
Os equipos máis dominantes veñen das provincias de Leinster e Munster. Cork, Kilkeny e Tipperary son considerados "os tres grandes" do hurling.
...o primeiro rexistro de pelota gaélica data de 1527 nos estatutos da cidade Galway (Irlanda), nos que se prohibía a práctica de xogos de pelota contra as paredes?
...a primeira liga de fútbol gaélico mixto, non recoñecido pola GAA, chamada Liga Gallaecia foi creada en Galicia?
