Palacete das Mendoza

Palacete das Mendoza
Fachada principal do palacete das Mendoza
Edificio
Tipo	Pazo urbano
Estilo	ecléctico
Enderezo	Avenida de Santa María s/n
Localización	Pontevedra, Galicia
Coordenadas	42°25′58″N 8°38′51″O
Propietario	Deputación de Pontevedra
Construción
Inicio	1878
Construción	1880
Remate	1880
Dimensións
Plantas	3 (Planta terrea + andar + sobrado)
Equipo
Arquitecto(s)	Alejandro Rodríguez Sesmero
[ editar datos en Wikidata ]

O Palacete das Mendoza é un edificio histórico situado na zona vella da cidade de Pontevedra, entre a avenida de Santa María e a rúa Arcebispo Malvar. É a sede do Padroado de Turismo Rías Baixas.

Historia

No soar do pazo erguíase o castelo medieval dos Churruchaos (ou dos arcebispos de Santiago) e as Torres Arcebispais, cuxo centro de interpretación (CITA) sitúase nas proximidades. En 1877 por medio da súa venda, Soledad Méndez Núñez, irmá do mariño Casto Méndez Núñez, fíxose coa propiedade do soar, e encargou a construción do palacete ao arquitecto Alejandro Sesmero, autor tamén dos impoñentes edificios do século XIX da Deputación Provincial e da Casa Consistorial. Este arquitecto foi o encargado de planificar os nobres edificios da capital da provincia, unha vez demolida a muralla medieval da cidade. A mansión foi construída entre 1878 e 1880.

O palacete foi o primeiro edificio da cidade que contou coa acometida de auga corrente. O arquitecto Sesmero foi o encargado de planificar o fornecemento de auga corrente á cidade e ás súas prazas, para o que se instalaron varias fontes de fundición decimonónicas, unha das cales se sitúa moi preto do pazo.

Foron os seus primeiros moradores, a súa propietaria, Soledad Méndez Núñez, súa irmá, Maria del Carmen Clara Méndez Núñez, o home desta, José Babiano Rodríguez, e a filla do matrimonio, que sería a notábel pintora Carmen Babiano Méndez-Núñez. A casa pasou finalmente á propiedade de María e Concepción Mendoza Babiano, fillas de Carmen Babiano, implicadas na cultura da cidade e que foron as últimas en ocupar o pazo no ano 1971. Durante a súa residencia no mesmo, o palacete converteuse en lugar de reunións de personalidades importantes do momento.

O edificio sufriu un certo abandono até que a mediados da década dos anos 1980 serviu como un dos escenarios principais para a gravación da serie de televisión Os gozos e as sombras, de Televisión Española. Era a casa de Dona Mariana (Amparo Rivelles). O palacete das Mendoza é facilmente recoñecible na serie como a casa de Dona Mariana, aínda que só por fóra, xa que as escenas interiores rodáronse noutro palacete de Madrid, preto da rúa de Alcalá.

Nos anos 90 o palacete foi adquirido por unha entidade bancaria, Caja Madrid, até que a Deputación Provincial de Pontevedra mercouno para ser a sede de Turismo Rías Baixas, sendo inaugurado para tal función o 28 de xullo de 2004.

En 2015, o artista Paco Pestana transformou o tronco e as ramas do vello teixo seco dos xardíns do Palacete das Mendoza nunha escultura viva colocando unhas bagas de 40 quilos de peso e 1,10 metros de altura como elementos artísticos sobre o esqueleto leñoso do teixo, co que o artista pretendía que a vella árbore frutificase como nunca antes.

Descrición

O palacete rodeado de xardíns.

O edificio pertence ao estilo ecléctico imperante a finais do século XIX con elementos e concepción de inspiración na arquitectura francesa. Consta de semisoto, planta terrea e sobrado. Na planta terrea ábrese unha porta principal e catro vans e na planta superior cinco portas balconeiras. A parte superior dos vans está decorada con motivos ornamentais. A parte superior remátaa unha cornixa con motivos circulares.

Na fachada obsérvanse recercados neoclásicos nos vans, con linteis rematados en frontóns triangulares no segundo andar e en arco de círculo no primeiro. A caixa de aforros que foi propietaria do edificio durante uns anos reformou o interior e as salas que tiña na planta terrea, salón de música, comedor, salón de té e a escaleira imperial de madeira, facendo desaparecer todo para crear o patio de operacións. Na cuberta ten unha lumieira. O edificio é exento e está rodeado de xardíns que realzan a súa arquitectura.

Cultura

Ás festas diarias das irmás María e Concha Mendoza Babiano acudían os membros máis distinguidos da sociedade pontevedresa da época e os visitantes ilustres que acudían á cidade ou chegaban ao porto de Marín-Pontevedra. Durante varias décadas, as irmás Mendoza recompilaron as receitas que pedían aos seus invitados, que recollían nas súas viaxes ou que recibían dos seus amigos. Acabaron creando unha inédita e valiosa colección de receitas privadas para as súas festas, con pratos de todo o mundo. Estas receitas publicáronse a finais de 2021 nun libro titulado As 1001 receitas do palacete das Mendoza.

Galería

• 
  Fachada
• 
  Teixo seco decorado
• 
  Reloxo de sol no xardín
• 
  Congreso da Camelia en 2014
• 
  Fachada traseira
• 
  Fachada
• 
  Xardín
• 
  Fachada sur
• 
  Detalle da decoración

Véxase tamén

Bibliografía

• Fontoira Surís, Rafael (2009). Pontevedra Monumental. Pontevedra: Deputación de Pontevedra. pp. 432; 523. ISBN 978-84-8457-327-2.

Outros artigos

• Eclecticismo (arquitectura)
• Casa Consistorial de Pontevedra
• Pazo da Deputación de Pontevedra

Ligazóns externas

• Páxina web sobre as receitas das irmás Mendoza Babiano Arquivado 02 de maio de 2016 en Wayback Machine.
• Páxina web da Deputación Provincial de Pontevedra Arquivado 08 de marzo de 2016 en Wayback Machine.