Partido da Terra

Na Galipedia, a Wikipedia en galego.
Partido da Terra (PT)
Partido político de Galiza
Historia
Fundación 2011
Posicións políticas
Ideoloxía democracia directa
ecoloxía
reintegracionismo
Representación
Representación sen representación parlamentaria
Outros datos
Páxina web www.partidodaterra.net

Partido da Terra (PT), é un partido político con sede na Galiza que se postula como partidario da democracia directa, do decrecemento e da soberanía e a sustentabilidade en todos os ámbitos.[1] Lingüisticamente englóbase dentro do movemento reintegracionista, e promoven a unidade das linguas galega e portuguesa, usando a ortografía do Acordo Ortográfico da Língua Portuguesa nas súas comunicacións.[2]

Internamente, o PT organízase en forma de mancomunidade, sendo formado por pequenas organizacións de ámbito parroquial ou comarcal autoxestionadas e completamente independentes nas súas decisións.[3]

Historia[editar | editar a fonte]

O Partido da Terra constituíuse en Santiago de Compostela a 25 de xullo de 2011, Día Nacional de Galiza, e foi rexistrado oficialmente no Ministerio do Interior nesa mesma semana. En xaneiro de 2012 o Movimento Ecologista Galego, partido político fundado en 1983 por Constantino Rábade, decide disolverse e integrarse no PT.[4]

Lingua[editar | editar a fonte]

O PT asume como propia a lingua galega, a cal entenden como indistinta da lingua portuguesa, usando a ortografía do Acordo Ortográfico da Língua Portuguesa para escribila. Como parte dos preparativos para as eleccións ao Parlamento Europeo de 2014, o Partido da Terra adopta formalmente o nome do partido traducido a todas as linguas faladas no territorio do Estado.[5] Desta maneira, son denominacións correctas Partido de la Tierra (en castelán), Partit de la Terra (en catalán), Lurraren Alderdia (en éuscaro), Partíu de la Tierra (en asturleonés), Partito de la Tierra (en aragonés), Partit de la Tèrra (en occitano), Hizb al-Ardh (en árabe) e Akabar n Wakal (en bérber).

Eleccións[editar | editar a fonte]

O primeiro encontro electoral ao cal concorre o PT é ás eleccións á Xunta Xeral do Principado de Asturias, en marzo de 2012. Presentouse só no distrito electoral occidental, onde se sitúa a rexión de galegófona do Eo-Navia.[6] Con apenas 18 votos, situouse como vixésima forza electoral a nivel do Principado, superando unicamente ao Partido Familia y Vida.[7] A nivel da circunscrición occidental foi a décimo cuarta.[8]

En outubro de 2012 presentouse ás eleccións ao parlamento da Galiza, nas cales obtivo 3.307 votos (0,22%), situándose como undécima forza dun total de 26 grupos que concorrían ás eleccións.

En maio de 2014 preséntase ás Eleccións ao Parlamento Europeo.[9] Para a elección da candidatura foron realizadas unhas primarias abertas a toda a poboación, onde calquera cidadán podía resultar elixido para formar parte da lista.[10] É a única forza de ámbito galego que presenta candidatura en solitario. Non obstante, outros partidos que non lograron os avais necesarios para se presentaren pediron abertamente o voto para o PT, como é o caso dos Verdes Ecopacifistas.[11] Obtivo finalmente 9.940 votos no ámbito da circunscrición única estatal.[12]

Notas[editar | editar a fonte]

Véxase tamén[editar | editar a fonte]

Ligazóns externas[editar | editar a fonte]