Denver, Colorado

Denver

Bandeira Escudo
City and County of Denver
Horizonte de Denver dende City Park
Alcume	Mile-High City
Información
País	Estados Unidos
Estado	Colorado
Superficie  • Total	401.3 km²
Poboación  • Total	619968 (2011)
Densidade	1561 hab./km²
Altitude	1609 m
Denver
Páxina web oficial

Denver é a cidade máis grande e capital do estado de Colorado, Estados Unidos. Ademais, e despois de El Paso, é o condado con máis habitantes do país. Está situada no río South Platte, no extremo occidental dos High Plains, ao leste das Montañas Rochosas (Rocky Mountains, en inglés). O distrito central de Denver ubícase inmediatamente ao leste da confluencia do afluente Cherry Creek co río South Platte, aproximadamente 19 quilómetros ao leste do contraforte das Montañas Rochosas. Denver é coñecida como A cidade dunha milla de altura (Mile-High City) debido a que a súa altura oficial é exactamente dunha milla (aproximadamente 1,62 quilómetros) sobre o nivel do mar (nos banzos do edificio capital do estado). A poboación estimada en 2011 era de 619.968, o que fai de Denver a 23ª cidade máis poboada dos Estados Unidos. A área metropolitana de Denver-Aurora-Broomfield tiña unha poboación en 2011 duns 2.599.504 e por iso foi clasificada como a 21ª área metropolitana máis poboada do país. Ademais, Denver é a segunda cidade máis poboada da rexión de Moutain West e do suroeste dos Estados Unidos despois de Phoenix, Arizona.

Historia

Denver City foi fundada en novembro do 1858 como unha vila fundamentalmente mineira durante a febre de ouro do pico Peak (Pikes Peak en inglés), ao oeste de Kansas. Naquel verán, un grupo de exploradores de Lawrence (Kansas) chegaron e edificaron a cidade de Montana (Montana City) á marxe do río South Platte, aínda que rapidamente desapareceu dando lugar no verán de 1859 a Auraria, un nome que fai referencia á mina de ouro da cidade do mesmo nome pertencente ao estado de Georgia. Este foi o primeiro asentamento do que despois sería a cidade de Denver. O 22 de novembro de 1858, o xeneral William Larimer, un especulador da terra do leste de Kansas, colocou troncos de cottonwood (un tipo de álamo típico de Norteamérica) para poñer unha reclamación nun acantilado con vistas á confluencia do río South Platte e do seu afluente, o Cherry Creek, ao outro lado do arroio do asentamento mineiro de Auraria. Larimer denominou a cidade Denver City para gañarse o favor do gobernador territorial de Kansas, James W. Denver, pois el esperaba que poñéndolle ese nome á vila podería chegar a que o condado de Arapaho fose sede de condado, pero non o conseguiu, xa que por aquel entón o gobernador de Denver xa dimitira. As primeiras cidades asentárons no que agora é o Confluence Park, no centro da cidade de Denver. Larimer, xunto cos socios da sociedade St. Charles City Land, vendeu parcelas da cidade aos comerciantes e mineiros coa intención de crear unha gran cidade. Denver era unha cidade fronteiriza, cunha economía baseada na industria mineira, na gandería e no comercio de mercancías. O territorio de Colorado foi creado o 28 de febreiro de 1861, mentres que o condado de Araphoe se formou o 1 de novembro do mesmo ano. Por outra parte, a cidade de Denver (chamada Denver City por aquel entón) foi incorporada a Colorado o 7 de novembro de 1861, en 1867 converteuse na capital do territorio e, ademais, foi sede do condado de Araphoe dende a súa formación ata a súa consolidación en 1902. Unha vez que adquiriu importancia, Denver City acurtou o seu nome e pasou a chamarse Denver, tal e como se coñece hoxe.

Xeografía

Denver atópase no centro da rexión Front Range Urban Corridor, situada entre as Montañas Rochosas, ao oeste das chairas altas do leste. A topografía de Denver está formada polas chairas do centro da cidade e polas zonas montañosas ao oeste, sur e sureste. Segudo a oficina do censo dos Estados Unidos (United States Census Bureau), a cidade ten unha área de 154,9 quilómetros cadrados, dos cales 4,1 quilómetros cadrados son auga. O condado de Denver están rodeado só por tres outros condados: o de Adams, ao norte e ao leste, o de Arapahoe, ao sur e ao leste, e o condado de Jefferson, ao oeste. A pesares de que o alcume de Denver é o de A cidade dunha milla de altura (Mile-High City) debido a que a súa altura oficial é dunha milla sobre o nivel do mar, a elevación de toda a cidade está arredor dos 1,5636 e 1,7343 quilómetros.

Denver

Demografía

A oficina do censo dos Estados Unidos (United States Census Bureau) estima que, no ano 2008, a poboación do condado de Denver foi de 600.158 persoas, o que o sitúa no 24ª condado máis poboado dos Estados Unidos. A área metropolitana de Denver-Aurora-Broomfield contaba en 2008 cun total de 2.506.626 habitantes (a 21ª máis poboada dos Estados Unidos), mentres que a área metropolitana de Denver-Aurora-Boulder contaba con arredor de 3.049.562 habitantes (a 16ª máis poboada do país).

Economía

A economía de Denver depende parcialmente da súa posición xeográfica, pois por ela pasan numerosas vías de comunicación que conectan con outros territorios. A área metropolitana (Metropolitan Statistical Area (MSA) en inglés) de Denver ten un produto rexional bruto (Gross Metropolitan Product (GMP) ou Gross Regional Product (GRP) en inglés) de 157,6 billóns de dólares en 2010, o que a sitúa na 18ª rexión máis rica dos Estados Unidos. Denver, por ser a cidade máis grande dentro dun radio de 800 quilómetros, converteuse nun lugar propicio para o almacenamento e distribución de bens e servizos ás rexións de Mountain States, a do Suroeste dos Estados Unidos, e tamén a do Oeste dos Estados Unidos. Outra das vantaxes da súa situación xeográfica é que Denver é case equidistante das grandes cidades da rexión do Medio Oeste, coma Chicago e St. Louis e tamén dalgunhas cidades da Costa oeste (West Coast en inglés) como Os Ánxeles e San Diego.

Véxase tamén

Ligazóns externas

• Web Oficial de Denver (en inglés)
• Mapa de Denver (en inglés)
• O departamento de policía de Denver (en inglés)
• Biblioteca pública de Denver (en inglés)
• Escolas públicas de Denver (en inglés)
• Perfil de John Hickenlooper, alcalde de Denver (en inglés)