Galiza Ceive-OLN

Na Galipedia, a Wikipedia en galego.
(Redirixido desde "GC (OLN)")
Galiza Ceive-OLN
Partido político de Galiza
Galiza Ceive-OLN.jpg
Dirixentes e organización
Líder Xosé Luís Méndez Ferrín
Historia
Fundación 1980
Disolución 1989
Posicións políticas
Ideoloxía Independentismo galego
Socialismo
Publicación Espiral

Galicia Ceibe-OLN (posteriormente cambiou o nome a Galiza Ceive-OLN) foi unha organización independentista de esquerdas impulsada polo Partido Galego do Proletariado en 1980 como a súa fronte de actuación política, aínda que o PGP utilizouna orixinalmente tan só como unha plataforma para concorrer ás eleccións municipais de 1979 en Vigo.

Historia[editar | editar a fonte]

Tras a disolución do PGP en 1981 GC-OLN ocupou o seu espazo político, a independencia plena sen excluí-la loita armada. En 1982 foi unha das forzas de deu orixe ó BNG pero deixou a organización na propia Asemblea Constituínte ao se decidir a participación do BNG nas eleccións. O seu voceiro era a revista Espiral.

Nas eleccións de 1983 formou xunto ó PCOE e independentes as Candidaturas de Unidade Popular que presentou candidaturas en Vigo e Pontevedra. Diante os malos resultados acadados Xosé Luís Méndez Ferrín propuxo a finais de ano na VI Asemblea Nacional a autodisolución da organización, o que foi rexeitado pola maioría; parte da militancia abandonou a organización. Nesa Asemblea decidiuse mudar o nome a Galiza Ceive-OLN e adoptar a ortografía reintegracionista, Antón Arias Curto converteuse no líder máis destacado. A organización deu soporte ideolóxico ó Exército Guerrilheiro do Povo Galego Ceive.

En 1988 xunto o Partido Comunista de Liberación Nacional, escisión da UPG, formou a Frente Popular Galega, e integra outro grupo que formaba parte da FPG procedente do PCLN, os Grupos Independentistas Galegos formado por alumnado da Universidade de Santiago de Compostela. Ó ano seguinte Galiza Ceive-OLN decidiu deixa-la organización por diferenzas na estratexia da organización e autodisolveuse para formar a Assembleia do Povo Unido.